ރާއްޖޭގެ 56 ވަނަ މިނިވަން ދުވަހުސް މިއަދު ފާހަގަ ކުރަމުންދާއިރު، ދިވެހި ޤައުމާއި ރައްޔިތުން ތިބީ ބޮޑު ބިރުވެރި ކަމެއްގައި ކަމަށް އިދިކޮޅު ޕީއެންސީގެ ނާއިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
ދިވެހިންގެ އުފާވެރި މިނިވަން ދުވަސް މިއަދު ފާހަގަކުރަމުންދާއިރު، ހުރި ކަންބޮޑުވުންތަކާއި ގުޅިގެން އާދަމް ޝަރީފް ވިދާޅުވީ ދިވެހި ފުލުހުން ހާމަކުރެއްވިު މައުލޫމާތުތަކުން ދިވެހި ރައްޔިތުން ތިބީ ފިތް ކަނޑައިގެންދާވަރުގެ ބިރުވެރިކަމެއްގައި ކަމަށެވެ. މިބިރުވެރިކަމުން ދިވެހި ޤައުމު ސަލާމާތް ކުރުމަށްޓައި ސަރުކާރުން ކުރާނެ މަސައްކަތެއް އަދި އެކަން ސަލާމާތް ކުރުމުގެ ޔަގީންކަމެއް ސަރުކާރަށް ނުދެވޭކަމީ ރައްޔިތުންނަށް އޮތް އެންމެ ބޮޑު ބިރުވެރިކަން ކަމުުގައި އާދަމް ޝަރީފް ވިދާޅުވިއެވެ.
މިނިވަން ދުވަސް އައިއިރު، މިތިބީ ބިރުވެރިކަމެއްގައި. ޕޮލިސް އަދި ޕީޖީ ޕްރެސްގައި ދެއްކި ވާހަތަކާއި ގުޅިގެން އުފެދުނު ބިރުވެރިކަން ބޮޑު. ރައްޔިތުންގެ ސަލާމަތާއި ރައްކާތެރިކަމަށްޓަކައި މަސައްކަތް ކުރައްވާނެ ކަމުގެ ޔަގީންކަމެއް ސަރުކާރުން ނުދެއްވާތީ ކަންބޮޑުވޭ.
– އާދަމް ޝަރީފް ވިދާޅުވިއެވެ.
ފުލުހުންނާއި، ޕީޖީ ހާމަކުރި މައުލޫމާތަށް ބަލައި ރައީސް ނަޝީދު ވަނީ އެމްޑީޕީގެ ޤައުމީ މަޖިލީހަށް ރާއްޖޭގައި ކުއްލި ހާލަތު އިއުލާން ކުރުމަށް ޤަރާރެއްވެސް ހުށަހަޅުއްވާފައެވެ. އަދި ރޭ ބޭއްވި ޤައުމީ މަޖިލިސް ބައްދަލުވުމުގައި ވަނީ ޤަރާރު ފާސްކޮށްފައެވެ.
ޤަރާރު ހުށަހައްޅުއްވަމުން ރައީސް ނަޝިދު ވިދާޅުވީ މިއީ ދިވެހި ފުލުހުންނަށް ހަރުކަށި ފިކުރު މީހުން ހައްޔަރު ކުރަން ޖާގަދޭންވީ ވަގުތުކަމަށެވެ. ދުނިޔޭގެ ކުރިއަރާފައިވާ ޑިމޮކްރަސީގައާއި، އަދި ހައްދު ފަހަނައަޅާ ދިޔަ ޤައުމުތަކުގައިވެސް ކަންކަން ބޮއްސުން ލައިގެން ގޮސްފައިވަނީ މިގޮތަށް ފެށޭ ކަންކަން ހުއްޓުމަށް އެކަށީގެންވާ މަސައްކަތް ނުކުރުންކަމަށެވެ. ނަމަވެސް މިއަދު ދިވެހި ރާއްޖެ އޮތް ހާލަތު ދިވެހި ފުލުހުންނަށް ސާފުވެ، ހަރުކަށި މީހުންނަކީ ކޮބައިކަން އެނގޭއިރު، އެމީހުން ހިފާ ހައްޔަރު ކުރުމަކީ ރާއްޖޭގެ މުސްތަގުބަލަށްޓަކައިވެސް ކުރަންޖެހޭ ކަމެއްކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިހާލަތުގައި، ހަރުކަށި ފިކުރާއި ދެކޮޅަށް އެކަށީގެންވާ މަސައްކަތް ނުކުރެވިއްޖެނަމަ، ހީވެސް ނުކުރާ ހާލަތަކަށް ރާއްޖެ ގޮސްދާނެކަމަށެވެ. އަދި ކުރިއަށް އޮތް ތަނުގައި ރާއްޖޭގެ މުސްތަގުބަލަށް މިކަމުން ނޭދޭވޭ ބޮޑެތި އަސަރުތައް ކުރާނެކަމަށް ރައީސް ނަޝީދު ވިދާޅުވިއެވެ.
ފުލުުންގެ ޕްރެސްގައި ދެއްކެވި ވާހަކަތަކަށް އިޝާރާތް ކުރައްވައި ރައީސް ނަޝީދު ވިދާޅުވީ ދިވެހި ފުލުހުންނަށް ރާއްޖޭގައި އޮތް ހަރުކަށި ފިކުރު ނައްތާލުމަކީ ކުރެވޭނެކަމެއްކަމަށް ގަބޫލު ކުރައްވާކަމަށެވެ. އަދި ދިވެހި ފުލުހުންނަށް ބޭނުންވަނީ އެކަމަށް ކުޑަ ވަގުތުކޮޅެއްކަމަށާއި، މިއީ އެވަގުތު ކަމަށް ރައީސް ނަޝީދު ވިދާޅުވިއެވެ.
މިއީ ރައީސް ނަޝީދަށް ދިން ހަމަލާއަށްފަހު އެމަނިކުފާނު އެމްޑީޕީގެ ޤައުމީ މަޖިލީހުގެ ޖަލްސާއެއްގައި ބައިވެރިވި ފުރަތަމަ ފަހަރެވެ. މިބައްދަލުވުމުގައި ރައީސް ނަޝީދު ވާހަކަ ދެއްކެވިއިރު، އެމަނިކުފާނުގެ މޫނުމަތިން ފެނިގެން ގޮސްފައިވަނީ ވަރަށް ހަމަޖެހިލައިގެން އިދެ މެމްބަރުންނާއި މުޚާތަބު ކުރެއްވިތަނެވެ. ރައީސް ނަޝީދުވަނީ މިޤަރާރު ޕާޓީން ފާސްކޮށް، ސަރުކާރަށް ހުށަހެޅުމަކީ މިވަތު ކޮންމެހެން މުހިންމުކަމެއްކަމަށެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ނަޝީދަށް އަމާޒުކޮށް ދިން ހަމަލާގެ މަޤްސަދެއްގެ ގޮތުގައި މިހާތަނަށް ހޯދިފައި ވަނީ މާލީ މަންފާއަކަށްވުރެ، ނަޝީދަކީ މަރާލަން ޖެހޭ މީހެއްކަމަށް އަމިއްލައަށް ނެރުނު ހުކުމްތަކާއި ފަތުވާތަކުގެ އެހީގައި ލޭ ހުއްދަކޮށް، ދީނީ ހަރުކަށި ފިކުރުގެ މީހުން ހިންގި އަމަލެއް ކަން ކަމަށެވެ.
