ކާނަލް ނާޒިމް ސިޔާސީ ޕާޓީއެއް އުފައްދަވަނީ

ކުރީގެ ޑިފެންސް މިނިސްޓަރ، އަދި މިހާރުގެ ދަގެތީ ދާއިރާގެ މެމްބަރު މުޙައްމަދު ނާޒިމް ސިޔާސީ ޕާޓީއެއް އުފައްދަވަން ނިންމަވައިފި އެވެ.

ނާޒިމްގެ ގާތް ބައެއް ފަރާތްތަކުން މައުލޫމާތު ދޭގޮތުގައި، މިހާރުގެ ރައްޔިތުންގެ މަޖިލީހުގެ ދަގެތީ ދާއިރާގެ މެމްބަރުކަންވެސް ކުރައްވަމުން ގެންދަވާ، ކުރީގެ ޑިފެންސް މިނިސްޓަރ ކާނަލް ނާޒިމް ސިޔާސީ ޕާޓީއެއް އުފައްދަވަނީ، ރައްޔިތުންގެ މަޖިލީހުގެ މިހާރުގެ ބައެއް މެމްބަރުންގެވެސް ތާއީދާއެކީއެވެ. މިގޮތުން ޕާޓީ ރަސްމީކޮށް ރަޖިސްޓްރީ ކުރެވިގެން ދާއިރު، އެޕާޓީގެ މެމްބަރުރުންގެ ގޮތުގައި ރައްޔިތުންގެ މަޖިލީހުގެ ބައެއް މެމްބަރުން ތިއްބަވާނެ ކަމަށްވެސް މައުލޫމާތު ލިބިފައި ވެއެވެ. މީގެތެރޭގައި، ރައްޔިތުންގެ މަޖިލިހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ހިމެނިވަޑައިގަންނަވާކަން، އިތުބާރުހުރި ގޮތެއްގައި ޚަބަރު އޮންލައިނަށް ޔަގީން ކުރެވިފައި ވެއެވެ.

ނާޒިމް އާ ސިޔާސީ ޕާޓީއެއް އުފައްދަވަން ނިންމަވާފައިވާއިރު، އޭނާ މީގެކުރިން ހުންނެވީ ޖުމްހޫރީ ޕާޓީގެ ލީޑަރ ގާސިމް އިބުރާހިމްގެ އެޑްވައިޒަރެއްގެ ގޮތުގައެވެ. އެހެންނަމަވެސް 2019ވަނަ އަހަރުގެ ނޮވެމްބަރުމަހު އޭނާވަނީ ގާސިމް އިބްރާހިމްގެ އެޑަވައިޒަރުކަމުގެ މަގާމުން އިސްތިއުފާ ދެއްވާފައެވެ.

އޭރު ނާޒިމް ބައެއް މީޑިއާތަކަށް ވިދާޅުވެފައިވަނީ، މި ސަރުކާރު ވެރިކަމަށް އައުމުގައި އެންމެ ބޮޑު ހިއްސާއެއްވެސްވި، ޖުމުހޫރީ ޕާޓީގެ މިސްރާބު ހުރިގޮތުން، ޕާޓީއާއިމެދު ބޮޑެތި ކަންބޮޑުވުންތަކެއް ހުރި ކަމުގައެވެ. އަދި ޖުމްހޫރީ ޕާޓީގެ ލީޑަރުގެ އެޑްވައިޒަރުކަމުން އިސްތިއުފާ ދެއްވި މައިގަނޑު ސަބަބަކީ އެއީކަމަށާއި، އެސަބަބާހުރެ ޕާޓީގެ މަސައްކަތުގައި އުޅުއްވަން ދަތި ކަމުގައިވެސް ނާޒިމް ވިދާޅުވިއެވެ.

މީގެއިތުރުންވެސް ޖުމުހޫރީ ޕާޓީގެ އިސް ސަފުގައި އުޅުއްވި ގިނަ މެމްބަރުތަކެއް ފަހަކަށް އައިސް ވަނީ ޕާޓީގެ މަސައްކަތްތަކުން ގެއްލިގަފައެވެ. މީގެތެރޭގައި ޖުމުހޫރީ ޕާޓީގެ ލީޑަރޝިޕްގައި މަސައްކަތް ކުރައްވަމުން ވަޑައިގެން، ތިމަފުށީ ދާއިރާގެ މެމްބަރު އަބްދުﷲ ރިޔާޒުވެސް ހިމެނިވަޑައިގަންނަވައެވެ.

ކާނަލް ނާޒިން އިސްވެ ހުންނަވާ އުފައްދަވާ ސިޔާސީ ޕާޓީ ވުޖޫދަށް އައުމުން އެ ޕާޓީ ވެގެންދާނީ ރާއްޖޭގައި މިހާރު ހިންގަމުންދާ 11 ވަނަ ސިޔާސީ ޕާޓީއަށެވެ.

މިގޮތުން އިލެކްޝަންސް ކޮމިޝަންގެ ދަފްތަރުގައި މިހާރުވެސް 10 ސިޔާސީ ޕާޓީއެއް ރަޖިސްޓްރީ ކުރެވިފައި އެބައެވެ. މީގެތެރޭގައި، އެންމެ ފަހުން ރަޖިސްޓްރީ ކުރެވުނު، ރައީސް މައުމޫންގެ އެމްއާރުއެމް އާއި، އޭގެ ކުރިން ރަޖިސްޓްރީ ކުރެވުނު، ކުރީގެ ނާއިބުރައީސް އަހުމަދު އަދީބުގެ ތާރޑްވޭ ޑިމޮކްރަޓިކް ޕާޓީވެސް ހިމެއެވެ. މީގެ ކުރިން ރާއްޖޭގައި އުފެދުނު ބައެއް ޕާޓީތަށް މިހާތަނަށް އައި އިރު އުވިފައި ވެސް ވެއެވެ.

ސިފައިންގެ ޚިދުމަތުގައި ގިނަ ދުވަސްތަކެއް ވަންދެން ޚިދުމަތްކުރެއްވި ކާނަލް ނާޒިމްވަނީ ކުރިން ޕީޕީއެމްގައިވެސް އުޅުއްވާފައެވެ. އަދި އެއަށްފަހު ރައީސް ޔާމިންގެ ވެރިކަމުގައި ޑިފެންސް މިނިސްޓަރު ކަމުގައި ހުންނަވަނިކޮށް، ގެއިން ފިސްތޯލައެއް ފެނި، އޭނާގެ މައްޗަށް ދައުވާކުރެވި ޖަލަށްވެސް ލެވުނެވެ. ނާޒިމް ޖަލުން މިނިވަން ކުރެވުނީ، ރައީސް އިބުރާހިމް މުހައްމަދު ސާލިހު، 2018ވަނަ އަހަރު ރިޔާސީ އިންތިޚާބު ކާމިޔާބު ކުރައްވުމާއި ގުޅިގެން، އޭރު ބޮޑެތި ހުކުމްތައް ކުރެވި ޖަލަށް ލެވިފައިވާ ސިޔާސީ ކުއްވެރިންގެ ހުކުމްތައް ސުޕްރީމް ކޯޓުން އަލުން މުރާޖައާކޮށް އެހުކުމްތައް ބާތިލް ކުރުމާއި ގުޅިގެންނެވެ.

ނާޒިމްވަނީ ރައީސް ޔާމިންގެ ވެރިކަމުގައި ޑިފެންސް މިނިސްޓަރ ކަމާއި، ހެލްތު މިނިސްޓަރުކަންވެސް ކުރައްވާފައެވެ.