ބޭނުންވާނެ ތަކެތި:
1 ޕެކެޓް މާރީ ބިސްކޯދު
4 ބިސް
400ގ ކުކިންގ ޗޮކްލެޓް (ޑާކް ޗޮކްލެޓް ވެސް ބޭނުން ކުރެވޭނެ)
1 ނެސްލޭ ކްރީމް
1 ޖޯޑު ވިޕިންގް ކްރީމް
2 ޖޯޑު ދިޔާ ކިރު (ފިނިކޮށްފައި)
100ގ ކެޝޫނަޓްސް
150ގ އަންސޯލްޓެޑް ބަޓަރ
ތައްޔާރުކުރާނެ ގޮތް:
އެންމެ ފުރަތަމަ ބިސްކޮޅު ބޯތައްޓަކަށް އެޅުމަށްފަހު ރަނގަޅަށް ގިރާލާށެވެ. އަދި އޭގެ ތެރެއަށް ނެސްލޭ ކްރީމް އެޅުމަށްފަހު ބަހައްޓާށެވެ. ދެން ކުކިންގ ޗޮކްލެޓް (ނުވަތަ ޑާކް ޗޮކްލެޓް) ކޮޅު ތަވާއެއްގައި މަޑު ގިނީގައި ކައްކާ ދިޔާ ކޮށްލުމަށްފަހު ކުރިން އެއްކުރި ބިހާއި ނެސްލޭ ކްރީމްގެ ތެރެއަށް އަޅާލާށެވެ. އަދި އޭގެ ތެރެއަށް ވިޕިންގ ކްރީމް އެޅުމަށްފަހު އެއްކޮށްލާށެވެ.
ދެން ކެޝޫނަޓް ކޮޅު ކުދިކުދިކޮށް ކޮށާލުމަށްފަހު ހަނާކޮއްލާށެވެ. އެއަށްފަހު ޓްރޭއެއްގެ ފޫ ފުރޭވަރަށް އޭގެ އެތެރެއަށް ކުރިން ހެދި މިކްސްޗަރގެ އެތިކޮޅެއް އަޅާލާށެވެ.
ދެން މާރީ ބިސްކޯދު ކޮޅު ކިރުގައި ފޯކޮއްލުމަށްފަހު ޗޮކްލެޓް މިކްސްޗަރ ގެ މަތީގައި ރީތިކޮށް ފަތުރާލާށެވެ. ބިސްކޯދު ތަކުގެ މައްޗަށް އަނެއްކާވެސް ޗޮކްލެޓް މިކްސްޗަރ އެޅުމަށްފަހު އަނެއްކާވެސް އޭގެ މަތީގައި ބިސްކޯދު ފޯކުރުމަށްފަހު ފަތުރާލާށެވެ.
އަދި އަނެއްކާވެސް ޗޮކްލެޓް އެޅުމަށްފަހު އެންމެ ފަހުން އޭގެ މައްޗަށް ހަނާކޮށްފައި ހުރި ކެޝޫނަޓްކޮޅު އަޅާލާށެވެ. އަދި 3 ގަޑިއިރު ވަންދެން ފްރިޖްގައި ފިނިކޮށްލާށެވެ.
