ކޮވިޑް-19ގެ ތެރޭގައި ގިނަ އަދަދެއްގެ ސަޕޯޓަރުން ވައްދައިގެން ޔޫރޯގެ މެޗުތައް ކުރިއަށްގެންދާތީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ ޔޫރަޕްގެ މައި އޮފީހުން ކަންބޮޑުވުން ފާޅުކޮށްފިއެވެ.
އިންގްލެންޑްގައި ކޮވިޑްގެ ހާލަތު ގޯސްވާތީ ގިނަ ޓީމުތަކަކުން އަންނަނީ ސެމީ ފައިނަލް ދެ މެޗާއި ފައިނަލް މެޗު އިންގްލެންޑް ނޫން ތަނެއްގައި ކުޅެން ގޮވާލަމުންނެވެ. މެޗުތައް ބަދަލުކުރަން ގައުމުތަކުން ބޭނުންވަނީ އިޓަލީގެ ރޯމުގައި ނޫނީ ހަންގޭރީގެ ބުޑަޕެސްޓްއެވެ. ހަންގޭރީ އާއި ސްކޮޓްލެންޑް އަދި އިންގްލެންޑުން ޔޫރޯގެ މެޗުތަކާ ގުޅޭ ކޮވިޑް-19ގެ ކޭސްތައް ފެންނާތީ އެ ގައުމުތަކުގެ ސިއްހީ ތަޖުރިބާކާރުން ވަނީ ކަންބޮޑުވުން ފާޅުކޮށްފައެވެ.
ޔުއެފާ އިން ބުނީ ސަޕޯޓަރުން ދަނޑަށް ވައްދާނެ އަދަދެއް ކަނޑައެޅުމުގެ ބާރު ދީފައި އޮތީ ކޮންމެ ގައުމެއްގެ ލޯކަލް އޮތޯރިޓީއަށް ކަމަށާއި އެ ކަމުގެ ތެރެއަށް ޔުއެފާ އިން ނުވަންނާނެ ކަމަށެވެ. ޔުއެފާ އިން ބުނެފައިވަނީ ކަނޑައަޅާފައިވާ ޝެޑިއުލާ އެއްގޮތަށް މެޗުތައް ކުރިއަށްދާނެ ކަމަށާއި މެޗު ކުޅޭނެ ސްޓޭޑިއަމަކާއި ގަޑިއަކަށް ބަދަލެއް ގެންނަން ޖެހޭ ފަދަ ކަމެއް އަދި ކުރިމަތިނުވާ ކަމަށެވެ.
އިނގިރޭސި ސަރުކާރުން ދިން ހުއްދައާ އެއްގޮތަށް ޔޫރޯގެ ސެމީ ފައިނަލާއި ފައިނަލް މެޗު ބަލަން ލަންޑަންގެ ވެމްބްލީ ސްޓޭޑިއަމަށް 60،000 އަށް ވުރެ ގިނަ ސަޕޯޓަރުން ވައްދަން މަސައްކަތްކުރަމުން އަންނައިރު، އެ ކަމާ ދެކޮޅަށް ގިނަ ބަޔަކު އަޑު އުފުލާފައވެ.
ކޮމެންޓު ފޮނުވާ