ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި މިރޭ ޔޫކްރެއިން ބަލިކޮށް ޔޫރޯގެ ތާރީހުގައި ފުރަތަމަ ފަހަރަށް އޮސްޓްރިއާ ދެވަނަ ބުރަށް ދަތުރުކޮށްފިއެވެ.
ރުމޭނިއާގެ ނޭޝަނަލް އެރީނާގައި ކުޅުނު މި މެޗު އޮސްޓްރިއާ އިން ކާމިޔާބުކުރީ 0-1 ގެ ނަތީޖާއަކުންނެވެ.
މި މެޗަށް ނުކުތްއިރު، މި ދެޓީމަށްވެސް މުބާރާތުގެ ދެވަނަ ބުރުން ޖާގަ ހޯދުމުގެ ފުރުޞަތު އޮތެއެވެ. އެގޮތުން މި މެޗު އެއްވަރުކޮށްލައިގެން ވެސް ދެވަނަ ބުރަށް ދަތުރުކުރުމުގެ ފުރުޞަތު ޔޫކްރެއިން އަށް އޮތެވެ. އޮސްޓްރިއާ ދެވަނަ ބުރަށް ދަތުރުކުރީ ގްރޫޕް ސްޓޭޖުގައި ކުޅުނު 3 މެޗުގެ ތެރެއިން 2 މެޗުން މޮޅުވެގެން ހޯދި 6 ޕޮއިންޓާއެކުއެވެ.
އޮސްޓްރިއާ ހިމެނޭ ގްރޫޕް ސީގެ ޕޮއިންޓް ޓޭބަލަށް ބަލާއިރު، ގްރޫޕްގެ އެއްވަނަ ލިބުނީ 3 މެޗު ކާމިޔާބުކޮށް 9 ޕޮއިންޓް ހޯދި ނެދަލެންޑްސްއަށެވެ. ދެވަނަ 6 ޕޮއިންޓާއެކު އޮސްޓްރިއާ ހޯދިއިރު، 3 ވަނައިގައި ޔޫކްރެއިން އޮތީ 3 ޕޮއިންޓާއެކުއެވެ. އަދި ޔޫރޯގައި އަލަށް ވާދަކުރި ނޯތު މެސެޑޯނިއާ ގްރޫޕްގެ ފުލުގައި އޮތީ ޕޮއިންޓެއްވެސް ނުލިބިއެވެ.
ޔޫކްރެއިން އާއި އޮސްޓްރިއާ ބައްދަލުކުރި މެޗުގައި އޮސްޓްރިއާ މޮޅުވި ހަމައެކަނި ލަނޑު މެޗުގެ 21 ވަނަ މިނެޓުގައި ކާމިޔާބުކޮށްދިނީ ބޮމްގެޓްނާއެވެ. މި ލަނޑަށްފަހު ވެސް އޮސްޓްރިއާ އިން ލަނޑު ޖަހާނެ ގިނަ ފުރުސަތުތަކެއް ތަނަވަސްކުރިއެވެ.
މުބާރާތުގެ ދެވަނަ ބުރުގައި އޮސްޓްރިއާ ވާދަކުރަން ޖެހެނީ ގަދަފަދަ އިޓަލީއާއެވެ.
