މޫސުން ގޯސްވެ، ހއ.އިން ފެށިގެން ތ.އަތޮޅާއި ހަމައަށް ރީނދޫ އެލާޓް ނެރެފިއެވެ.
މޫސުމާއި ބެހޭ ޤައުމީ އިދާރާއިން ރީނދޫ އެލާޓްނެރެފައިވަނީ އެ ސަރަހައްދުގެ އަތޮޅުތަކަށް މެންދުރު ފަހު 03:00ޖެހުމާއި ހަމައަށެވެ. އެ އިދާރައިން ބުނީ އެ ސަރަހައްދުގެ އަތޮޅުތަކަށް ބޯކޮށް ވާރޭވެހި, ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވޭކަމަށެވެ. އަދި ވައިގަދަވެ ކަނޑުތައް ގަދަވެ އުދައެރުމުގެ ފުރުޞަތުވެސް އެބައޮތްކަމަށް މެޓް އޮފީހުން ބުންޏެވެ.
މެޓް އޮފީހުން ބުނީ، ރާއްޖޭގެ ބޮޑުބަޔަކަށް ވިއްސާކުރާނެކަމަށާއި، ހުޅަނގާއި ހުޅަނގުއުތުރުން، އުތުރާއި މެދުރާއްޖެތެރޭގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި އަދި ދެކުނުގެ އަތޮޅުތަކަށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެކަމަށެވެ. ވިލާގަނޑުގައި ގަޑިއަކު ގާތްގަނޑަކަށް 45 މޭލާ 50 މޭލާ ދެމެދުގެ ބާރުމިނަށް ވައިގަދަވުން އެކަށީގެންވާކަމަށް މެޓް އޮފީހުން ބުންޏެވެ.
ކަނޑުތައް އުތުރާއި މެދުރާއްޖެތެރޭގައި އާއްމުގޮތެއްގައި ގަދަވާނެކަމަށާއި، ދެކުނުގެ ކަނޑުތައް އާދައިގެވަރަކަށް ގަދަވެފައި ވިލާގަނޑުގައި ގަދަވާނެކަމަށްވެސް އެ އިދާރާއިން ލަފާކުރެއެވެ. ރާޅުގެ އުސްމިން، 5 – 8 ފޫޓު އުތުރު، މެދުރާއްޖެތެރެއަށް އަދި 3 – 5 ފޫޓް ދެކުނުގެ އަތޮޅުތަކުގެ ކަނޑުގައި ހުންނާނެކަމަށްވެސް މެޓް އޮފީހުން ބުންޏެވެ.
މެޓް އޮފީހުން ވަނީ، ހުރިހައި ފަރާތްތަކުން، ޚާއްސަކޮށް ކަނޑުދަތުރުކުރައްވާ ފަރާތްތަކުން މޫސުމަށް ވަރަށްބޮޑަށް ސަމާލުވުމަށް އިލްތިމާސްކޮށްފައެވެ.
