ފިލްމީތަރި އަދި ލަވަ ކިޔުންތެރިޔާ ނިކް ޖޯނަސް އަށް ހަފްތާ ބަންދުގައި ކުރިމަތިވީ އެކްސިޑެންޓްގެ ސަބަބުން ލިބުނު އަނިޔާތަށް ހާމަކޮށްފި އެވެ.

މީޑިއާ ރިޕޯޓުތައް ބުނާގޮތުގައި ހުނިހިރު ދުވަހު ނިކަށް ދިމާވި އެކްސިޑެންޓަށްފަހު އޭނާ ހޮސްޕިޓަލަށް ގެންގޮސްފައިވަނީ އެމްބިއުލާންސްގަ އެވެ. ނަމަވެސް ފަރުވާއަށް ފަހު އާދީއްތަ ދުވަހު އޭނާ ހޮސްޕިޓަލުން ވަނީ ގެޔަށް ދޫކޮށްލާފަ އެވެ.

އޭނާ ކޯޗެއްގެ ގޮތުގައި ހަރަކާތްތެރިވާ ދަ ވޮއިސްގެ އެންމެ ފަހުގެ އެޕިސޯޑްގައި ޝޯވްގެ ހޯސްޓް ކުރި ސުވާލަކަށް ޖަވާބުދެމުން ނިކް ބުނީ އޭނާއަށް ދިމާވީ އޭނާގެ ސައިކަލު ކަހާލައިގެން ވެއްޓިގެން ދިމާވި އެކްސިޑެންޓެއް ކަމަށެވެ. އަދި އެކްސިޑެންޓްގައި މޭކަށިގަނޑުގައި ރެނދު އަޅައި އެހެނިހެން އިތުރު ބައެއް ހާނިކަތައް ވެސް ވެފައި ވާކަމަށް ނިކް ވަނީ ބުނެފަ އެވެ.

Nick Jonas opened up about injuries from his bike accident on #TheVoice pic.twitter.com/GuMDcIocqB

— TODAY (@TODAYshow) May 18, 2021

ނިކް ޖޯނަސް މިވަގުތު ހުރީ ލޮސް އެންޖެލަސްގައެވެ. އެހެންނަމަ ވެސް އޭނާގެ އަންހެނުން ޕްރިޔަންކާ ޗޯޕްރާ ހުރީ ލަންޑަނުގަ އެވެ. މިދިޔަ އަހަރުގެ ފަހުކޮޅުން ފެށިގެން ޕްރިޔަންކާ ލަންޑަނުގައި ހުރީ އޭނާގެ ދެތިން ޕްރޮޖެކްޓެއްގެ މަސައްކަތުގައެވެ. ހަމައެހެންމެ މި ދުވަސްކޮޅުގައި ނިކް މަސައްކަތް ކުރަމުންދަނީ ދަ ވޮއިސްގައެވެ. މީގެ އިތުރުން އޭނާގެ އަލްބަލް ސްޕެސްމެން ވަނީ އާންމުކޮށްފަ އެވެ.

ދާދި ފަހުން ނިކް ޖޯނަސް އަދި ޕްރިޔަންކާ ޗޯޕްރާ ވަނީ އިންޑިއާގެ ކޯވިޑް ރިލީފް ފަންޑަށް 1 މިލިއަން ޑޮލަރު ހަދިޔާ ކޮށްފަ އެވެ. މިއީ މި ދެމަފިރިން ފަންޑް ރެއިޒް ކޮށްގެން ހޯދައިފައިވާ ފައިސާ އެވެ. ހަމައެހެންމެ މިހާރު މި ދެމަފިރިންގެ އަމާޒަކީ 3 މިލިއަން ޑޮލަރު ހޯދުންކަމަށްވެސް ވަނީ ބުނެފައެވެ.