ޔުއެފާ ޔޫރޯ ފުޓްބޯޅަ މުބާރާތުގައި މިރޭ ހަންގޭރީން ދުނިޔޭގެ ޗެމްޕިއަން ފްރާންސް މޮޅުވިޔަ ނުދީ ހިފަހައްޓައިފިއެވެ.
ހަންގޭރީގެ ޕުސްކަސް އެރީނާގައި 65،000 ސަޕޯޓަރުން ކުރިމަތީގައި މިރޭ ކުޅުނު މެޗު ނިމުނީ 1-1 އެއްވަރުވެގެންނެވެ.
މި މެޗުން ފްރާންސް މޮޅުވި ނަމަ، މުބާރާތުގެ ދެވަނަ ބުރުން އެޓީމަށް ޖާގައެއް ކަށަވަރުކުރެވޭނެއެވެ. ނަމަވެސް އެއްވަރުވުމުން ދެން ޖެހޭނީ ގްރޫޕް ސްޓޭޖުގެ ފަހު މެޗަށް އިންތިޒާރުކުރާށެވެ. މުބާރާތުގައި ހަންގޭރީ ކުޅުނު ފުރަތަމަ މެޗުގައި ޕޯޗުގަލް އަތުން ވަނީ ބަލިވެފައެވެ. މިރޭގެ މެޗުގައި ފްރާންސް އަތުން ހޯދި ޕޮއިންޓާއެކު، މެޗަށްފަހު ހަންގޭރީގެ ސަޕޯޓަރުން ވަނީ ވަރަށް ބޮަޑަށް އުފާފާޅުކޮށްފައެވެ.
މި މެޗު ފަށައިގެން ފުރަތަމަ ހާފުގައި ލަނޑު ޖަހާނެ ގިނަ ފުރުޞަތުތައް ތަނަވަސްކުރީ ފްރާންސް ޓީމުންނެވެ. މެޗުގައި ހަންގޭރީ އަށް އެންމެ ބޮޑު ގޮންޖެހުމެއް ކުރިމަތިވީ ފުރަތަމަ ހާފުގައި އެ ޓީމުގެ ކެޕްޓަނަށް އަނިޔާވެގެން ބަދަލުކުރަން ޖެހުމެވެ. ނަމަވެސް އެ ޓީމުން ކެޕްޓަން ނެތްތަން ފޫބައްދަން އެރުވި ނިކޮލިޗް ވަނީ މޮޅު ކުޅުމެއް ދައްކާފައެވެ.
ފުރަތަމަ ހާފުގައި ފްރާންސަށް ލަނޑު ޖަހާ ލީޑު ނަގަން ލިބުނު ފުރުޞަތުގެ ބޭނުން ނުކުރެވުނުއިރު، ހަންގޭރީއަށް ލިބުނު މަދު ފުރުޞަތުގައި ފްރާންސްގެ ގޯލަށް ވަނީ ނުރައްކާކޮށްފައެވެ. އޭގެ ނަތީޖާއެއްގެ ގޮތުން ފުރަތަމަ ހާފް އިތުރު ވަގުތުގެ ތެރޭގައި ފްރާންސް ކޮޅަށް ލަނޑު ޖަހާ ހެންގޭރީން ވަނީ ލީޑު ނަގާފައެވެ. މި ލަނޑު ހަންގޭރީއަށް ކާމިޔާބުކޮށްދިނީ، އަޓީލިއާ ފިއޯލާއެވެ. މި ލަނޑު ޖެހުމަށްފަހު ހަންގޭރީގެ ސަޕޯޓަރުންނާއި ކުޅުންތެރިން ވަނީ ވަރަށް ބޮަޑަށް އުފާފާޅުކޮށްފައެވެ.
މެޗުގެ ދެވަނަ ހާފް ފަށައިގެން ފްރާންސުން ވަނީ އެޓީމުގެ ކުޅުން ރަނގަޅުކޮށް، އެޓޭކްތައް ވަރުގަދަކޮށްފައެވެ. އެގޮތުން މެޗުގެ 58 ވަނަ މިނެޓުގައި ޑެމްބެލޭ ފޮނުވާލި ބާރު ހަމަލާއެއް ވަނީ ގޯލުގެ އަރިމަތީ ދަނޑިއަށްވެސް އަމާޒުވެފައެވެ. މެޗުގައި ފްރާންސަށް ނަތީޖާ ހަމަހަމަކޮށްދިނީ 66 ވަނަ މިނެޓުގައި އެންޓޮއިން ގްރިޒްމަންއެވެ. ގްރިޒްމަން މި ލަނޑު ޖެހީ، އެމްބާޕޭ ގޯލު ކުރިމައްޗަށް ހުރަސްކޮށްދިން ބޯޅަ ގޯލުގެ މަތީ ކަނަށް އެއްފަހަރުން ޖަހާ ފޮނުވާލައިގެންނެވެ.
މިއާއެކު ގްރޫޕް އެފްގެ އެއް ވަނައިގައި ހަތަރު ޕޮއިންޓާއި އެކު އޮތީ ފްރާންސެވެ. ތިން ޕޮއިންޓާއި އެކު ޕޯޗުގަލް ދެ ވަނައިގައި އޮތް އިރު މިރޭގެ މެޗުން އެއްވަރު ވުމުން ހަންގޭރީ އޮތީ ތިން ވަނައިގައެވެ. ޕޮއިންޓެއް ނުލިބި ޖަރުމަނު އޮތީ ގްރޫޕުގެ ފުލުގައެވެ.
ޔޫރޯގައި މިރޭ 9 ޖަހާއިރު ކުޅޭ މެޗުގައި ބައްދަލުކުރާނީ ޗެމްޕިއަން ޕޯޗުގަލް އާއި ޖަރުމަނެއެވެ. މި މެޗު ކާމިޔާބުކޮށްގެން ޕޯޗުގަލް އަށް ދެވަނަ ބުރުން ޖާގައެއް ޔަގީން ވާނެއެވެ. އަދި ޖަރުމަނު ބަލިވެއްޖެނަމަ، މުބާރާތުގެ ދެވަނަ ބުރަށް ދިއުމުގެ އަމިއްލަ ބާރު އެޓީމު އަތުން ގެއްލޭނެއެވެ. އެހެންކަމުން މިއީ ދެ ޓީމަށްވެސް ވަރަށް މުހިއްމު މެޗަކަށް ވެގެންދާނެއެވެ.
