އެމްބެސަޑަރ ބްރޭންޑްގެ "ވެޖިޓަބަލް ކްރީމް" ނުވިއްކުމަށާއި ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭ އިން އަންގައިފި އެވެ.
އެ އޮތޯރިޓީއިން ނެރުނު ބަޔާނެއްގައި ބުނެފައި ވަނީ، 'އެމްބެސަޑަރ' ބްރޭންޑްގެ ވެޖިޓަބަލް ކްރީމް އުފެއްދުމުގައި "ލޯކަސްޓް ބީން ގަމް" ބޭނުންކޮށްފައިވާ ކަމަށެވެ. އަދި އެ އިންގްރީޑިއަންޓް "އެތިލީން އޮކްސައިޑް" ކިޔާ ނުރައްކާތެރި ކެމިކަލަކުން ތަގައްޔަރުވެފައިވާ ކަމުގެ މައުލޫމާތު ޔޫރަފްގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް (އާރްއޭއެސްއެފްއެފް) އިން އެއޮތޯރިޓީއަށް އަންގާފައިވާ ކަމަށެވެ.
އެ އުފެއްދުމުގެ ސަބަބުން ކާބޯތަކެތީގެ ރައްކާތެރިކަމަށް އޮތް ގެއްލުމުގެ މިންވަރު އެ އޮތޯރިޓީން ބަލަމުން އަންނަ ކަމަށް ވެސް އެމްއެފްޑީއޭގެ ބަޔާނުގައި ބުނެފައި އެވެ.
އަދި ރައްކާތެރިކަމުގެ ފިޔަވަޅެއްގެ ގޮތުން ވަކި ގޮތެއް އަންގަންދެން އެ ބްރޭންޑްގެ ވެޖެޓަބަލް ކްރީމް ރާއްޖެއަށް އެތެރެ ނުކުރުމަށާއި ނުވިއްކުމަށާއި ބޭނުން ވެސް ނުކުރުމަށް އެމްއެފްޑީއޭއިން އަންގާފައި ވެއެވެ.
