އިނގިރޭސިވިލާތުގައި މިހާރު ކުރިޔަށްދާ G7ގެ ލީޑަރުންގެ ސަމިޓްގައި، އަންނަ އަހަރު، ދުނިޔޭގެ ފަގީރު ގައުމުތަކަށް 1 ބިލިއަން ޑޯޒްގެ ކޯވިޑް19 ވެކްސިން ފޯރުކޮށް ދިނުމަށް އެއްބަސް ވެއްޖެއެވެ.
މިކަން ހާމަކުރައްވާފައިވަނީ، G7ގެ ގައުމުތަކުގެ ފަރާތުން ބޭއްވި ނޫސްވެރިންގެ ބައްދަލު ވުމެއްގައި ވާހަކަ ދައްކަވަމުން، އިނގިރޭސިވިލާތުގެ ބޮޑުވަޒީރު ބޮރިސް ޖޯންސަންއެވެ.
މި ނޫސް ކޮންފަރެންސްގައި އޭނާ ވިދާޅުވީ، ދުނިޔޭގެ ގައުމުތަކުން G7ގެ ގައުމުތަކުގެ ކިބައިން އެދެމުންދަނީ، ކޯވިޑް19އާއި ގުޅުންހުރި ކަންކަމުގައި ވަތަނީ ވިސްނުމާއި އަދި އަމިއްލަ އެދުމަށްވުރެ ދުރަށްވިސްނުމަށް ކަމުގައެވެ.
އެނާ ވިދާޅުވީ މިހަފްތާ ބަންދުގައި ބޭއްވުނު G7ގެ ގަމުތަކުގެ ސަމިޓުޓުގައި 7 ގައުމުންވެސް ވަނީ ދުނިޔޭގެ ފަގީރު ގައުމުތަކަށް ޚާއްސަކޮށްގެން، ސީދާގޮތުން ނުވަތަ ޔޫއެންއިން ކުރިޔަށް ގެންދާ ކޯވެކްސް ޕްރޮގްރާމް މެދުވެރިކޮށް 1 ބިލިއަނަށްވުރެ ގިން ޑޯޒްގެ ވެކްސިން ދުނިޔޭގެ ފޯރުކޮށް ދިނުމަށެވެ.
މީގެތެރޭގައި އިނގިރޭސިވިލާތުން ފޯރުކޮށްދޭނޭ 100 މިލިއަން ޑޯޒްގެ ވެކްސިން ހިމެނިގެންދާނޭ ކަމަށްވެސް އޭނާ ވިދާޅުވިއެވެ.
"މިއީ މުޅި ދުނިޔޭގެ އެންމެންނަށް ވެކްސިން ފޯރުކޮށްދިނުމުގައި އެޅިގެންދާނެ މުހިންމު ފިޔަވަޅެއް،" ޖޯންސަން ވިދާޅުވިއެވެ.
މި ނޫސް ކޮންފަރެންސްގައި ޖޯންސަން ވިދާޅުވެފައިވަނީ، ދުނިޔޭގައި މިވަގުތު ދެވޭ އެންމެ ގިނަމީހުން ބޭނުންކުރާ ވެކްސިނަކީ އިގިރޭސިވިލާތުގެ އޮކްސްފޯޑުގެ އެސްޓްރާ ޒެނެކާ ވެކްސިން ކަމުގައެވެ.
މި ވެކްސިން މުޅި ދުނިޔޭގައި އެންމެ އާންމުކޮށް ބޭނުން ކުރެވެމުންދަނީ، އެންމެ އެކަށީގެންވާ އަގެއްގައި ވިއްކަމުންދަނީ މި ވެކްސިންކަމަށް ވާތީއެވެ. ޖޯންސަން ވިދާޅުވި ގޮތުގައި، މިއީ އެސްޓްރާ ޒެނެކާ ދީލަތި ކަމުގެ ނަތީޖާ ކަމުގައެވެ.
ޔޫއެންގެ ކޯވެކްސް ޕްރޮގްރާމުން ފޯރުކޮށްދޭ ވެކްސިންތަކުގެ %96 އަކީ އެސްޓްރާ ޒެނެކާ ވެކްސިންއެވެ.
މީގެ އިތުރުންވެސް 3 ދުވަހުގެ މުއްދަތަށް ބޭއްވިގެންދިޔަ، ދުނިޔޭގެ އެންމެ މުއްސަދި 7 ގައުމުގެ ވެރިންގެ މި ސަމިޓްގައި ނިންމުނު އެހެނިހެން ކަންކަމުގެ ތެރޭގައި، ދުނިޔޭގެ އެކި ކަންކޮޅުތަކުން، 40 މިލިއަން އަންހެން ކުދިންނަށް ސްކޫލުތަކަށް ދެވޭނެ މަގު ފަހިކުރުންވެސް ހިމެނިފައިވާކަންވެސް ބޮރިސް ޖޯންސަން އިއުލާން ކުރެއްވިއެވެ.
ހަމައެފަދައި، މޫސުމީ ނުރައްކަލުން ދުނިޔެ ސަލާމަތް ކުރުމަށް ކުރަންޖެހޭ ކަންތައްތައްވެސް ވަނީ މި ސަމިޓްގެ އެޖެންޑާގެ އެންމެ ކުރީގައި ހިމަނާފައެވެ. މިގޮތުން، ކާބަންގެ މާއްދާތައް ޖައްވަށް ބޭރުވުން މަދުކުރުމަށް ކުރަންޖެހޭ ކަންތައްތަކާ ގުޅޭގޮތުންވެސް ލީޑަރުންވަނީ އެއްބަސްވުމަކަށް އައިސްފައެވެ.
G7 އަކީމ ދުނިޔޭގެ އެންމެ ކުރިއަރާފައިވާކަމަށް ބުނާ އިގްތިސާދުތައް އޮންނަ 7 ގައުމު އެކުވެގެން އުފްއްދާފައި އޮންނަ ޖަމްއިއްޔާއެކެވެ. މި 7 ގައުމަކީ، އިނގިރޭސިވިލާތް، އެމެރިކާ، ކެނެޑާ، ޖަޕާން، ފްރާންސް،، ޖާރމަނީ އަދި އިޓަލީއެވެ.
އެހެންނަމަވެސް، މި ސަމިޓްގައި އިޔޫގެ އިތުރުން އެހެން ބައެއް ގައުމުތައްވެސް ބައިވެރި ވެއެވެ.
