އެކިއެކި ވިޔަފާރިިތަކުން ލިބޭ އާމްދަނީ ޓެކްސް މަޢާފްކޮށް، ޓެކްސްގެ ނިޒާމާއި ބޭނުންވާ ކޮންމެ ހިނދެއްގައި ކުޅުމުގެ ބާރު ރައީސުލްޖުމްހޫރިއްޔާއަށް ހުންނަ މީހަކަށް ދިނުމަކީ އޮތް ބޮޑު ނުރައްކަލެއް ކަމުގައި ކުރީގެ އިކޮނޮމިކް މިނިސްޓަރ އަދި ޕީއެންސީންގެ ނާއިބް ރައީސް މުހައްމަދު ސައީދު ވިދާޅުވެއްޖެއެވެ.

އިންކަމް ޓެކްސްގެ ގާނޫނަށް ހުށަހަޅާފައި އިސްލާހާއި ގުޅޭގޮތުން މުޅި މަޖިލިސް ކޮމެޓީގައި ވާހަކަ ދައްކަވަމުން ސައީދު ވިދާޅުވިީ މި އިސްލާހުގެ ސަބަބުން ރާއްޖެއަށް އިންވެސްޓް ކުރާ ބޭރުގެ ވިޔަފާރިތަކާއި ރާއްޖެއަށް ލޯނުތައް ދޫކުރާ ފަރާތްތަކާ މެދު ކަންބޮޑުވުން އޮންނާނެއެވެ. އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލުގައި، މި ގޮތަށް ޓެކްސް ނެގުމުން އިސްތިސްނާ ކުރާނެ މަޝްރޫއުތައް ރައީސުލްޖުމްހޫރިއްޔާ ކަނޑައަޅުއްވަން ޖެހޭނީ ވަޒީރުންގެ މަޖިލީހުގެ ލަފާ ހޯއްދަވައިގެން ކަމަށް އެ ބިލުގައިވެއެވެ.

އިސްތިސްނާ ހޯދުމަށް އެދި ހުށަހެޅުމާއި ފުރިހަމަ ވާން ޖެހޭ ޝަރުތުތައް ހިމެނޭ އުސޫލެއް ފިނޭންސް މިނިސްޓްރީން ތައްޔާރުކުރަން ޖެހެއެވެ. އެފަދަ އިސްތިސްނާއެއް ދެވޭ ފަރާތްތައް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އޮޑިޓު ކުރަންވާނެ ކަމަށް ބިލުގައިވެއެވެ.

ސައީދު ފާހަގަކުރެއްވި ގޮތުގައި ރައީސުލްޖުމްހޫރިއްޔާއަކީ އިންތިޚާބީ މަގާމެއް ކަމުން ފަސް އަހަރުގެ މުއްދަތުން އަބަދުވެސް ބަދަލުވާނެ މަގާމެކެވެ. ރައީސަށް މިފަދަ ބާރެއް ދިނުމަކީ "ނުރައްކަލެއް" ގޮތުގައި އޭނާ ސިފަކުރެއްވިއެވެ.

މަޖިލީހުގެ އިގްތިސާދީ ކޮމިޓީން އިންކަމް ޓެކްސްގެ ގާނޫނަށް އިސްލާހު ގެނައުމުގެ ބިލް ދިރާސާ ކުރި އިރު ދައުލަތުގެ މުއައްސަސާތަކުން ޚިޔާލު ހޯދައިގެން ވެސް އެ މާއްދާއަށް ބަދަލުތަކެއް ނުގެނެއެވެ. އެއީ ބޮޑެތި މަޝްރޫއުތައް އިތުރު ކުރަން ގެންނަ އިސްލާހެއް ކަމަށް ފިނޭންސް މިނިސްޓަރު އިބްރާހީމް އަމީރު ވަނީ ވިދާޅުވެފައެވެ.