ހޮނިހިރު ދުވަހުގެރޭ އިޓަލީގެ ރޯމުގައި ޔޫކްރެއިނާ ދެކޮޅަށް ކުޅޭ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލް މެޗު ބަލަން އިނގިރޭސިވިލާތުން ދަތުރުކުރާ އެއްވެސް ސަޕޯޓަރަކަށް މެޗު ކުޅޭ ދަނޑު ރޯމް އޮލިމްޕިކް ސްޓޭޑިއަމަށް ނުވަދެވޭނެ ކަމަށް އިޓަލީ ސަރުކާރުން ނިންމައިފިއެވެ.
ލަންޑަނުގައި ހުންނަ އިޓަލީގެ އެމްބަސީން ނެރުނު ބަޔާނެއްގައި ބުނެފައިވަނީ އިނގިރޭސިވިލާތުގައި މިދިޔަ 14 ދުވަސް ތެރޭގައި އުޅުނު މީހެއް އިޓަލީ އަށް ދަތުރުކުރުމަށް ފަހު ފަސް ދުވަހުގެ ކަރަންޓީނު މުއްދަތެއް ފުރިހަމަކުރަން ޖެހޭނެ ކަމަށާއި އެ ގޮތަށް އަމަލުކުރާއިރު، ވަކި ގައުމެއްގެ މީހެއް އިސްތިސްނާނުވާނެ ކަމަށެވެ. އަދި ކަރަންޓީނުން ދޫކުރާނީ ނެގެޓިވް ނަތީޖާއަކަށް ފަހު ކަމަށް ވަނީ ކަނޑައަޅައިފައެވެ.
އިޓަލީ ސަރުކާރުން ނެރުނު ބަޔާނެއްގައި ބުނެފައިވަނީ އިނގިރޭސިވިލާތުގައި އުޅެފައި އިޓަލީ އަށް އައިސް ހަ ދުވަސްވެފައިވާ މީހުން މެޗު ބަލަން ދަނޑަށް ވަދެވޭނީ ނެގެޓިވް ޕީސީއާރް ޓެސްޓަކަށް ފަހުއެވެ. އިނގިރޭސިވިލާތަށް ދަތުކުރުމުގައި ސަމާލުވާން ޖެހޭ ކަމަށް ބުނެ، އިޓަލީ ސަރުކާރުން ދާދި ފަހުން ވަނީ ޓްރެވަލް އެޑްވައިޒަރީ އެއް ވެސް ނެރެފައެވެ.
އިނގިރޭސިވިލާތުގައި ކޮވިޑް-19ގެ ހާލަތު ގޯސްވަމުންދާތީ އިޓަލީ ސަރުކާރުން ވަނީ ފިޔަވަޅުތައް ވަރުގަދަކޮށް އިނގިރޭސިވިލާތުން އެ ގައުމަށް އަންނަ ކޮންމެ މީހެއް ފަސް ދުވަހަށް ކަރަންޓީނުވާން އަންގައިފައެވެ.
ކޮމެންޓު ފޮނުވާ