ޔުއެފާ ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގައި މިރޭ ޕޮލެންޑް އަތުންވެސް އެއްވަރުވެ، ސްޕެއިންއަށް އިތުރު ބޮލުގައި ރިހުމަކާއި ކުރިމަތިލާން ޖެހިއްޖެއެވެ.
ސްޕެއިންގެ ސެވިލްގައި ކުޅުނު މި މެޗު ނިމުނީ 1-1 ގެ ނަތީޖާއަކުންނެވެ.
މުބާރާތުގެ ގްރޫޕް ސްޓޭޖުގައި ސްޕެއިން ކުޅުނު ފުރަތަމަ މެޗުގައި ބައްދަލުކުރީ ސްވިޑެން އާއެވެ. އެ މެޗުވެސް ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ޖެހިގެން އައި މެޗުގައި ޕޮލެންޑް އަތުން އެއްވަރުވުމާއެކު، ސްޕެއިނަށް މި ވަނީ ދެވަނަ ބުރުން ޖާގައެއް ހޯދުމަށް އިތުރު ޕްރެޝަރުތަކާއި ކުރިމަތިންލާން ޖެހިފައެވެ. އަދި މިއީ 1996 ގެ ފަހުން ޔޫރޯ ފުޓްބޯޅަ މުބާރާތެއްގައި ޖެހިޖެހިގެން ދެ މެޗުން ސްޕެއިން އެއްވަރުވި ފުރަތަމަ ފަހަރެއެވެ. މި މެޗުގައި ސްޕެއިން އާއި ވާދަކުރި ޕޮލެންޑް ވަނީ މިފަހަރުގެ ޔޫރޯގައި ފުރަތަމަ މެޗުގައި ސްލޮވާކިއާ އަތުން ބަލިވެފައެވެ. މި ނަތީޖާއެކު ގްރޫޕް އީ މިވަނީ ވަރަށް ފޯރިގަދަވެފައެވެ. ސަބަބަކީ އެންމެ ފަހު މެޗަށް ދާއިރުވެސް ގްރޫޕްގައި ހިމެނޭ ހުރިހާ ޓީމަކަށްވެސް ދެވަނަ ބުރުން ޖާގަ ހޯދުމުގެ ފުރުޞަތު އޮތީމައެވެ.
މިރޭގެ މެޗު ފަށައިގެން ރަނގަޅަށް ކުޅެ ހަމަލާތައް އުފެއްދީވެސް ސްޕެއިން ޓީމުންނެވެ. އެގޮތުން މެޗުގައި ފުރަތަމަ ލަނޑު ޖަހާ ލީޑުވެސް ނެގީ ސްޕެއިނުންނެވެ. މި ލަނޑު މެޗުގެ 26 ވަނަ މިނެޓުގައި ކާމިޔާބުކޮށްދިނީ އަލްވާރޯ މޮރާޓާއެވެ. މޮރާޓާ މި ލަނޑު ޖެހިތަނާ ލައިންސްމަން ވަނީ އޮފްސައިޑް ކަމަށް ދިދަ ނަގާފައެވެ. ނަމަވެސް ފަހުން ވީއޭއާރު ބެލުމަށްފަހު ރެފްރީ ވަނީ މޮރާޓާ ލަނޑު ޖެހިއިރު ހުރީ އޮންސައިޑްގައި ކަމަށް ނިންމާ މި ލަނޑު ބަލައިގެންފައެވެ. މެޗުގެ ފުރަތަމަ ހާފް ނިމުނީ މޮރާޓާގެ ލަނޑުން ސްޕެއިން ކުރީގައި އޮވެގެންނެވެ.
ދެވަނަ ހާފް ފަށައިގެން މެޗުގެ ނަތީޖާ ހަމަހަމަކުރުމަށް ޕޮލެންޑުން ވަރަށް މަސައްކަތްކުރިއެވެ. އޭގެ ނަތީޖާއެއްގެ ގޮތުން މެޗުގެ 54 ވަނަ މިނެޓުގައި ޕޮލެންޑުން ވަނީ ލަނޑެއް ޖަހާ މެޗުގެ ނަތީޖާ ހަމަހަަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ، ރޮބަޓް ލެވަންޑޯސްކީއެވެ.
ޕޮލެންޑުން ލަނޑު ޖަހާ މެޗުގެ ނަތީޖާ ހަމަހަމަކުރިތާ މާގިނައިރުތަކެއް ނުވަނީސް ސްޕެއިނަށް ވަނީ އަލުން ލީޑު ޕެނަލްޓީއެއްވެސް ލިބިފައެވެ. މި ޕެނަލްޓީ އަކީ ސްޕެއިންގެ މޮރޭނޯއަށް ކުރި ފައުލަކާއި ގުޅިގެން ވީއޭއާރު ބެލުމަށްފަހު ރެފްރީ ދިން ޕެނަލްޓީއެކެވެ. މޮރަޓާ ފޮނުވާލި ޕެނަލްޓީ އަމާޒުވީ ގޯލުގެ ދަނޑިއަށެވެ. އަދި ރިބައުންސްގައި އައި ބޯޅަ ފޮނުވާލުމުން ދިޔައީ ބޭރަށެވެ.
މި ނަތީޖާއާއެކު ގްރޫޕްގެ އެއް ވަނައިގައި އޮތީ ދެ މެޗުން ލިބުނު 4 ޕޮއިންޓާ އެކު އޮތީ ސްވިޑެންއެެވެ. ދެ ވަނައިގައި އޮތް ސްލޮވާކިއާ އަށް ދެ މެޗުން ވަނީ 3 ޕޮއިންޓް ލިބިފައެވެ. އަދި ތިން ވަނައިގައި ސްޕެއިން އޮތީ ދެ މެޗުން އެއްވަރުވެގެން ލިބުނު 2 ޕޮއިންޓާ އެކުއެވެ. ގްރޫޕްގެ ފުލުގައި ޕޮލެންޑް އޮތީ ދެ މެޗު ކުޅެގެން ލިބުނު 1 ޕޮއިންޓާ އެކުއެވެ.
