މަޖިލީހުގައި އޮތް "ނަފްރަތު" ބިލުގައި ރައްޔިތުންގެ ގިނަ ކަންބޮޑުވުންތަކެއް ހުރުމުން، ރައްޔިތުންގެ ކަންބޮޑުވުން އިސްލާހު ކުރަން މަސައްކަތް ކުރާމީހާއަކީ އަސްލު ގަޓު ހުރި މީހާ ކަމުގައި ރައްޔިތުންގެ މަޖިލީހުގެ ދުވާފަރު ދާއިރާގެ އެމްޑީޕީ މެމްބަރު އިސްމާއިލް އަހުމަދު ވިދާޅުވެއްޖެއެވެ.

އިސްމާއިލް މިފަދަ ގޮތަކަށް ވިދާޅުވެފައިވަނީ އެމްޑީޕީގެ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާ އެކަށީގެންވާ ގޮތަށް ތަހުގީގް ކުރެވިފައި ނުވާތީ ކެބިނެޓް އުވާލައި، ރައީސުލްޖުމްހޫރިއްޔާ އިބްރާހިމް މުހައްމަދު ޞަލިހު މަޤާމުން އިސްތިއުފާ ދެއްވުމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ގޮވާލެއްވުމާއި ގުޅިގެންނެވެ.

ބޮންޑޭ ރައީސް ޞާލިހުގެ އިސްތިއުފާއަށް ގޮވާފައިވަނީ މަޖިލީހުގައި އިއްޔެ ބަހުސް ކުރެވުނު ނަފްރަތު ބިލަށް ވާހަކަ ދައްކަވަމުންނެވެ. ބޮންޑޭގެ ވާހަތަކަށް ރައްދު ދެއްވައި އިސްމާއިލް ވިދާޅުވީ މަޖިލީހަށް ހުށަހަޅާފައިވާ ބިލަކާއިމެދު ރައްޔިތުންގެ ކަންބޮޑުވުން އެކަންބޮޑުވުން ހައްލު ކުރުމަށް މަސައްކަތް ކުރުމަކީ މީހާ ގައިގައި ގަޑު ނެތްކަމެއްކަމަށް ނުވާނެކަމަށެވެ. ރައްޔިތުންގެ އަޑު އަހައި ރައްޔިތުން ބޭނުންވާ ގޮތަށް ކަންކަން ނުވާ މީހަކީ މާބޮޑަށްވެސް ބަލި މީހެއްކަމަށް އިސްމާއިލް ވިދާޅުވިއެވެ.

ރައްޔިތުން އުފުލަމުން ގެންދާއަޑަށް އިޙްތިރާމްކޮށް، ރައްޔިތުންގެ ވިންދާ އެއްގޮތަށް ޢަމަލުހިފާ މީހާ ފިނޑިއަކަށްހަދައި އަދި އެބަދަލު ގެންނާން މަސައްކަތް ކުރާފަރާތް އިސްތިއުފާއަށް ގޮވުމަކީ ގަދަމީހުންކުރާ ޒާތުގެ ކަމެއްކަމަށް ދެކެން ދަތި! އަސްލު ގަޓް މީހާ ރައްޔިތުންގެ އަޑު އަހާނެ.

– އިސްމާއިލް ވިދާޅުވިއެވެ.

ސަރުކާރުގެ ފަރާތުން މަޖިލީހަށް ހުށަހެޅި ނަފްރަތު ބިލަށް މިއަދު ކުރި ހޫނު ބަސްގައި ސަރުކާރަށް ގިނަ ހަމަލާތަކެއް ބޮންޑޭވަނީ ދެއްވާފައެވެ. ބޮންޑޭ ވިދާޅުވީ މިބިލަކީ ރައީސް ނަޝީދަށް ދިން ޓެރަރިސްޓް ހަމަލާ އޮއްބާލުމަށް ވަރަށް ރޭވިގެން މަޖިލީހަށް ހުށަހެޅުނު ބިލެއް ކަމަށެވެ. މިބިލުގެ ބަހުސް ރައްޔިތުންގެ މެދުގައި ކުރުމަށް މަގު ހުޅުވާލައި، ނަޝީދުގެ މައްސަލަ އޮއްބާލުމަކީ ސަރުކާރުގެ އަމާޒުކަމަށް އޭނާ ވިދާޅުވިއެވެ.

ބޮންޑޭ ވަނީ މަޖިލީ ރައީސް ނަޝީދަކީ ރާއްޖޭގެ އެންމެ ތާއީދު އޮތް ސިޔާސީ ޝަހުޝިއްޝަތުކަމަށެވެ. ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގް އެކަށީގެންވާ ގޮތަށް ނުހިނގާކަމަށްވެސް ބޮންޑޭ ވަނީ ވިދާޅުވެފައެވެ. އަދި މިމައްސަލަ ރަނގަޅަށް ނުހިގާތީ ރައީސް ޞާލިހު ދުނިޔޭގެ ލަދަށްވެސް އިސްތިއުފާ ދެއްވަންޖެހޭކަމަށް ބޮންޑޭ ވިދާޅުވިއެވެ.

އަޅުގަނޑު އެދެން ރައީސުލްޖުމްހޫރިއްޔާ އިސްތިއުފާ ދޭން. އަޅުގަނޑު އެދެން ކެބިނެޓް އުވާލަން. އަޅުގަނޑު އެދެން މިވަރުގެ ކަމެއްކޮށްފަ ފަހަތަށް ޖެހުނީމާ ރައީސުލްޖުމްހޫރިއްޔާ އިސްތިއުފާދޭން. އެއީ އެހާވަރަށް ގަޓެއް ނެތީ. މިއީ ވަރަށް ނުބައި ދަލެރއްގައި މިޖެއްސީ. ރައްޔިތުންނަށް އޮޅުވާލައިގެން މިވަރުގެ ކަމެއް ޕާލިމަންޓެއްގެ ބޮލުގައި އަޅުވައި ތަހުގީގު ކުރަންޖެހޭ މައްސަލަ ތަހުގީގް ނުކޮށް އޮތީމާ އަޅުގަނޑަށް ނެތް ރައީސުލްޖުމްހޫރިއްޔާ އިތުބާރެއް.

– ބޮންޑޭ ވިދާޅުވިއެވެ.

ނަފްރަތު ބިލަށް އިއްޔެ ކުރެވުނު ހޫނު ބަސްތަކަށްފަހު ބިލު ވަނީ އަނބުރައި ކޮމިޓީއަށް ފޮނުވާފައެވެ. މިބިލް މަޖިލީހުން ބޭރުކޮށް ލުމަށް އިސްމާއިލްވަނީ އިއްޔެ ތަޅުމުގައި ގޮވާލާފައެވެ.