ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ސެމީ ފައިނަލުގެ ފުރަތަމަ ލެގުގައި ސްޕެއިންގެ ރެއާލް މެޑްރިޑާއި އިނގިރޭސިވިލާތުގެ ޗެލްސީ ބައްދަލުކުރި މެޗު އެއްވަރުވެގެން ނިިމިއްޖެއެވެ.
ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް އާއި ޗެލްސީ ބައްދަލުކުރި މެޗު އެއްވަރުވީ 1-1 ގެ ނަތިޖާއަކުންނެވެ.
މި ނަތީޖާއާއެކު ފައިނަލުގެ ފުރުޞަތު މިހާރު ބޮޑީ ޗެލްސީއަށެެވެ. އެއީ މިހާރު މިއޮތް ނަތީޖާއިން އަވޭ ގޯލުން ޗެލްސީއަށް ކުރި ލިބޭތީއެެވެ. ޗެލްސީގެ ދަނޑުގައި ކުޅޭ މެޗު ލަނޑެއް ނުޖެހި އެއްވަރުވިޔަސް ޗެލްސީ ފައިނަލަށް ދަތުރުކުރާނެއެވެ. އިތުރު ވަގުތުގެ ދެ ހާފް ކުޅެން ޖެހޭނެ ހަމައެކަނި ނަތީޖާ އަކީ އެ މެޗު 1-1 އިން އެއްވަރުވެގެންނެވެ. އެ އަށް ވުރެ ބޮޑު ނަތީޖާ އަކުން އެއްވަރުވެއްޖެނަމަ ފައިނަލުން ފުރުސަތު ލިބޭނީ ރެއާލަށެވެ.
މި މެޗުގައި ފުރަތަމަ ލަނޑު ޖަހާ ލީޑު ނެގީ ޗެލްސީންނެވެ. ފުރަތަމަ ހާފުގެ 14 ވަނަ މިނެޓުގައި ޗެލްސީއަށް މި ލަނޑު ކާމިޔާބުކޮށްދިނީ، ކްރިސްޓިއަން ޕުލިސިޗްއެވެ. އޭނާ މި ލަނޑު ކާމިޔާބުކުރީ، އެންޓޯނިއޯ ރޫޑިގާ މަތިން ވައްޓާލި ބޯޅަ ހިފައިގެން އޭރިއާތެރެއަށް ވަދެ ކީޕަރު ކޯޓުއާ ކައިރިން ނައްޓާފައި ގޮހެވެ.
ޗެލްސީން ލަނޑު ޖަހާ ލީޑު ނެގުމާއެކު ރެއާލުން ވަނީ ކުޅުން ރަނގަޅުކޮށް ގިނަ ވަގުތު ބޯޅަ ކޮންޓްރޯލްކޮށްގެން ކުޅެން ފަށާފައެވެ. އޭގެ ނަތީޖާއެއްގެ ގޮތުން، ފުރަތަމަ ހާފް ނިމުމުގެ ކުރިން ރެއާލުން ވަނީ ލަނޑެއް ޖަހާ އެއްވަރުކޮށްފައެވެ. މި ލަނޑު މެޗުގެ 29 ވަނަ މިނެޓުގައި ރެއާލަށް ކާމިޔާބުކޮށްދިނީ ބެންޒެމާއެވެ.
މާދަމާރޭ ކުޅޭ ދެ ވަނަ ސެމީ ފައިނަލުގައި މެންޗެސްޓާ ސިޓީ ބައްދަލުކުރާނީ ޕީއެސްޖީއާ އެވެ.
