ރައްޔިތުންގެ މަޖިލީހުގެ މައިނޯރިޓީ ޕާޓީގެ ހައްސިއްޔަތު ޕީޕީއެމަށް ގެއްލިގެން ނުދާނެ ކަމުގެ ޔަގީންކަން މަޑުއްވަރީ ދާއިރާގެ މެމްބަރު އާދަމް ޝަރީފް ދެއްވައިފިއެވެ.
އާދަމް ޝަރީފް ވިދާޅުވީ މަޖިލީހުގެ މައިނޯރިޓީ ޕާޓީކަން ގެއްލިދާނެ ކަމަށް ގަބޫލު ނުކުރައްވާ ކަމަށެވެ. އަދި އެމްއެންޕީ އުފައްދަން އުޅުނަސް އެކަމާމެދު ކަންބޮޑުވުމެއް ނެތް ކަމަށެވެ. އޭނާ ވިދާޅުވީ މީގެ ކުރިން ޤައުމީ މަސްލަހަތުގައި މަސައްކަތް ނުކުރެއްވި ނަަމަވެސް ޕާޓީއެއް އުފެއްދެވުމުން ޤައުމީ މަސްލަހަތު އިސްކުރައްވަންޖެހޭނެކަމަށާއި، ކުރިއަށް އޮތް ތަނުގައި އެކަން ފެނިގެންދާނެކަމަށް އުންމީދު ކުރައްވަކަމަށެވެ.
މަޖިލިސްގައި ޕީޕީއެމް، ޕީއެންސީގެ 9 މެމްބަރުން ތިއްބަވާ. މިފިކުރު ގަބޫލުކުރާ މެމްބަރުންނަށް މަރުހަބާ ކިޔާން. އެމްއެންޕީ ގައި އިސްކޮށް އުޅުއްވާ މެމްބަރުން މީގެ ކުރިން ޤައުމީ މައްސަލަތަކުގައި، ރައްޔިތުންގެ ހައްގުގައި ވަކާލާތު ނުކުރެއްވިޔަސް، ޕަޓީ އުފެދިއްޖެނަމަ ވަކާލާތު ކުރައްވާނެކަމަށް އުންމީދުކުރަން.
– އާދަމް ޝަރީފް ވިދާޅުވިއެވެ.
އާދަމް ޝަރީފް މި ޔަގީންކަން ދެއްވާފައިވަނީ މަޖިލީހުގެ ބައެއް މެމްބަރުން ހިމެނޭ ގޮތަށް މޯލްޑިވްސް ނެޝަނަލް ޕާޓީ (އެމްއެންޕީ)ގެ ނަމުގައި އާ ޕާޓީއެއް އުފެއްދުމުގެ މަސައްކަތް ކުރިއަށް ދާތީއެވެ. ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ ހުންނަވައި އުފައްދާ މޯލްޑިވްސް ނެޝަނަލް ޕާޓީ (އެމްއެންޕީ)އާ މަޖިލީހުގެ ފަސް މެމްބަރުން ގުޅިފައިވާއިރު އިތުރު ދެ މެމްބަރަކު އެ ޕާޓީއާ ގުޅިއްޖެ ނަމަ އެމްއެންޕީ ވެގެން ދާނީ މަޖިލީހުގެ މައިނޯރިޓީ ޕާޓީއަށެވެ. ހަ މެމްބަރުންނާ އެކު މަޖިލީހުގައި މިހާރު މައިނޯރިޓީ ޕާޓީ އަކީ ޕީޕީއެމްއެވެ.
މިހާރު މަޖިލީހުގެ މައިނޯރިޓީ ލީޑަރަކީ ޕީޕީއެމްގެ ޕާލިމެންޓްރީ ގްރޫޕްގެ ލީޑަރު އަދި އޭދަފުށި ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) އެވެ. މެޖޯރިޓީ ލީޑަރަކީ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމްއެވެ.
