ޗައިނާއިން އިތުރު ފުރުޞަތުތައް ހޯދުމާ ގުޅޭގޮތުން ސިވިލް ސަރވިސް ކޮމިޝަނުން ޗައިނާ ސަފީރާއި މަޝްވަރާކޮށްފިއެވެ.
ޗައިނާ އިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސަލަންސީ ޖަންގް ލިޖޮންގް އާއި ކޮމިޝަނުގެ ރައީސް މުޙައްމަދު ނާޞިހުއާއި އެކު ބޭއްވި މި ބައްދަލުވުމުގައި، ސިވިލް ސަރވިސް ކޮމިޝަނާއި ޗައިނާ އެމްބަސީއާ ގުޅިގެން ކުރެވިދާނެ މުހިންމު މަސައްކަތްތަކާ ބެހޭގޮތުން މަޝްވަރާކުރެއްވިއެވެ. މިގޮތުން ސިވިލް ސަރވިސްގެ މުވައްޒަފުން ތަމްރީނުކުރުމަށް ޗައިނާއިން އިތުރު ފުރުޞަތުތައް ހޯދުމާ ބެހޭގޮތުންނާއި ޗައިނާ ނެޝަނަލް އެކެޑަމީ އޮފް ގަވަރނަންސް (ސީ.އެން.އޭ.ޖީ) އާއި ސިވިލް ސަރވިސް ކޮމިޝަނާ ދެމެދު ސޮއިކޮށްފައިވާ އެމް.އޯ.ޔޫ އާ ކުރުމާ ބެހޭގޮތުން މަޝްވަރާ ކުރެއްވިއެވެ.
ކޮމިޝަންގެ ރައީސްގެ ވާހަކަ ފުޅުގައި، ރާއްޖޭގެ ތަރައްޤީއަށް، ޚާއްސަކޮށް އިންސާނީ ވަޞީލަތްތަށް ތަރައްޤީކުރުމަށް ޗައިނާއިން ދެއްވަމުންގެންދަވާ އެހީތެރިކަން ފާހަގަކުރައްވާ އެކަމަށް ޝުކުރު އަދާކުރެއްވިއެވެ. ޗައިނާ ސަފީރުގެ ވާހަކަ ފުޅުގައި، ދެޤައުމުގެ ދެމެދުގައި އޮތް ގާތް ގުޅުމަށް އަލިއަޅުވާ ލައްވައި، ކުރިއަށް އޮތް ތާގައިވެސް ވެވެން ހުރި ހުރިހާ ގޮތަކުން ދިވެހިރާއްޖެއަށް އެހީތެރިވަމުން ގެންދަވާނެ ކަމަށް ވިދާޅުވިއެވެ.
މި ބައްދަލުވުމުގައި ސިވިލް ސަރވިސް ކޮމިޝަނުގެ ރައީސް މުހައްމަދު ނާޞިޙު ގެ އަރިހުގައި ކޮމިޝަނުގެ ނައިބު ރަައީސް އަލްފާޟިލް އިބްރާހިމް ރަޝީދު އާއި ކޮމިޝަންގެ މެންބަރު ފާތިމަތު އާމިރާގެ އިތުރުން ޑިރެކްޓަރ އިންޓަރނޭޝަނަލް ރިލޭޝަންސް، ފާތިމާތު އިނާޔާ ބައިވެރިވެ ވަޑައިގެންނެވިއެވެ.
ކޮމެންޓު ފޮނުވާ