ރައްޔިތުންގެ މަޖިލީހުގެ ކޮމިޓީތަކަށާއި، ޚާއްސަކޮށް، ސަލާމަތީ ޚިދުމަތްތަކާއި ބެހޭ ކޮމިޓީއަށް ޖަވާބުދާރީ ނުކުރެވޭ މީހަކު ނުހުންނާނެކަމަށާއި، އެކަމަށް އެއްވެސް މީހަކަށް ހުރަސް ނޭޅުއްވޭނެކަމަށް މަޖިލިސް ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތުގެ އިންކުއަރީ ރިޕޯޓު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އެރުވުމުގެ ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވީ ރައްޔިތުންގެ މަޖިލީހަކީ ރާއްޖޭގެ އެންމެ ދުވަސްވީ އިދާރާކަމަށެވެ. އަދި މަޖިލީހަށްވުރެ ތަޖުރިބާ ލިބިފައިވާ، ތަޖުރިބާ ހުރި މުއައްސަސާއެއް ރާއްޖޭގައި ނުހުންނާނެކަމަށެވެ.
ރައީސް ނަޝީދަށް ދިން ހަމަލާއާއި ގުޅިގެން އެކުލަވާލީ އިންކުއަަށް ވަކިވަކި ސިފައިން ހާޒިރު ކުރުމަށް ދެކޮޅު ހެއްދެވި ހެއްދެވުމަށް އިޝާރާތް ކުރައްވަމުން ރައީސް ނަޝީދު ވިދާޅުވީ މަޖިލިސް ކޮމިޓީއަށް ހާޒިރު ނުކުރެވޭ މީހަކު ނުހުންނާނެކަމަށެވެ. މަޖިލިސް ގަވާއިދު ވަރަށް ފުޅާކޮށް މީހުން ހާޒިރު ކުރުމަށް ތަންދޭއިރު އެކަމަށް އެއްވެސް މީހަކު ހުރަސް އަޅައިގެން ނުވާނެކަމަށެވެ.
ކޮމެޓީއަށް ޖަވާބުދާރީ ވާންޖެހޭނީ ކޮމިެޓީން ބޭނުންވާ ގޮތަށް. ވަކި މީހަކަށް އޭގެ ތެރެއަށް ނުވަދެވޭނެ، ރައީސުލްޖުމްހޫރިއްޔާވެސް، އުއްތަމަ ފަނޑިޔާރުވެސް ރިޕޯޓާއިމެދު އަވަސް ފިޔަވަޅު އަޅުއްވާނެކަމަށް ދެކެން.
– ނަޝީދު ވިދާޅުވިއެވެ.
ވަކިވަކި ސިފައިން މަޖިލީހުގެ ކޮމިޓީތަކަށް ޖަވާބުދާރީ ނުވަނީ ޤާނޫނު ޖާގަނުދޭތީ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ މީގެ ކުރިން ވިދާޅުވެފައެވެ.
އެމްއެންޑީއެފްއިން ވަކިވަކި ސިފައިން ގެންދިއުމާއި ބެހޭގޮތުން ނެރެފައިވާ ބަޔާނަކީ އެމްއެންޑީއެފްގެ ޤާނޫނާއި ހަވާލާދީ ނެރެފައިވާ ބަޔާނެއް. އެހެން ވީމާ އެބޭފުޅުން ނެރުއްވާފައިވާ ބަޔާނާއި އެކީގައި، ކޮމިޓީއަށް އެއްބާރުލުން ދެއްވާކަމަަށް، މުޤައްރިރުވަނީ ވިދާޅުވެފަ. އަދި ރައީސް ނަޝީދަށް އެގިވަޑައިގަންނަވާނެ އަޅުގަނޑު އެޔަކަށް ހުރަސް ނާޅުއްވާނެކަންވެސް. އެމަނިކުފާނު އެހެން ވިދާޅުވެފައި ވީނަމަވެސް.
– ރައީސް ވިދާޅުވިއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދިން ޙަމަލާއާ ގުޅޭ ގޮތުން މަޖިލީހުން ހިންގާ ޕާލިމެންޓަރީ އިންކުއަރީއަށް ސަރުކާރުން ހުރަސް އަޅާކަމަށް ކުރެވޭ ތުހުމަތުތަކާއި ގުޅޭގޮތުން ނޫސްވެރިޔަކު ކުރި ސުވާލަށް ޖަވާބުދެއްވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ އިންކުއަރީ ކުރިއަށްދަނީ އެއްވެސް ފަރާތެއްގެ ނުފޫޒެއް ނެތިކަން 241 ކޮމިޓީގެ މުޤައްރިރުގެ ޔަގީންކޮށްދެއްވާފައިވާކަމަށެވެ. އަދި ސަރުކާރުން އެއްބާރުލުން ލިބެމުންދާކަންވެސް ކޮމިޓީން ހާމަކޮށްފައިވާކަމަށް ރައީސް ވަނީ އޭރު ފާހަގަކުރައްވާފައެވެ.
