ކޯވިޑް-19 އާއި ގުޅިގެން ރާއްޖެއަށް އެތެރެކުރަން މަސައްކަތްކުރި ވެންޓިލޭޓަރުގެ މައްސަލާގައި، ހުރިހާ ބަދުނާމެއް އޭނާގެ ބޮލަށް ޖެހުމަށްފަހު މައްސަލަ ހިންދަމާލީތޯ ހެލްތު މިނިސްޓްރީގެ ކުރީގެ ނާއިބް ނިޝާމާ މުޙައްމަދު ފިނޭންސް މިނިސްޓަރ އިބްރާހިމް އަމީރު އާއި ސުވާލުކުރައްވައިފިއެވެ.

ރާއްޖޭގެ ހުރިހާ އެންމެންނަށް ބޭނުންވާ ވަރަށް ކޯވިޑް ވެކްސިން ލިބިފައިވާކަމަށާއި، ހުރިހާ ރައްޔިތުންވެސް ވެކްސިން ޖެއްސެވުމަށް އިލްތިމާސް ކުރައްވައި މިނިސްޓަރ އަމީރު ކުރެއްވި ޓްވީޓަށް ރައްދު ދެއްވަމުން ނިޝާމާ ވިދާޅުވީ ދަޢުލަތުގެ މުދަލާއި ފައިސާއަށް ރައްކާތެރިވުމަކީ ފިނޭންސް މިނިސްޓަރާއި، އެމްއެމްއޭގެ ގަވަރުގަރުގެ ޒިންމާއަކަށްވާއިރު، ވެންޓިލޭޓަރ އެގްރީމަންޓްގައި ސޮއި ނުކުރާކަން އެނގިހުރެ، ފައިސާ ދޫކުރައްވަން މުވައްޒަފުންނަށް އެންގެވީ ޤާނޫނީ ކޮން އުޞޫލަކުންތޯ ނިޝާމާ ވަނީ އަމީރު އާއި ސުވާލު ކުރައްވާފައެވެ.

އާދެ! ނަމަވެސް މަނިކުފާނާއި، ދައުލަތުގެ ޤަވަރުނަރގެ ޒިންމާއާއި މަސްއޫލިއްޔަތުގެ ތެރޭގައި ދަޢުލަތުގެ މުދަލާއި ފައިސާއަށް ރައްކާތެރިވުން ލާޒިމް ކުރާއިރު، ވެންޓިލޭޓަރ އެގްރީމަންޓްގައި ސޮއި ނުކުރާކަން އެނގިހުރެ، ފައިސާ ދޫކުރައްވަން މުވައްޒަފުންނަށް އެންގެވީ ޤާނޫނީ ކޮން އުޞޫލަކުންތޯ؟ ނިޝާމާ ވިދާޅުވިއެވެ.

ނިޝާމާ ވިދާޅުވީ މިކަމުގެ ސަބަބުން ވަޒީފާއިން ވަކިކޮށް، ލިބުނު ގެއްލުމުގެ ބަދަލު ހޯދައި ދިނުމަކީ އަމީރުއަށް ފަސޭހަކަމަށް ވެދާނެތޯކަމަށެވެ. އޭނާ ވަނި މިމައްސަލާގައި ފިނޭންސް މިނިސްޓްރީން އަމަލުކޮށްފަިއވާ ގޮތަށް ވަރަށް ބޮޑަށް ފާޑުވިދާޅުވެފައެވެ.

އެކަމުގެ ސަބަބުން ބިޑްކޮމިޓީގެ ޗެއަރގެ ބޮލުގަ ބަދުނާމުއަޅުވާ ވަޒީފާއިން ވަކިކުރެއްވުމުގެ ޖިނާއީ ބަދަލު ހޯދައި ދެވޭނެތޯ؟ ފިނޭންސް މިނިސްޓަރ ފައިސާ ދޫނުކުރުމަށް ފުރަތަމަ ނިންމި ނިންމުން 24 ގަޑިއިރު ނުވަނީސް ބަދަލުކުރެއްވީ ކޮންގޮތަކަށްތޯ؟ ލިޔުންތަކުން ފެންނަންހުރި މިކަންތައްތައް އޭސީސީ، ޕޮލިސް އަދި ރައްޔިތުންގެ މަޖިލިސްއަށް ފެނިވަޑައި ނުގަންނަވަނީތޯ؟ ދަޢުލަތަށް މިލިޔަނުން ލިބުނު ގެއްލުމުގެ ބަދުނާމު އަޅުގަނޑުގެ ބޮލުގައި އަޅުވާލައި ހިންދާލީމަ އެ ނިމުނީތޯ؟

– ނިޝާމާ ވިދާޅުވިއެވެ.

އިރާދަކުރެއްވީތީ, މިހާރު ރާއްޖެއަށް ވަނީ މުޅީ އާބާދީއަށް ޖެހޭނެ މިންވަރަށް ވެކްސިން ލިބިފަ. މި ފުރުސަތުގެ ބޭނުން ހިފައި, އަލުން އިގްތިސާދު ހިންގައިގަތުން ވަރަށް މުހިއްމު. އަޅުގަނޑުގެ އިލްތިމާސަކީ އެންމެ ބޭފުޅުންވެސް އަވަހަށް ލަސްނުކުރައްވާ ވެކްސިން ޖެއްސެވުން. https://t.co/uVTPSv0cLK

— Ibrahim Ameer (@iameeru) July 31, 2021

މިނިސްޓަރ އޮފް ހެލްތުގެ ނައިބުގެ މަގާމުން، ނިޝާމާ ވަކި ކުރައްވާފައިވަނީ ގިނަ ދުވަސްތަކެއް ވަންދެން ސަސްޕެންޝަނުގައި ބެހެއްޓުމަށްފަހު، މިއަހަރުގެ މޭމަހުގެ 4 ވަނަ ދުވަހުއެވެ. ވެންޓިލޭތަރުތަކުގެ ކޮރަޕްޝަންގެ މައްސަލާގައި ދައުވާކުރަން ފޮނުވުމަށް އޭސީސީން އަންނަނީ އިތުރަށް ދިރާސާ ކުރަމުންނެވެ. ދުބާއީގެ އެގްޒެކިއުޓާސްއާ ޙަވާލުކޮށްގެން ގެނައުމަށް މަސައްކަތްކުރި ވެންޓިލޭޓަރުތަކުގެ މައްސަލާގައި ސަރުކާރުގެ މިހާރުގެ ވިސްނުން ހުރީ އެފައިސާ އަނބުރާ ހޯދުންކަމަށާ، އެހެންކަމުން އެމައްސަލަ އާބިޓްރޭޝަނަށް ހުށަހެޅުމަށް މިހާރު ވަނީ އެއްބަސްވުން ބާތިލް ކުރުމުގެ ނޯޓިސް ފޮނުވާފައެވެ.