މާލީގެ ކުރީގެ ލީޑަލު މަގާމުން ދުރުކޮށް އެގައުމަށް ބަޢާވާތެއް ގެނައިތާ 9 މަސްފަހުން އަނެއްކާވެސް، މާލީގެ އަސްކަރިއްޔާއިން އެގައުމުގެ ރައީސާއި ބޮޑުވަޒީރު ހައްޔަރު ކޮށްފައި ވާމަކަށް ޔޫއެންއިންނާއި އެފްރިކަން ޔޫނިއަން އިން ބުނެފިއެވެ.
މާލީގެ ރައީސް ބަހު އެންޑޯވްއާއި ބޮޑުވަޒީރު މޮކްޓާރ އޮއުއާން ހޯމަ ދުވަހު ހައްޔަރު ކޮށްފައި މިވަނީ، ސަރުކާރުގެ މަތީ މަގާމްތަކަށް ބަދަލުތައް ގެނައިއިރު، ފާއިތުވެދިޔަ އަަހަރުގެ އޮގްސްޓުމަހު، ބަޢާވާތް ކުރުމުގައި އިސްކޮށްހުރި، އަސްކަރިއްޔާއަށް ނިސްބަތްވާ ސިފައިންގެ ދެމީހަކު ބާކީ ކުރުމާއި ގުޅިގެންނެވެ. އަދި މިހާރުވަނީ، އަސްކަރިޔާއިން ދެވަނަފަހަރަށް ގައުމުގެ ހުރިހާ ބާރުތަކެއް އަސްކަރިއްޔާގެ ބާރުގެދަށަށް ގެންގޮސްފާނެކަމުގެ ބިރު ހީވެފައެވެ.
މާލީގެ ރައީސާއި އަދި ބޮޑުވަޒީރު ހައްޔަރު ކުރުމާއި ގުޅިގެން ޔޫއެންއާއި އެފްރިކަން ޔޫނިއަން ގުޅިގެން ނެރުނު ބަޔާނެއްގައި ބުނެފައިވަނީ، މާލީގެ ރައްޔިތުންގެ ލީޑަރޝިޕް އެއްވެސް ޝަރުތަކާނުލާ ދޫކޮށްލުމަށް ގޮވާލާފައެވެ. މި ބަޔާނުގައި ބުނެފައިވަނީ، މަޖުބޫރުން އެގައުމުގެ ލީޑަރޝިޕް އިސްތިއުފާ ދިނުންފަދަ އެއްވެސް ހައްލެއް މުޅި ބައިނަލްއަގުވާމީ މުޖަމަޢުންވެސް ބަލައި ނުގަންނާނެ ކަމަށެވެ.
ޔޫއެންއާއި އެފްރިކަން ޔޫނިއަންއިން ނެރެފައިވާ މި ބަޔާނަށް، އެމެރިކާ، އިގިރޭސިވިލާތް، ފްރާންސް، ޖާމަނީގެ އިތުރުން ވެސްޓް އެފްރިކަން ރީޖަނަލް ބްލޮކް، އިކޯވާސްއިންވެސް ވަނީ ތާއީދު ކޮށްފައެވެ.
އަދި މިބަޔާނުގައި ވާގޮތުން، އިކޯވާސްގެ ވަފުދެއް މާލީގެ ވެރިރަށް ބަމަކޯއަށް އަންގާރަ ދުވަހު ޒިޔާރަތްކުރުމަށް މިހާރުވަނީ ހަމަޖެހިފައެވެ.
ޑިޕްލޮމެޓިކް ބައެއް ފަރާތްތަކުންނާއި، އަދި ސަރުކާރުގެވެސް އިސް ބައެއް އޮފިޝަލުން ރޮއިޓާސްއަށާއި އަދި އޭއެފްޕީއަށް މައުލޫމާތު ދީފައިވަނީ، ރައީސް އެންޑޯވްއާއި ބޮޑުވަޒީރު އޮއުއާންގެ އިތުރުން ޑިފެންސް މިނިސްޓަރ ސޮލޭމާން ޑޮއުކޯ ހައްޔަރުކޮށް ބައިތިއްބާފައިވަނީ، ވެރިރަށް ބަމަކޯގެ ރަށް ބޭރުގައިވާ މިލިޓަރީ ބޭސްއެއްގައެވެ.
ބޮޑުވަޒީރު އޮއުއާން ހައްޔަރުކުރުމުގެ ކުރިން އޭއެފްޕީއަށްވަނީ އޭނާއާ ގުޅޭގޮތް ވެފަައެވެ. އެއޭޖެންސީއަށް އޭނާ ބުނެފައިވަނީ އެ ފޯންކޯލުގައި ވާހަކަ ދައްކަމުން ދިޔައިރު، ސިފައިން އޭނާ ހައްޔަރުކުރުމަށް ގޮސްފައިވާ ކަމަށެވެ.
