ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ތުރުކީ ބަލިކޮށް ގްރޫޕްގެ 3 ވަނަ ހޯދައި ދެވަނަ ބުރުން ޖާގައެއް ހޯދުމުގެ އުއްމީދު ސްވިޒަލެންޑުން ދަމަހައްޓައިފިއެވެ.
ބަކޫގެ އޮލިމްޕިކް ސްޓޭޑިއަމްގައި ކުޅުނު މި މެޗުގައި ތުރުކީގެ މައްޗަށް ސްވިޒަލެންޑް ކުރިހޯދީ 1-3 ގެ ނަތީޖާއަކުންނެވެ.
މިރޭގެ މެޗުން ހޯދި 3 ޕޮއިންޓާއެކު މިއީ، މި މުބާރާތުގައި ސްވިޒަލެންޑް ހޯދި ފުރަތަމަ މޮޅެއެވެ. ސްވިޒަލެންޑަށް މުބާރާތުގެ ދެވަނަ ބުރުން ޖާގައެއް ލިބުނު ފުރުޞަތު އެބައޮތެވެ. އެއީ އެންމެ ރަނގަޅު ނަތީޖާ ނެރޭ 3 ވަނަ ޓީމުތަކުގެ ތެރޭގައި ހިމެނިގެންނެވެ. އެންމެ ރަނގަޅު 3 ވަނަ އަށް ދާ ޓީމުތަކުގެ ތެރެއިން 6 ޓީމަކަށް 2 ވަނަ ބުރުން ފުރުޞަތު ލިބޭނެއެވެ.
ސްވިޒަލެންޑާއި ތުރުކީ ބައްދަލުކުރި މެޗު ފަށައިގެން ފުރަތަމަ ލަނޑު ޖަހާ ލީޑު ނެގީ ސްވިޒަލެންޑުންނެވެ. އެގޮތުން މެޗުގެ 5 ވަނަ މިނެޓުގައި ސްވިޒަލެންޑަށް ލީޑު ނަގައިދިން ލަނޑު ކާމިޔާބުކޮށްދިނީ، ހަރިސް ސެފެރޯވިޗްއެވެ. އަދި ފުރަތަމަ ހާފް ނިމުމުގެ ކުރިން ޒެރްޑަން ޝަގީރީ ވަނީ އިތުރު ލަނޑެއް ޖަހާ ނަތީޖާގެ ފަރަގު ބޮޑުކޮށްފައެވެ.
ދެވަނަ ހާފް ފަށައިގެން، ތުރުކީން ވަނީ ކުޅުން ރަނގަޅުކޮށްފައެވެ. އޭގެ ނަތީޖާއެއްގެ ގޮތުން 61 ވަނަ މިނެޓުގައި ތުރުކީން ވަނީ މި މުބާރާތުގައި އެޓީމުން ޖެހި ހަމައެކަނި ލަނޑު ކާމިޔާބުކޮށްފައެވެ. މި ލަނޑު ކާމިޔާބުކޮށްދިނީ، އިރްފާން ޗޭން ކަވޭޗީއެވެ. ނަމަވެސް އޭގެ 7 މިނެޓުގެ ފަހުން ސްވިޒަލެންޑުން ވަނީ އިތުރު ލަނޑެއް ޖަހައި ލީޑުޅާކޮށްފައެވެ. މި ލަނޑުވެސް އެ ޤައުމަށް ކާމިޔާބުކޮށްދިނީ ޝަގީރީއެވެ.
މި ނަތީޖާއާއެކު ގްރޫޕް އޭގެ އެއްވަނަ އިޓަލީން ހޯދީ 3 މެޗުން މޮޅުވެގެން ހޯދި 9 ޕޮއިންޓާއެކުގައެވެ. އިޓަލީ އަތުން ބަލިވި ނަމަވެސް ވޭލްސްއަށް ވަނީ ގްރޫޕްގެ ދެވަނަ ކަށަވަރުކޮށް މުބާރާތުގެ ގަދަ 16 އިން ޖާގަ ހޯދާފައެވެ. އެޓީމަށް 3 މެޗުން 4 ޕޮއިންޓް ލިބިފައިވާ އިރު، ދެވަނައިގައި އޮތީ ފައިދާ ގޯލުގެ ތަފާތުންނެވެ. ތިންވަނައިގައި އޮތް ސްވިޒަލޭންޑަށްވެސް ވަނީ 4 ޕޮއިންޓް ލިބިފައެވެ. އެ ދެޓީމުގެ އޮތީ ފައިދާ 2 ގޯލުގެ ތަފާތެކެވެ. ތުރުކީ ކެޓީ ޕޮއިންޓެއް ނުލިބިއެވެ.
