އަންނަ މަހު ފަށާ، ޔޫރޯ ފުޓްބޯޅަ މުބާރާތުގައި ސްވިޑެންގެ ފޯވަޑް ޒްލަޓާން އިބްރަހިމޮވިޗަށް ނުކުޅެވޭނެކަން ޔަގީންވެއްޖެއެވެ.
އުމުރުން 39 އަހަރުގެ އިބްރަހިމޮވިޗަށް އަނިޔާވީ އިޓާލިއަން ލީގުގައި އެންމެފަހުން ޔުވެންޓަސް އަތުން 3-0 ގެ ނަތީޖާއަކުން އޭސީ މިލާން މޮޅުވި މެޗުގައެވެ. އެ މެޗުގައި ކަކުލަށް ލިބުނު އަނިޔާއެއްގެ ސަބަބުން އިބްރަހިމޮވިޗް ވަނީ ބަދަލުކޮށްފައެވެ.
އިބްރަހިމޮވިޗަށް ޔޫރޯގައި ނުކުޅެވޭނެކަން ޔަގީންވީ އަނިޔާވުމުގެ ސަބަބުން ހެދި މެޑިކަލް ޓެސްޓްތަކަށް ފަހުއެވެ. ޓެސްތަކުގެ ނަތީޖާއަށް ބެލުމަށްފަހު ސްވިޑެންގެ ޤައުމީ ފުޓްބޯޅަ ޓީމުންވެސް ވަނީ އޭނާ ޓީމުގައި ނުހިމެނޭނެކަން ޔަގީންކޮށްދީފައެވެ.
ގައުމީ ޓީމުން ރިޓާޔާ ކުރިތާ ފަސް އަހަރު ފަހުން، ރިޓަޔާމެންޓް އުވާލުމަށް ފަހު އިބްރޮހިމޮވިޗް އަލުން ސްވިޑެންގެ ގައުމީ ޓީމަށް ކުޅެން ފެށީ މާޗް މަހު އެވެ.
އިބްރަހިމޮވިޗްގެ ކެރިއާގައި ކަކުލުގެ އަނިޔާގެ ގިނަ މައްސަލަތަކެއް ވަނީ ކުރިމަތިވެފައެވެ. މެންޗެސްޓާ ޔުނައިޓެޑްގައި ހޭދަ ކުރިއިރު، ޔޫރޮޕާ ލީގުގައި ބެލްޖިއަމްގެ އަންޑާލެކްޓް އާ ދެކޮޅަށް ކުޅުނު މެޗުގައިވެސް އޭނާގެ ކަކުލަށް އަނިޔާވެ އެ ސީޒަންގައި އޭނާއަށް އުނދަގޫ ކުރިމަތިވިއެވެ.
ޔޫރޯ ފުޓްބޯޅަ މުބާރާތުގައި ސްވިޑެން ހިމެނެނީ ގްރޫޕް އީގައެވެ. ދެން މި ގްރޫޕްގައި ހިމެނޭ ޤައުމު ތަކަކީ ސްޕެއިން ސްލިވީކިއާ އަދި ޕޮލެންޑެއެވެ. ޔޫރޯގައި ސްވިޑެން ކުޅޭ ފުރަތަމަ މެޗު އަންނަ މަހު 14 ގައި ނުކުންނާނީ ސްޕެއިން އާ ދެކޮޅަށެވެ.
