މިދިޔަ މެއި މަހުގެ ހަވަނަ ދުވަހު އެމަނިކުފާނު އަވަހާރަކޮށްލަން ބޮމުގެ ހަމަލާ ދީފައިވަނީ އިސްލާމީ ހަރުކަށީ ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) އާ ގުޅުުން އޮތް ބައެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ތުހުމަތު ކުރައްވައިފިއެވެ.
އެމަނިކުފާނު މިހެން ވިދާޅުވީ ހަމަލާއަށްފަހު ދެއްވި ފުރަތަމަ ޓީވީ އިންޓަވިއު، އިންޑިއާގެ ވިއޯން ޓީވީގައި ވާހަކަ ދައްކަވަމުންނެވެ. ރައީސް ނަޝީދު ވިދާޅުވީ ހައްޔަރުކޮށްފައިވާ މީހުންނަކީ ދީނީ ގޮތުން ހަރުކަށި ފިކުރުގެ ބައެއް ކަމަށާއި އަދި އެމީހުންނަކީ އައިއެސް އާއި ގުޅުން އޮންނަ ބައެއް ކަމަށެވެ.
މަނިކުފާނު ވިދާޅުވީ ރިމޯޓެއް ބޭނުންކޮށްގެން މީގެ ކުރިން އެފަދަ ހަމަލާއެއް ރާއްޖޭގައި ދީފައި ނުވާ ކަމަށެވެ. ނަމަވެސް އައިއެސް ޖަމާއަތުން މީގެ ކުރިން ވެސް ރާއްޖޭގައި ނުރައްކާތެރި ހަމަލާތަކެއް ދީފައިވާ ކަމަށެވެ. އެގޮތުން އެފަދަ ހަމަލާތަކުގައި ތިން މީހަކު މަރާލައިފައިވާ ކަމަށް ވިދާޅުވި އެވެ.
ރައީސް ނަޝީދު ވިދާޅުވީ ރާއްޖެއިން މީހުން ސީރިއާ އާއި އެހެނިހެން ހަނގުރާމަވެރި ގައުމުތަކަށް ޖިހާދަށް ދާކަމަށާއި ނަމަވެސް ގިނަ ދިވެހިންނަކީ މިނިވަން ހިޔާލުގެ މީހުން ކަމަށެވެ. އެގޮތުން 2008 ވަނަ އަހަރު ގާނޫނު އަސާސީ ތަސްދީގުކުރި ފަހުން ބޭއްވުނު ހުރިހާ އިންތިހާބެއްގެ ނަތީޖާތަކުން ވެސް ފެންނަން އޮތީ ރާއްޖެއަކީ މިނިވަން އަދި ހަރުކަށި ފިކުރަށް ޖާގަ ދޭނެ ގައުމެއް ނޫން ކަމަށެވެ. ހަރުކަށި ފިކުރުގެ އެއްވެސް މީހަކު އެއްވެސް އިންތިހާބެއް ރާއްޖޭގައި ކާމިޔާބުކޮށްފައި ނުވާކަން ވެސް ވަނީ ފާހަގަކުރައްވާފަ އެވެ.
ހަމަލާގައި ޝާމިލްވާ މީހުންނަކީ އައިއެސްއާ ގުޅުމެއް އޮތް ކަމަށް ނަޝީދު ތިލަކުރެއްވި ވާހަކަތަކަކީ މީގެ ކުރިން އެއްވެސް އިދާރާއަކުން ހާމަކޮށްފައިވާ މައުލޫމާތުތަކެއް ނޫނެވެ. ފުލުހުން ހަމައެކަނި ވިދާޅުވެފައިވާ ގޮތުން އެ އެންމެންނަކީ ހަރުކަށި ފިކުރުގެ ވިސްނުމުގެ މީހުންނެވެ. އެ މީހުން ގުޅެނީ ކޮން ޖަމާއަތަކަށްތޯ މީގެ ނޫސްވެރިން ސުވާލުކުރުމުން ވެސް ފުލުހުން އެކަށީގެންވާ ޖަވާބެއް ނުދެއެވެ.
މައްސަލަ ފުލުހުން ތަހުގީގު ކުރަމުންދާއިރު މަޖިލީހުގެ ގައުމީ ސަލާމަތާއި ހިދުމަތްތަކާއި ބެހޭ ކޮމިޓީ (241) އިން ވަނީ ބޮންގޮއްވުމުގެ ހާދިސާއާ ގުޅިގެން އިންކުއަރީ ރިޕޯޓެއް ތައްޔާރުކޮށްފައެވެ.
ނަޝީދު އަވަހާރަކޮށްލަން ބޮމެއް ގޮއްވާލި މައްސަލައިގައި ނުވަ މީހަކު ހައްޔަރުކުރިއެވެ. އޭގެތެރޭގައި އެކަމުގައި އަމަލީ ގޮތުން އުޅުނު ކަމަށް ތުހުމަތުކުރެވެނީ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ދަރަވަންދޫއިން އިން ހައްޔަރުކުރި ލ.ގަން، ދުންފިނި އުފާ، އަހުމަދު ފާތިހު، 23، ނ. މަނަދޫ، ނޫރީގެ، އަލީ ހައިޝަމްއެވެ.
