މާދަމާއިން ފެށިގެން ބެންކް އޮފް މޯލްޑިވްސްގެ ކަސްޓަމަރ ސަރވިސް ސެންޓަރ މެދުވެރިކޮށް ކާޑު ދޫކުރުމުގެ ހިދުމަތް ދޭނެކަމަށް އެ ބެންކުން ބުނެފިއެވެ.
މި ގޮތުން އާދިއްތަ ދުވަހުން ފެށިގެން ބުރާސްފަތި ދުވަހަށް، ކޮންމެ ދުވަހެއްގެ ހެނދުނު 10:00 އިން ފެށިގެން މެންދުރުފަހު 2:00 އާ ހަމަޔަށް ކަސްޓަމަރ ސަރވިސް ސެންޓަރ ހުޅުވާނެ ކަމަށް ބީއެމްއެލުން ބުނެއެވެ.
ބީއެމްއެލްއިން ބުނީ ކަސްޓަމަރުންނާއި މުވައްޒަފުންގެ ރައްކާތެރިކަމަށްޓަކައި ހިދުމަތް ދެމުންދާނީ ކިއުބީ މެދުވެރިކޮށް ދޫކުރާ އޮންލައިން ޓޯކަން އަށްކަމަށެވެ. ޓޯކަން ދޫކުރާނީ ކޮންމެ ދުވަހަކުވެސް ވަކި އަދަދަކަށް ކަމަށް ބީއެމްއެލުން ވަނީ ބުނެފައެވެ. މިގޮތަށް ހިދުމަތް ދިނުމަށް ހަމަޖެހިފައިވަނީ އޮންލައިން ޓޯކަން އާއެކު ޕޮލިސް ޕަރމިޓް އޮންނަ ކަސްޓަމަރުންނަށެވެ.
ހިދުމަތް ހޯދުމަށް ކަސްޓަމަރ ސަރވިސް ސެންޓަރަށް ދާ ކަސްޓަމަރުން މާސްކު އެޅުމާއި، އެ ސެންޓަރުގައި ފާހަގަކޮށްފައިވާ ނިޝާންތަކާ އެއްގޮތަށް ގައިދުރުކަން ބެހެއްޓުމާއި އަމިއްލަ ގަލަން ގެންދިއުމުގެ އިތުރުން ސެނެޓައިޒަރ ބޭނުންކޮށްގެން އަތް ސާފުކުރުމަށް ބެންކުން އެދެއެވެ.
ކޮވިޑް-19 ގެ ބަލީގެ ނުރައްކާތެރިކަމަށް ހުށަހެޅޭ މިންވަރު ކުޑަކުރުމުގެ ގޮތުން އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ ފަރާތްތައް ކާޑު ނެންގުމަށް ބެންކަށް ނައުމަށް އެ ބެންކުން އެދެއެވެ. އަދި މިފަރާތްތަކުން ބެންކަށް ގުޅުއްވައިގެން ކުރިއަށްގެންދިއުމަށްވެސް ބީއެމްއެލުން އެދެއެވެ.
