އަދާލަތު ޕާޓީގެ އަމާޒު ވަރަށް ސާފުކަމަށާއި، ކިތަންމެ ކަނޑު ގަދަވިޔަސް އެޕާޓިގެ މިސްރާބު ހުރީ އަމާޒާ ދިމާލަށްކަމަށް ސަރުކާރު ކޯލިޝަންގައި ހިމެނޭ އަދާލަތު ޕާޓިގެ ރައީސް އަދި ހޯމް މިނިސްޓަރ ޝައިޚް އިމްރާން ޢަބްދުﷲ ވިދާޅުވެއްޖެއެވެ.

އަދާލަތު ޕާޓީއަށް މެންބަރުން އިތުރުކުރުމަށް ބޭއްވި ހަރަކާތުގައި ވާހަކަފުޅު ދައްކަވަމުން ޢިމްރާން ވިދާޅުވީ، ވާދަވެރި އެހެން ޕާޓީތަކާވެސް އެކުގައި މަސައްކަތްކުރުމުގެ ޤާބިލުކަން ޢަދާލަތު ޕާޓީގައި އެބަހުރިކަމަށެވެ. އެޕާޓީން ދެމި އޮންނާނީ ސަރުކާރާއެކުގައިކަން ފާހަގަކުރައްވާ ޢިމްރާން ވިދާޅުވީ  ޕާޓީގެ ސިޔާސަތާއި އުސޫލުތަކާ އެއްގޮތަށް ސަރުކާރަށް އެއްބާރުލުން ދިނުންމަތީގައި އެޕާޓީ ދެމިއޮންނާނެކަމަށެވެ.

@AdhaalathOffice ge amaaz v saaf.
maaiy Allah iraadha kurehviyya AP ge dhathuru(kandu kithanme gadhaviyas) misraabuhifaanee amazaa dhimaa ah. pic.twitter.com/w9nqg4WK7l

— Imran Abdulla (@ShimranAb) July 5, 2021

ޢަދާލަތު ޕާޓީއަކީ ޢަދުލު އިންސާފުގެ މައްޗަށް ބިނާވެގެންވާ ދީނީ، ސިޔާސީ އަދި އިޖްތިމާޢީ ނިޒާމެއް އެކުލެވޭ ޕާޓީ އެއްކަމަށާއި، އެނިޒާމު ދިވެހިރާއްޖޭގައި ހަރުދަނާކުރުމަށް މަސައްކަތް ކުރުން އެއީ ޢަދާލަތު ޕާޓީގެ އަމާޒުކަމަށްވެސް ޢިމްރާން ވިދާޅުވިއެވެ.

ހޯމް މިނިސްޓަރ ޢިމްރާން ޢަބްދުﷲ ވިދާޅުވީ، ޢަދާލަތު ޕާޓީ އުފެދިގެންއައި ދުވަހުން ފެށިގެން މިހާތަނަށްވެސް އެޕާޓީގެ މައިގަނޑު އެއް އަސާސް ކަމުގައިވާ މަތްވާވެގެންވާ އިސްލާމް ދީނުގެ ސައްޙަ އަޤީދާއާއި ޙައްޤު ދަޢުވަތު ޙިމާޔަތް ކުރާނެ ސިޔާސީ ފުރިހަމަ ބާރެއް ރާއްޖޭގައި ޤާއިމުކޮށް ދަމަހެއްޓުން އެއީ އެޕާޓީގެ ސާފު އަމާޒުކަމަށެވެ.

އަދާލަތު ޕާޓިގެ އަމާޒަކީ އެޕާޓީގެ މެންބަރުންގެ ޢަދަދު 10،000 ހަމަކޮށް، ދައުލަތުގެ ބަޖެޓުން ފައިސާ ލިބޭ ޕާޓީއަކަށް ހެދުންކަމަށެވެ.

ޢިމްރާން މިހެން ވިދާޅުވެފައިވާއިރު، އިލެކްޝަންސް ކޮމިޝަންގެ ދަފްތަރުގައި ރަޖިސްތޤރީކޮށްގެން ހިންގާ 10 ސިޔާސީ ޕާޓީގެތެރެއިން 10،000 މެންބަރުން ހަމަވަނީ 3 ޕާޓިއެއްގައެވެ. އަދާލަތު ޕާޓީގައި އެ ޢަަދަދަށް މެންބަރުން ނުހިމެނެއެވެ.