ކޮރަޕްޝަނާއި ގުޅޭ ގިނަ މައްސަލަތަކެއް ތަހުގީގް ކުރަމުންދިޔަ ފެނަކަ ކޯޕަރޭޝަންގެ އިތުރު މައްސަލަތަކެއް އޭސީސީން ތަހުގީގް ކުރަން ފަށައިފިއެވެ.
އެންޓި ކޮރަޕްޝަން ކޮމިޝަނުން ދިޔައީ ފެނަކައާއި ގުޅުން ހުރި ކޮރަޕްޝަންގެ 22 މައްސަލަ ތަހުގީގުކުރަމުންނެވެ. އޭގެ ތެރެއިން ހަތަރު މައްސަލައެއް ނިންމީ ކޮރަޕްޝަންގެ އަމަލެއް ނުހިމެނޭ ކަމަށެވެ. ދެން ހުރި މައްސަލަތައް އަންނަނީ ތަހުގީގުކުރަމުންނެވެ.
ފެނަކައާއި ގުޅޭގޮތުން އަލަށް ހުށަހެޅިފައިވާ މައްސަލަތަކަކީވެސް މީގެ ކުރިންވެސް ހުށަހެޅިފައިވާފަދަ ކޮރަޕްޝަންގެ މައްސަލަތަކެކެވެ. އެގޮތުން ތަކެތި ހޯދުމުގައި ކޮރަޕްޝަނަށް މަގުފަހިވާގޮތަށް އަމަލު ކޮށްފައިވާ މައްސަލަތަކެއް ވަނީ އޭސީސީއަށް ހުށަހެޅިފައެވެ. އޭގެ ތެރޭއި ހޮޅިތަކެއް ހޯދި މައްސަލަތަކެއްގައި ކޮރަޕްޝަން އެކުލެވޭ މައްސަލައެއްވެސް ހިމެނެއެވެ.
ފެނަކައާ ގުޅޭގޮތުން އޭސީސީ އަށް ކުރިން ހުށަހެޅި ގިނަ މައްސަލަތައް އަމާޒުވީ މެނޭޖިން ޑިރެކްޓަރު އަހުމަދު ސައީދަށެވެ. ނަމަވެސް އެ ތުހުމަތުތައް ދޮގުކޮށް ސައީދު ކުރިން ވިދާޅުވީ އެއީ އޭނާއާ ދެކޮޅަށް ބަޔަކު ރާވައިގެން ހިންގާ އަމަލެއް ކަމަށެވެ.
ސައީދު ވިދާޅުފައިވަނީ ފެނަކަ ކޯޕަރޭޝަނަކީ ވައްކަން ކުރާނެ ކުންފުޏެއް ނޫންކަމަށާއި، ފެނައިގެ އަމާޒަކީ ރައްޔިތުންނަށް ޚިދުމަތް ދިނުން ކަމުގައެވެ. ސައީދު ވިދާޅުވީ ފެނަކައާއި ގުޅޭގޮތުން އަގުވެއްޓޭ ގޮތަށް ބައެއް މީހުން މަސައްކަތް ކުރަމުންދާކަމަށެވެ. މި މަސައްކަތުގައި އެންމެބޮޑަށް އަޅުވަމުންދާ އެއްކަމަކީ ކޮރަޕްޝަނާއި ޚިޔާނާތް ކަމަށާއި، ނަމަވެސް ފެނަކައަކީ އެފަދަ ކަމެއް ކުރާނެ ކުންފުޏެއް ނޫންކަމަށް ސައީދު ވިދާޅުވިއެވެ.
ފެނަކަ ކޯޕަރޭޝަންގައި ކޮރަޕްޝަނަށް މަގުފަހިވާ ގޮތަށް ބައެއް ކަންކަން ހިނގަމުންދާކަން އެންޓި ކޮރަޕްޝަން ކޮމިޝަން (އޭސީސީ)ން ރައީސް އިބްރާހިމް މުހައްމަދު ސޯލިހުގެ ސަމާލުކަމަށް ވެސް މީގެ ކުރިން ވަނީ ގެނެސްފައެވެ.
ފެނަކައިގެ ކޮރަޕްޝަންގެ މައްސަލަތައް ފާހަގަކޮށް އޭސީސީގެ ރައީސް މަރިޔަމް ޝިއުނާ، ރައީސް އިބްރާހިމް މުހައްމަދު ސޯލިހަށް ފޮނުއްވާފައިވާ ސިޓީގައި ވިދާޅުވެފައި ވަނީ ފެނަކައާ ގުޅިގެން ހުށަހެޅި ބައެއް މައްސަލަތައް ތަހުގީގުކޮށްފައިވާ އިރު އަނެއް ބައި މައްސަލަތަކުގެ ތަހުގީގު ކުރިއަށްދާ ކަމަށެވެ. މި މައްސަލަތަކަށް ބަލާއިރު “ފެނަކަ ކޯޕަރޭޝަންގައި ކޮރަޕްޝަނަށް މަގުފަހިވާ ގޮތަށް ބައެއް ކަންކަން ހިނގަމުންދާ ކަން ކޮމިޝަނުގެ ތަހުގީގުތަކުން ފާހަގަކުރެވިފައިވާ” ކަމަށް، ސިޓީގައިވެއެވެ.
ފެނަކަ އިން މުދަލާއި ހިދުމަތް ހޯދުމާއި ރެކްރޫޓްމަންޓް ޕްރޮސެސްގެ ތެރޭގައި ކޮރަޕްޝަނަށް މަގުފަހިވާ ގޮތަށް ހިނގާ ކަންތައްތަކުގެ މައްޗަށް އޭސީސީން ވަނީ ރިޕޯޓެއް ވެސް އެކުލަވާލައިފައެވެ. އެ ރިޕޯޓުގައި، ފެނަކައިގެ ތެރޭގައި ކޮރަޕްޝަންގެ ހާލަތާއި އެ މައްސަލަތައް ތަހުގީގު ކުރުމުގައި އޭސީސީއަށް ދިމާވާ ގޮންޖެހުންތައް ވެސް ވަނީ ހިމަނައިފައެވެ.
ފެނަކައިން އެއިދާރާއާއި ގުޅުންހުރި ކޮރަޕްޝަންގެ މައްސަލަތައް އޭސީސީއަށް ހުށަހެޅުމުން އެކަން ދޮގުކޮށް ބަޔާނެއް ނެރެފައެވެ. އެބަޔާނުގައި ބުނެފައިވަނީ ފެނައިގެ ވެރިންނާއި ގުޅޭގޮތުން ހަގީގަތާއި ޚިލާފް ދޮގުވާހަކަ ދައްކައި އަބުރު ކަތިލަމުންދަނީ ހޯދަމުންދާ ކާމިޔާބުތަކަށް ޙަސަދުވެރިވާ ބަޔަކު ކަމުގައެވެ.
ފެނަކަ ކޯޕަރޭޝަނަކީ ކޮރަޕްޝަނަށް ޒީރޯ ޓޮލަރެންސްގެ ސިޔާސަތު އިއުލާންކޮށްފައިވާ މި ސަރުކާރުގެ ކުންފުނިތަކުގެ ތެރެއިން ކުފުންޏެކެވެ.
One Response
ޤުރުއާނުގެ ނަމުން ނަންދެވިފައިވަނީ ފެނަކައަށް!