މއ. އެމްޓޭޝަން ގޭގައި ރޭ ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު އާއިލާއަށް ވަގުތީ އެހީއެއްގެ ގޮތުގައި 7800 ރުފިޔާ ދީފިއެވެ.
ނޭޝަނަލް ޑިޒާޒްޓާ މެނޭޖްމެންޓް އޮތޯރިޓީ އެންޑީއެމްއޭ އިން ބުނީ، މި ހާދިސާގެ ސަބަބުން ވަގުތީ އެހީތެރިކަން ބޭނުންވި އާއިލާއަށް ރިލީފް އެހީގެ ގޮތުގައި 7800 ރުފިޔާ ހަމަޖައްސައިދީފައިވާ ކަމަށެވެ. އަދި މިއީ ވަގުތީ ބޯހިޔާވަހިކަމަށާއި ކެއިން ބުއިން އަދި އައްނައުނު ހޯދުންފަދަ ކަންކަމަށް ފޯރުކޮށްދިން އެހީކަމަށް އެންޑީއެމްއޭ އިން ބުނެއެވެ.
އެމްއެންޑީއެފުން ބުނީ، މައްޗަންގޯޅި އެމްޓޭޝަން ގޭގައި ރޭ އިރާކޮޅު 19:45 ހާއިރު އަލިފާން ރޯވެގެން އުޅޭކަމަށް ލިބުނު ރިޕޯޓާއި ގުޅިގެން އެވަގުތު އެތަނަށް ގޮސް ކުރި މަސައްކަތުން އަލިފާން 20:4 ހާއިރު ނިއްވާލެވިފައިވާކަމަށެވެ.
އަލިފާނުގެ ހާދިސާ ގައި ރޯވެފައި ވަނީ އެ ގޭގެ ކޮޓަރިއެއްގައި ހުރި ސޯފާ އާއި ގޮދަނޑީގެ އިތުރުން އަންނައުނުތަކެއްގައި ކަމަށް އެމްއެންޑީއެފުން ވަނީ ބުނެފައެވެ. ނަމަވެސް މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށްވެސް އެމްއެންޑީއެފުން ބުނެއެވެ.
