އިރާގުގެ ވެރިރަށް ބަޢުދާދުގެ ބައިބޯ މާރުކޭޓެއްގައި އަމިއްލައަށް ޖާނުން ފިދާވެގެން ދިން ބޮމުގެ ހަމަކާއެއްގައި 35 މީހަކު މަރާލާއިފިއެވެ.
މިހަމަލާގައި މަރުވި މީހުންގެ ހަށިތައް މާރުކޭޓުގެ އެކި ހިސާބުތަކަށް ބުރައިގެން ގޮސްފައިވާއިރު، ބޮން ގޮއްވާލާފައިވަނީ، ހައްޖުގެ އަޅުކަމަށްފަހު އަންނަ އަޟުހާ އީދުގެ މުނާސަބަތަށް ތައްޔާރުވުމަށް، ބާޒާރުކުރުމަށް މި މާރުކޭޓަށް މީހުން އެއްވެ ފުރިބާރު ވެފައި ވަނިކޮށެވެ.
އިރާގުގެ ފުލުހުން މައުލޫމާދު ދީފައިވާ ގޮތުގައި މި ހަމަލާގައި 60 މީހަކަށް ވަނީ އަނިޔާވެފައެވެ. އަދި ހަމަލާގައި މަރުވީ މީހުންގެ ތެރޭގައި ކުޑަކުދިންނާއި އަންހެނުންވެސް ހިމެނޭއިރު، ގޮއްވާލި ބޮމުގެ ވަރުގަދަ ކަމުން، ހަމަލާދިން ހިސާބުގައިވާ އެތަކެއް ފިހާރައެއް އަދާ ހުލިވެފައިވާ ކަމަށްވެސް މީޑީއާތަކުން ރިޕޯޓު ކޮށްފައިވެއެވެ.
އިރާގުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، މިހަމަލާ ދީފައިވަނީ، ސަދަރު ސިޓީގައި އޮންނަ ވަހައިލަޓް މާރުކޭޓުގައި ކަމަށެވެ.
"މި ހަމަލާ ދީފައިވަނީ، އަމިއްލައަށް ހަދާފައިވާ އައިއީޑީއެއް ބޭނުން ކޮށްގެން،" އިރާގުގެ އިންޓީރިއަރ މިނިސްޓްރީން ނެރުނު ބަޔާނެއްގައި ބުނެފައިވެއެވެ. ހަމަލާއަށްފަހު ސޯޝަލް މީޑީއާގައި އާންމުވެގެން ގޮސްފައިވާ ވީޑިއޯތަކުން ފެންނަ ގޮތުގައި، ލެއިން ތަތްތެޅިފައިވާ މީހުންނާއި އަދި އަނިޔާވެފައިވާ މީހުންގެ ހަޅޭކުގެ އަޑުތަކުންވެސްވަނީ މުޅި ސަރަހައްދު ގުގުމާލާފައެވެ.
ޓެރަރިސްޓް ޖަމާއަތެއް ކަމުގައިވާ އައިސިސް ޖަމާއަތުން އެ ޖަމާއަތުގެ ޓެލެގްރާމް ޗެނަލްގައި ޕޯސްޓުކޮށްފައިވާ މެސެޖެއްގައިވަނީ މިހަމަލާގެ ޒިންމާ އުފުލާފައެވެ. އެ ޖަމާއަތުން ބުނެފައިވަނީ، ހަށިގަޑުގައި ހަރުކޮށްފައިވާ ގޮވާތަކެތި ގޮއްވާލާފައިވަނީ އެ ޖަމާއަތުގެ ހަގުރާމަވެރި އެކެވެ.
އިރާގުގެ ރައީސް ބަރުހާމް ސާލިހު ވަނީ، މިއީ އިނިޔާވެރި ޖަރީމާއެއްކަމުގައި ވިދާޅުވެ. ހަމަލާގެ ޝިކާރައަކަށް ވެގެންދިޔަ އާއިލާތަކަށް ތައުޒިޔާ ފޮނުވާފައެވެ.
