ޔޫރޯ ފުޓްބޯޅަ މުބާރާތުގައި މިރޭ ސްކޮޓްލެންޑް އަތުން އެއްވަރުމުން، ދެވަނަ ބުރުން ޖާގައެއް ޔަގީން ކުރުމަށް އިންގްލެންޑް އިތުރު އިންތިޒާރެއް ކުރަން ޖެހިއްޖެއެވެ.
އިނގިރޭސިވިލާތުގެ ލަންޑަންގެ ވެމްބްލީ ސްޓޭޑިއަމްގައި އިންގްލެންޑް އާއި ސްކޮޓްލެންޑް ވާދަކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.
މި ނަތީޖާއާއެކު ގްރޫޕް ޑީގެ އެއްވަނައިގައި 4 ޕޮއިންޓާއެކު އޮތީ ޗެކް ރިޕަބްލިކްއެވެ. އަދި ދެވަނައިގައި އޮތް އިންގްލެންޑަށްވެސް 4 ޕޮއިންޓް ލިބޭއިރު، ޗެކް ކުރީގައި އޮތީ ލަނޑުގެ ތަފާތުންނެވެ. ގްރޫޕްގެ ތިންވަނައިގައި ކްރޮއޭޝިއާ 1 ޕޮއިންޓާއެކު އޮތްއިރު، ފުލުގައި އޮތް ސްކޮޓްލެންޑަށްވެސް ލިބެނީ ޕޮއިންޓެކެވެ.
ގްރޫޕްގެ ފަހު މެޗުތައް އެއް ގަޑިއެއްގައި ކުޅޭއިރު، އަންނަ ބުދަ ދުވަހު އިންގްލެންޑް ކުޅޭނީ ޗެކް ރިޕަބްލިކާއެވެ. އަދި ސްކޮޓްލެންޑް ބައްދަލުކުރާނީ ކްރޮއޭޝިއާއާ އެވެ. މި ގްރޫޕްގައި އަދި ހަތަރު ޓީމަށް ވެސް ދެ ވަނަ ބުރުގެ ފުރުސަތު އެބައޮތެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ ދާދި ހަމަހަމަ ކުޅުމެކެވެ. މި މެޗުގައި ލަނޑެއް ފެނިގެން ނުދިޔަނަމަވެސް ދެ ޓީމުގެ ފަރާތުންވެސް ވަނީ ރަނގަޅު ފުރުސަތުތަކެއް ތަނަވަސްކޮށް އިދިކޮޅު ޓީމުގެ ގޯލަށް ނުރައްކާ ކޮށްފައެވެ.
މެޗުގައި އެންމެ ނުރައްކާ ހަމަލާއެއް ފޮނުވާލީ އިންގްލޭންޑެވެ. އޭރިއާ ތެރެއަށް މޭސަން މައުންޓް ނަގައިދިން ކޯނަރަކުން ގޯލަށް އަމާޒުކޮށް ބޮލަށް ޖަހަން އުޅުނު ނަމަވެސް ސްޓޯންސްގެ ހަމަލާ އަމާޒުވީ އަރިމަތީ ދަނޑިއަށެވެ.
ދެވަނަ ހާފުގައިވެސް ދެ ޓީމުގެ ފަރާތުން ފެނުނީ ދާދި އެއްވަރުގެ ކުޅުމެކެވެ. މި ހާފުގައިވެސް އިންގްލޭންޑަށް ސްކޮޓްލޭންޑްގެ ޑިފެންސްލައިން ފޫއަޅުވާލެވޭ ގޮތެއް ނުވިއެވެ. އިންގްލޭންޑުގެ ކުޅުންތެރިންނަށް ވުރެ މި މެޗުގައި ސްކޮޓްލޭންޑުގެ މަސައްކަތު ރޭޓު ފެނުނީ ވަރަށް މަތިކޮށެވެ.
ޔޫރަޕުގެ 11 ސިޓީއެއްގައި ކުރިޔަށްދާ ޔޫރޯ ފުޓްބޯޅަ މުބާރާތުގައި މިއަދުވެސް 3 މެޗެއް ކުުޅުމަށް ވަނީ ތާވަލްކޮށްފައެވެ. އެގޮތުން މިއަދު ހަވީރު 6:00 ގައި ހަންގޭރީ އާއި ފްރާންސް ވާދަކުރާއިރު، މިރޭ 9 ޖަހާއިރު ކުޅޭ މެޗުގައި ބައްދަލުކުރާނީ ޗެމްޕިއަން ޕޯޗުގަލް އާއި ޖަރުމަނެވެ. އަދި 12:00 ގައި ކުޅޭ މެޗުގައި ސްޕެއިން އާއި ޕޮލެންޑް ވާދަކުރާނެއެވެ.
