އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން، އޭނާ ލޯބިވެރިޔާ ކެރީ ސައިމަންޑްސްއާއި، ވެސްޓް މިންސްޓަރ ކެތެޑްރަލްގައި ބޭއްވުނު ސިއްރު ރަސްމިއްޔާތެއްގައި ކައިވެނި ބައްލަވައިގެންފި ކަމަށް، މީޑީއާ ރިޕޯޓުތައް ބުނެފިއެވެ.
އިނގިރޭސިވިލާތުގެ ގިނަ މީޑިއާތަކުން ރިޕޯޓު ކޮށްފައިވާ ގޮތުގައި، ބޮރިސް ޖޯންސަން ކައިވެނި ބައްލަވައިގެންފައިވަނީ، އޭނާގެ ވަރަށް ގާތް ރައްހުމަތްތެރިން ކޮޅަކާއި އަދި އާއީލީ ބޭފުޅުންގެ ހާޒިރުގައެވެ.
މިޚަބަރާއި ގުޅިގެން އެއްވެސް ކޮމެންޓެއް ކުރުމަށް، ބޮޑުވަޒީރުގެ ރަސްމީ ގެކޮޅުންވަނީ އިންކާރު ކޮށްފައެވެ.
އެހެންނަމަވެސް، އިނގިރޭސި ސަރުކާރުގެ ޕެންޝަން ސެކެޓްރީ ތެރެސެ ކޮފޭ ވަނީ ކައިވެނީގެ އުފަލުގައި ބޮރިން ޖޯންސޮންއަށާއި އަދި ކެރީ ސައިމަންޑްސްއަށް މަރުހަބާ ވިދާޅުވެ ޓުވީޓު ކުރައްވާފައެވެ. އަދި މީގެ އިތުރުން ނޯތު އަޔަރލޭންޑްގެ ފަރސްޓް މިނިސްޓަރ އަލެން ފޮސްޓަރވެސް ވަނީ ބޮރިސް ޖޯންސަންގެ ކައިވެނީގެ އުފަލުގައި މަރުހަބާ ވިދާޅުވެ ޓުވީޓު ކުރައްވާފައެވެ.
ދަ މެއިލްއިން ރިޕޯޓު ކޮށްފައިވާ ގޮތުގައި، މި ރަސްމިއްޔާތަށް ދައުވަތު ދީފައިވަނީ، ކޯވިޑް19ގެ އުސޫލުތަކުގެ ދަށުން އެއްވެސް ރައްމިއްޔާތަކަށް ދައުވަތުދެވޭ އެންމެ ގިނަ އަދަދު ކަމުގައިވާ، 30 މީހުންނަށެވެ.
ކުރިސްޓިއަނުންގެ ސަގާފަތާ އެއްގޮތަށް ބޭވުނު މިރަސްމިއްޔާތަށް ތައްޔާރު ކުރުމުގައި މަސައްކަތް ކޮށްފައިވަނީ ފައްޅިތަކުގެ މަދު އަދަދެއްގެ އޮފިޝަލުން ކަމަށްވެއެވެ.
އަދި އިނގިރޭސިވިލާތުގެ ދަ ސަން ނޫހުން ރިޕޯޓު ކޮށްފައިވާ ގޮތުގައި، މި ކައިވެނީގެ މައުލޫމާތު ދުރާލާ ލިބިފައިވަނީ، ބޮޑުވަޒީރުގެ ގެކޮޅުގެ މަދު އޮފިޝަލުންތަކަކަށެވެ.
ކައިވެނީގެ ހަފްލާ ބޭއްވުމަށް ހަޖެހިފައިވާ ފައްޅި ކަމަށްވާ ވެސްޓްމިންސްޓަރ ކެތެޑްރަލްގައި ތިބި އާންމުން، މެދުރު 13:30ގެ ކުރިން ފައްޅި ދޫކޮށް ދިއުމަށް ވަނީ އެންގިފައި ކަމަށްވެސް ދަ ސަން ނޫހުން ރިޕޯޓު ކޮށްފައިވެއެވެ. އަދި ބޮރިސް ޖޯންސަންގެ ލޯބިވެރިޔާ ސައިމަންޑްސް، ހުދުކުލައިގެ ވެޑިންގ ޑްރެސްގައި މި ރަސްމިއްޔާތަށް ވަޑައިގެންނެވީ އޭގެ ބައިގަޑިއެއްހާ އިރު ފަހުންނެވެ.
މީގެ އިތުރުން، މިއުޒިކް ކުޅޭ މީހުން، ބޮޑުވަޒީރުގެ ގެކޮޅުން، މި ރަސްމިއްޔާތަށް ބޭނުންވާ މިއުޒުކް ކުޅޭ ސާމާނުތަކާއެކީ ދިޔަ މަންޒަރުތައް ވަނީ ފޮޓޯތަކުން ފެނިފައެވެ.
ބޮރިސް ޖޯންސަންއާއި ސައިމަންޑްްސް އެންގޭޖް ވެފައިވާކަން ހާމަކޮށް، އަދި ދެމީހުންގެ ފުރަތަމަ ދަރިފުޅަށް ސައިމަންޑްސް ބަލިވެ އިންކަން 2020 ވަނަ އަހަރުގެ ފެބްރުއަރީމަހު ވަނީ ހާމަ ކޮށްފައެވެ.
އަދި ދެމީހުންގެ ދަރިފުޅު ވިލްފްރެޑް އުފަންވެފައިވަނީ މިއަހަރުގެ އެފްރީލްމަހުއެވެ.
