މެޗުގެ ފަހު ވަގުތުގައި ޖެހި ލަނޑުން މޮޅުވެ ސްވިޑެން ގްރޫޕް އީ ގެ އެއްވަނަ ޓީމުގެ ގޮތުގައި ޔޫރޯގެ ދެވަނަ ބުރަށް ދަތުރުކޮށްފިއެވެ.
ރަޝިއާގެ ކްރެސްޓޯވްސްކީ ސްޓޭޑިއަމްގައި ކުޅުނު މި މެޗު ސްވިޑެން އިން ކާމިޔާބުކުރީ 2-3 ގެ ނަތީޖާއަކުންނެވެ.
މި ނަތީޖާއާއެކު ސްވިޑެން ގްރޫޕް އީ ގެ އެއްވަނަ ލިބުނީ 3 މެޗުން ލިބުނު 7 ޕޮއިންޓާއެކުއެވެ. ގްރޫޕްގެ 2 ވަނަ އަށް ދިޔައީ މިރޭ ސްލިވާކިއާ އަތުން ރެކޯޑް މޮޅެއް ހޯދި ސްޕެއިންއެވެ. ސްޕެއިން ވަނީ 5 ޕޮއިންޓް ހޯދާފައެވެ. 3 ވަނައިގައި އޮތް ސްލޮވާކިއާއަށް ލިބެނީ 3 ޕޮއިންޓްއެވެ. އަދި ފުލުގައި އޮތް ޕޮލެންޑަށް ލިބުނީ 1 ޕޮއިންޓެއެވެ.
ސްވިޑެންއާއި ޕޮލެންޑް ބައްދަލުކުރި މެޗު ފަށައިގެން 2 ވަނަ މިނެޓުގައި ސްވިޑެން އިން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ، އެމީލް ފޯސްބާގްއެވެ. މެޗުގެ ފުރަތަމަ ހާފްގައި ޕޮލެންޑްގެ ކެޕްޓަން ރޮބަޓް ލެވަންޑޯސްކީއަށް ވަނީ ރަނގަޅު ފުރުޞަތުތަކެއް ލިބި އޭގެ ބޭނުން ހިފޭގޮތް ނުވެފައެވެ.
މެޗުގައި ސްވިޑެންގެ 2 ވަނަ ލަނޑު ފެނިގެން ދިޔައީ 2 ވަނަ ހާފް ފަށައިގެން 59 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ، ފުރަތަމަ ލަނޑުވެސް ކާމިޔާބުކޮށްދިން އެމީލް ފޯސްބާގްއެވެ. ސްވިޑެން އިން 2 ލަނޑު ލީޑެއް ނެގިފަހުން ޕޮލެންޑުން ވަނީ ކުޅުން ރަނގަޅުކޮށްފައެވެ. އޭގެ ނަތީޖާއެއްގެ ގޮތުން މެޗުގެ 61 މިނެޓުގައި ރޮބާޓް ލެވަންޑޯސްކީ ވަނީ ޕޮލެންޑްގެ ފުރަތަމަ ލަނޑު ކާމިޔާބުކޮށްދީ ނަތީޖާގެ ފަރަގު ކުޑަކޮށްފައެވެ. އަދި މެޗުގެ 84 ވަނަ މިނެޓުގައި ލެވަންޑޯސްކީ ވަނީ އިތުރު ލަނޑެއް ޖަހާ މެޗުގެ ނަތީޖާ ޕޮލެންޑަށް ހަމަހަމަކޮށްދީފައެވެ. މި މެޗުން ސްވިޑެން މޮޅުކޮށްދިން ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ، ވިކްޓާ ކްލައެސަންއެވެ.
