އައިޖީއެމްއެޗާއި ދިމާ މޫދުގައި މީހަކު މަރުވެފައި އޮއްވާ ފެނުނު މައްސަލައިގެ ތަހުގީގަށް އާންމުންގެ ފަރާތުން އެއްބާރުލުން ބޭނުންވާކަމަށް ފުލުހުން ވިދާޅުވެއްޖެއެވެ.
ފުލުހުން މިރޭ ވިދާޅުވީ ބުރާސްފަތި ދުވަހުގެ ހެނދުނު 09:00 އާއި 12:00 އާ ދެމެދު ރަސްފަންނު ސަރަހައްދުގައި ހަރަކާތްތެރިވެފައިވާ ފަރާތްތަކާއި، މަރުގެ މި ހާދިސާއާ ގުޅޭ އެއްވެސް މަޢުލޫމާތެއް ލިބިލައްވާފައިވާ ފަރާތެއްވާނަމަ އެފަރާތަކާ ވާހަކަދައްކައި މައުލޫމާތު އޮޅުންފިލުވަން ބޭނުންވާ ކަމަށެވެ.
އައިޖީއެމްއެޗާއި ދިމާ މޫދުން މަރުވެފައި އޮތް މީހެއްގެ ހަށިގަނޑު ފެނުނީ ހުކުރު ދުވަހުގެ ހެނދުނު 10:40 ކަންހާއިރުއެވެ. ނަމަވެސް ބުރާސްފަތި ދުވަހު ހެނދުނު ރަސްފަންނަށް ދިޔަ މީހުންގެ އެހީއަށް ފުލުހުން އެދުނު ސަބަބެއް ނޭނގެއެވެ.
ބުރާސްފަތި ދުވަހު ފުލުހުން ވިދާޅުވެފައިވާ ގަޑީގައި ރަސްފަންނު ސަރަހައްދުގައި ހަރަކާތްތެރިވެފައިވާ ފަރާތްތަކުން ނުވަތަ މަރުގެ މިހާދިސާއާ ގުޅޭ އެއްވެސް މައުލޫމާތެއް ލިބިލައްވާފައިވާ ފަރާތެއްވާނަމަ މޯލްޑިވްސް ޕޮލިސް ސަރވިސްގެ އިމަޖެންސީ ނަންބަރު 119 ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާރޓްމަންޓުގެ ނަންބަރު 9911099 އަށް ގުޅައި މައުލޫމާތު ހިއްސާކުރުމަށް ފުލުހުން އެދެއެވެ.
މަރުވެފައި އޮއްވާ ފެނުނީ، ގދ. ވާދޫ އުމުރުން 31 އަހަރުގެ ސިދުރަތުﷲ އަހްމަދު ނަމަކަށް ކިޔާ މީހެކެވެ. މީނާގެ މަރާއި ގުޅޭގޮތުން ފުލުހުން މިރޭ ވިދާޅުވީ މިމަރަކީ ޤުދުރަތީ މަރެއްކަން ކަށަވަރު ކުރެވިފައި ނުވާތީ ބަލަންޖެހޭ ކަންކަން ފުލުހުން ބަަލަމުންދާކަމަށެވެ. އެގޮތުން މަރުގެ ސަބަބު ކަށަވަރުކުރެވިފައި ނުވާތީ ޕޯސްޓްމޯޓަމް ހެދުމަށް ކުރަންޖެހޭ ކަންކަންކުރުމަށްޓަކައި މިވަގުތު ހަށިގަނޑުވަނީ މޯޗަރީގައި ބާއްވާފައިވާކަމަށް ފުލުހުން ވަނީ ވިދާޅުވެފައެވެ.
އައިޖީއެމްއެޗާއި ދިމާ މޫދުން ފެނުނު މިމީހާ ނެގި އިރުވެސް އެކި ވަރުގެ އަނިޔާތަކެއް ދީފައިވާކަމަށް މައުލޫމާތުލިބިފައިވެއެވެ. އެގޮތުން އެމީހާގެ ލޯކައިރިއާއި މޫނުގެ އެކި ހިސާބުތަކުގައި ޒަހަމްތަކެއް ލިބިފައިވުމާއި، ބައެއް އިނގިލި ވެސް ނެތްކަމަށް މައުލޫމާތު ލިބެއެވެ.
