ޓެރަރިޒަމާއި ހައްދުފަހަނައެޅުމާއި ދެކޮޅަށް އެންމެ ހަރުދަނާ މަސައްކަތެއް ކުރެއްވީ ރައީސް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްކަމަށް އިދިކޮޅު ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވީ، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ އެމްޑީޕީ މެންބަރު ރޮޒައިނާ އާދަމް، ހަރުކަށި ފިކުރު ނައްތާލާ ކޮރަޕްޝަނުން ގައުމު ސަލާމަތް ކުރުމަށް ކުރީގެ ދެ ރައީސުން ކަމަށްވާ ރައީސް މުހައްމަދު ނަޝީދު އާއި ރައީސް އަބްދުﷲ ޔާމީނަށް އެކުގައި ކުރެވޭނީ ކޮން މަސައްކަތެއްތޯ ސުވާލުކުރެއްވުމުންނެވެ.
ރޮޒައިނާގެ އެވާހަކަތަކަށް ރައްދު ދެއްވަމުން ކުރީގެ ޑިފެންސް މިނިސްޓަރ އާދަމް ޝަރީފް ވިދާޅުވީ، ޓެރަރިޒަމާއި ހައްދުފަހަނައެޅުމާއި ދެކޮޅަށް އެންމެ ހަރުދަނާ މަސައްކަތެއް ކުރެއްވީ ރައީސް ޔާމީންކަމަށާއި، ޓެރަރިޒޒަމް މަނާކުރުމުގެ ޤާނޫނާއި، ނޭޝަނަލް ކައުންޓަރ ޓެރަރިޒަމް ސެންޓަރ އުފެއްދެވީވެސް ރައީސް ޔާމީންކަމަށެވެ.
ދެންވެސް ކަމެއް ކުރެވޭނީ ރައީސް ޔާމީންއަށް. ރައީސް ނަޝީދާއި ރައީސް ޞާލިޙް އެއްގަލަކަށް އަރުވައިގެންވެސް ހައްދުފަހަނައެޅުމާއި ދެކޮޅަށް ކޮންމެވެސް ކަމެއް ކުރެވޭތޯ ބައްލަވާ!
– އާދަމް ޝަރީފް ޢުމަރު
އާދަމް ޝަރީފް މިހެން ވިދާޅުވެފައިވާއިރު، އެމްޑީޕީގެ ތެރޭގައި އފެދިފައިވާ ޚިޔާލުތަފާތުވުންތަކުގެ ތެރެއިން، ރައީސް ޞާލިޙަށް ތާޢީދުކުރައްވާ ރޮޒައިނާ ވިދާޅުވީ، ރައީސް ޞާލިހާއެކު ހަރުކަށި ފިކުރާ ދެކޮޅަށް މަސައްކަތް ނުކުރެވިގެން ރައީސް ޔާމީނާއެކު ކުރެވޭނެ މަސައްކަތަކީ ކޮބައިތޯ ސުވާލު އުފެދޭ ކަަމަށެވެ. ކުރީ ސަރުކާރުގެ ދުވަސްވަރު ހަރުކަށި ފިކުރަށް ޖާގަ ދިނުމަށް އެތައް ކަމެއް ކޮށްފައިވާ ކަމަށްވެސް ރޮޒައިނާ ތުހުމަތުކުރައްވާފައިވެއެވެ.
އެމްޑީޕީގެ ތެރޭގައ އުފެދިފައިވާ ޚިޔާލުތަފާތުވުމުގެ ތެރެއިން ރައީސް ނަޝީދުވެސް ގެންދަވަނީ ރައީސް ޞާލިހާއި ސަރުކާރަށް ފާޑުވިދާޅުވަމުންނެވެ. ރައީސް ނަޝީދު ވަނީ، ރައީސް ޞާލިޙާއެކު ސިޔާސީ ގޮތުން ހުރެވެން ނެތް ކަމަށް ވިދާޅުވެފައެވެ. އަދި ރައީސް ޔާމީން އާއި ޕީޕީއެމް އިން މެދުމިނުގެ ދީނީ ސިޔާސަަތަށް ތާއީދު ކުރާނަމަ އެ ބޭފުޅުންގެ އެހީތެރިކަމަށް އެދިވަޑައިގަންނަވާނެ ކަމަށް ރައީސް ނަޝީދު ވިދާޅުވިއެވެ.
