އިސްރާއީލުން ގާޒާއަށް ދިން ވަރުގަދަ ހަމަލާތަކުގައި ބޮޑެތި ގެއްލުންތަކެއް ލިބިފައިވާ ގާޒާ އަލުން އާރާސްތު ކުރުމަށްޓަކާ، އުމްރާނީ ތަރައްގީއަށް ބޭނުންވާ ސާމާނުތަކުގެ ގާފިޅާއެއް މިސްރުން ގާޒާއަށް ފޮނުވާފައިވާ ކަމަށް، މިސްރުގެ މީޑިއާތަކުން ރިޕޯޓު ކޮށްފިއެވެ.
މިސްރުގެ މީޑިއާތަކުން އާންމުކޮށްފައިވާ ފޮޓޯތަކުން ފެންނަ ގޮތުގައި، މިސްރުގެ ދިދަ ޖަހާފައިވާ އެތަކެއް ބުލްޑޯޒަރުތަކާއި، ކެރޭނާއި، އަދި ޓްރަކްތައް ބޯޑަރު ހުރަސްކޮށް ގާޒާއަށް ވަނުމަށް ތައްޔާރުވެފައިވަނިކޮށް ވަނީ ދައްކާފައެވެ.
އަދި މި އެއްގަމު އުޅަދުތައް، ރަފާ ބޯޑަރު ހުރަސްކޮށް ގާޒާއަށް ވެދެގެންދިޔައިރު، މި ގާފިލާތަކަށް މަރުހަބާ ކިއުމަށް، ފަލަސްތީނުގެ ރައިޔިތުން ގާޒާގެ މަގުތަކަށް ވަނީ ޖަމާވެފައެވެ. ފަލަސްތީނުގެ ބޯޑަރ އޮފިޝަލުން މައުލޫމާތު ދީފައިވާ ގޮތުގައި، ބޯޑަރު ހުރަސްކޮށް ގާޒާއަށް ވަން ގާފިލާގައި 50 ވަރަކަށް އުޅަދު ހިމެނެއެވެ.
އިސްރާއީލުން ގާޒާއަށް ދީފައިވާ ވަރުގަދަ ހަމަލާތަކުގައި އެތަކެއް އިމާރާތްތަކެއް ބިމާ ހަމަވެ، ފަލަސްތީނުގެ އެތަކެއް ހާސް ރައްޔިތުންނެއް ވަނީ އަމިއްލަ ގެދޮރު ދޫކޮށް ދާންޖެހިފައެވެ. އަދި ހަމަލާ ބަދަލުކުރުން ހުއްޓާލުމާއެކު، އަމިއްލަ ގެދޮރުން ބޭރުވާންޖެހުނު މީހުން އެބުރި ގާޒާއަށް އައިސް، ދިރިއުޅޭނެ ގޮދޮރު ނެތުމުގެ ސަބަބުން އެތައް ބަޔަކަށް ވަނީ ވަގުތީ ބޯހިޔާވަހިކަންވެސް ހަމަޖައްސަން މަޖުބޫރު ވެފައެވެ.
ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، އިސްރާއީލުގެ އުދުވާންގައި، ގާޒާގައި ހުރި، މީހުން ދިރިއުޅޭ ޓަވަރުތަކާއި ގެތަކުގެ ތެރެއިން، މަދުވެގެން 184 ޓަވަރާއި ގެ ވަނީ ބިމާ ހަމަކޮށްލާފައެވެ. އަދި މީގެ އިތުރުން 33 މީޑިއާ ސެންޓަރެއްވަނީ މުޅިންހެން ފުޑުފުޑު ކޮށްލާފައެވެ. މި ތަންތަނުގެ ގެއްލުމުގެ މިންވަރުވެސް 92 މިލިއަން އެމެރިކާ ޑޮލަރަށްވުރެ މަތިވާނެކަމަށްވެސް ބުނެފައި ވެއެވެ.
އަދި މީގެ އިތުރުން، ގާޒާގެ 1،335 ހައުސިންގ ޔުނިޓެއް ވަރަށް ބޮޑަށް ނުވަތަ މުޅިންހެން ކަހަލަ ގޮތަކަށް ހަލާކު ކޮށްލާފައިވާއިރު، އިތުރު 13،000 ހައުސިން ޔުނިޓަކަށް ވަނީ، އެކަށީގެންވާ ވަރުގެ ގެއްލުންތައް ލިބިފައެވެ.
މޭމަހުގެ 10ވަނަ ދުވަހުން ފެށިގެން 11 ދުވަސް ވަންދެން މެދުނުކެޑި އިސްރާއީލުން ގާޒާއަށް ދިން އުދުވާނީ ހަމަލާތަކުގައި ފަލަސްތީނުގެ 250 މީހަކުވަނީ ޝަހީދު ކޮށްލާފައެވެ. މީގެތެރޭގައި 65 ކުޑަކުދިންނާއި 39 އަންހެނުންވެސް ހިމެނެއެވެ. އަދި ފަލަސްތީނުގެ 1،710 މީހަކަށް ވަނީ އަނިޔާވެފައެވެ.
އިސްރާއީލުން ގާޒާއަށް ދެމުންދިޔަ ހަމަލާތަށް ހުއްޓާލުމަށް ހަމާސްއައި އިޒްރާއީލާ ދެމެދު ވެވުނު ސުލްހައިގެ އެއްބަސްވުމަށް އަމަލީސިފަ ގެނައުމަށް އެންމެ މުހިންމު ދައުރެއް އަދާކޮށްފައިވަނީ މިސްރުންނެވެ. އަދި މިސްރުން ބުނެފައިވަނީ ގާޒާ އަލުން އާރާސްތުކުރުމަށް 500 މިލިއަން ޑޮލަރުގެ ފަންޑެއް އެގައުމުން އެކުލަވާލާނެ ކަމަށެވެ.
މިސްރުން ގާޒާގެ އަލުން އާރާސްތުކުރުމުގައި ފޯރުކޮށްދެމުންދާ އެހީތެރިކަމަށްޓަކާ ހަމާސްގެ ތަރުޖަމާން ހާޒިމް ގާސިމްވަނީ އެ ޖަމާއަތުގެ ފަރާތުން މިސްރުގެ ސަރުކާރަށް ޝުކުރު އަދާކޮށްފައެވެ.
ހަމާސް ޖަމާއަތުން ކޮންޓްރޯލް ކުރަމުންދާ، 356 އަކަ ކިލޯމީޓަރުގެ ސަރަހައްދެއްކަމުގައިވާ ގާޒާގައި ފަލަސްތީނުގެ 2 މިލިއަން ރައްޔިތުން ދިރިއުޅެމުން ދެއެވެ.
