އެމްޑީޕީއަށް ބޭނުންވަނީ ނަފްރަތު ބިލާއި އެއްކޮޅު، މިއުޒިކް ހަރާމް ނުކުރާ އިއްތިހާދެއް ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީން މިހާރު ބޭނުންވާ ކޯލިޝަންގެ ޝަރުތުތައް ހާމަކުރައްވައި ރައީސް ނަޝީދު ވިދާޅުވީ މިހާލަތަކީ އެމްޑީޕީ މިހާރު އޮތް އިއްތިހާދުން ބޭރުގެ މުޅިން އާއި އިއްތިހާދެއް ބޭނުންވެފައިވާ ވަގުތުކަމަށެވެ. އެއިއްތިހާދަކީ އިންޑިއާ އައުޓް ނުގޮވާ، ނަފްރަތު ބިލަށް ތާއީދުކުރާ، މިއުޒިކް ހަރާމް ނުކުރާ، ކީރިތި ރަސޫލާއަށާއި، އިސްލާމް ދީނަށް ފުރައްސާރަ ނުކުރާ އިއްތިހާދަކަށް ވާންޖެހޭ ކަމުގައި ރައީސް ނަޝީދު ވިދާޅުވިއެވެ.
އަޅުގަނޑުގެ ހަމަ އެކަނި ވިސްނުމަކީ ރާއްޖެ ސަލާމަތް ކުރުން. އަޅުގަނޑު ދެކޭ ގޮތުގައި އެމްޑީޕީ އަށް އައު އިއްތިހާދެއް ބޭނުން. އެއީ އިންޑިއާ އައުޓް ނުގޮވާ، ނަފްރަތު ބިލަށް ތާއީދުކުރާ، މިއުޒިކް ހަރާމް ނުކުރާ، ކީރިތި ރަސޫލާއަށާއި، އިސްލާމް ދީނަށް ފުރައްސާރަ ނުކުރާ އިއްތިހާދެއް. އަޅުގަނޑު ދެކޭ ގޮތުގައި ޕީޕީއެމްއާއި އެމްޑީޕީގެ ގިނަ މީހުން ތިބޭނީ އެގޮތަށް. ރާއްޖެ އަފްޣާނިސްތާން ގެ ހާލަތަށް ދަން ގިނަ ދިވެހިން ބޭނުމެއް ނުވާނެ.
– ނަޝީދު ވިދާޅުވިއެވެ.
ރައީސް ނަޝީދު ވަނީ މިހާރު އެމްޑީޕީގެ އިއްތިހާދު ކަމުނުދާކަމަށާއި، މިހާރު އޮތް ސަރުކަރު ކޯލިޝަނަށް ތާއީދު ނުކުރާކަމަށް އިއްޔެ ވިދާޅުވެފައެވެ. އެމްޑީޕީގެ ގިނަ އަދަދެއްގެ މެމްބަރުން ތިބޭ އަދި އާންމު ބައެއް މީހުންގެވެސް ތިބޭ ” ޖަޒީރާ” ވަޓްސް އަޕް ގްރޫޕުގައި ރައީސް ނަޝީދު ވަނީ ރާއްޖޭގެ ހަރުކަށި ފިކުރު އޮތް މިންވަރާއި ގުޅޭގޮތުން ވަރަށް ތަފްސީލީ ގޮތެއްގައި ވާހަކަ ދައްކަވާފައެވެ. އަދި މިކަމުގައި އެމަނިކުފާނުގެ ކަންބޮޑުވުން އޮތްމިންވަރު ވަނީ ހިއްސާ ކުރައްވާފައެވެ. ރައީސް ނަޝީދު ވިދާޅުވީ މިހާރު އޮތް ވެރިކަން ހިންގާ ކޯލިޝަނާއިއެކު ކުރިއަށް ދިއުމަށް ނޭދޭކަމަށެވެ. އަދި ރައީސް ޞާލިހުއާއިއެކު ސިޔާސީ އެއްވެސް މަސައްކަތެއް ކުރުމަށް ދެން ނުހުރެވޭނެކަމަށް ރައީސް ނަޝީދު ވިދާޅުވިއެވެ.
އަޅުގަނޑާއި މިހާރު ރައީސުލްޖުމްހޫރިއްޔާއާއި، ފިކުރީ ގޮތުން ޚިޔާލު ތަފާތު. އަޅުގަނޑު މެންގެ ޒާތީ ކަންތައްތަކުގައި އަބަދުވެސް އުޅޭނީ އެކުގައި. އަޅުގަނޑުގެ ދަރިންގެ އިބޫ ދޮންބެ އެއްކަމަކު، އެކަމަކު ދެން ރައީސުލްޖުމްހޫރިއްޔާއާއި އެކީ ސިޔާސީ ގޮތުން ހުރެވޭކަށް ނެތް.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އިތުރަށް ދެން ކުރަންޖެހޭ އެއްވެސްކަމެއް ނެތްކަމަށެވެ. ވެރިކަންވެސް ކުރެވިއްޖެ ކަމަށާއި، އަދި އެނޫންކަންވެސް ކުރެވިފައިވާކަމަށެވެ. ނަމަވެސް މިހާރު މަސައްކަތް ކުރައްވަނީ ޤައުމު ދަރިންނާއި ހަމައަށް ހެޔޮ ގޮތުގައި ވާސިލް ކުރުމުގެމަސައްކަތް ކުރުމަށް ކަމަށް ރައީސް ނަޝީދު ވިދާޅުވިއެވެ.
އަހަރެމެންގެ ރާއްޖެ އަހަރެމެންގެ ދަރިންނަށް ދޭންޖެހޭނެ. ވެރިކަން ބޭނުމެއްނޫން. އެކަނަވެސް ކުރެވިއްޖެ. ނުކުރެވޭ އެއްކަމެއްވެސް ނެތް. ރައީސުލްޖުމްހޫރިއްޔާވެސް އެހުރީ ތާށިވެފަ.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ ގިނަ ބަޔަކު ތިބޭ މި ގްރޫޕުގައި ރައީސް ޞާލިހާއި އެމްޑީޕީގެ ބައެއް ބޭފުޅުންނަށް އަމާޒުކޮށްވެސް އެކި ވާހަތައް ދައްކަވާފައެވެ. އަދި މިކަމުގައި އެމްޑީޕީގެ ބައެއް މެމްބަރުން ކިތަންމެ ހިތްހަމަ ނުޖެހުނަސް ސިޔާސީ ގޮތުން ރައީސް ޞާލިހުއާއިއެކު ދެން ކުރިއަށް ނުދެވޭނެކަމަށް ރައީސް ނަޝީދު ވިދާޅުވިއެވެ. ނަމަވެސް ޒާތީ ދިރިއުޅުމުގައި ގާތްކަން އޮންނާނެކަމަށް ރައީސް ނަޝީދު ވިދާޅުވިއެވެ.
