ރާއްޖޭގެ 3 ސަރަހައްދެއްގައި 200 ވުރެ ގިނަ އިންޑިޔާގެ ސިފައިން ތިބިކަމަށް 2023 ވަނަ ރިޔާސީ އިންތިޚާބުގައި ވާދަކުރައްވާ ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެ އެވެ.
ރާއްޖޭގެ 77 ވަނަ މިނިވަން ދުވަހުގެ ތަހުނިޔާ ދިވެހި ރައްޔިތުންނަށް އަރިސް ކުރައްވައި އުމަރު ނަސީރު ފޮނުވި ވީޑިއޯ މެސެޖްގައި ވިދާޅުވީ މިޒަމާނަކީ ކަނޑިޔާއި ބަޑި ހިފައިންގެން ޤައުމުތަކަށްއައި ހަމަލާދޭ ޒަމާނެއް ނޫންކަމަށެވެ. މާޒީގައި ރާއްޖެ އަޅުވެތި ކުރިގޮތަށް ކަނޑިޔާއި ބަޑި ހިފައިގެން އަރާ ހިފުމަށްވުރެ މާ ނުރައްކާތެރިކޮށް ރާއްޖޭގެ މިނިވަންކަމާއި ކުޅުމަށް މަސައްކަތް ކުރަމުންދާކަމަށް އުމަރު ވިދާޅުވިއެވެ.
ޕޯޗުގީޒުމް ރާއްޖެއަށް ހަމަލާދިނީ ކަނޑިޔާއި ބަޑިން. އެކަމަކު މިޒަމާނުގައި ޤައުމުތަކަށް ހަމަލާ ދެނީ ކަނޑިޔާއި ބަޑިޔަކުންނޫން. މިޒަމާނުގައި އެހެނިހެން ނުސީދާ ގޮތްތަކުން ޤައުމުތަކަށް އަރައި ޤައުމުތައް ހިފަނީ.
– އުމަރު ނަސީރު
އުމަރު ވިދާޅުވީ މިއަދު ރާއްޖޭގެ ރައްޔިތުން މިނިވަންކަމާއިމެދު އަނެއްކާވެސް ސުވާލު އުފައްދައި ކަންބޮޑުވާން ޖެހިފައިވަނީ އިންޑިޔާގެ ގިނަ އަދަދެއްގެ ސިފައިން ރާއްޖޭގައި ހަރަކާތްތެރިވުމުވެ. މިއަދުވެސް ރާއްޖޭގެ 3 ސަރަހައްދެއްގައި 200 އިންޑީޔާ ސިފައިން ހަރަކާތްތެރިވާކަމީ މިނިވަންކަމަށް އޮތް ވަރަށްބޮޑު ގޮންޖެހުމެއްކަމުގައި އުމަރު ވިދާޅުވިއެވެ. މިކަމަކީ ދިވެހި ރައްޔިތުންނާއި ދިވެހި ދައުލަތުންވެސް ހުއްޓުވަންޖެހޭ ކަމެއްކަމަށް އުމަރު ވަނީ ވިދާޅުވެފަ އެވެ.
މިއަދު އަޅުގަނޑު މިވާހަކަދައްކާއިރު އިންޑިޔާގެ 200 ސިފައިން ދިވެހި ރާއްޖޭގެ 3 ސަރަހައްދެއްގައި ރުކުރުވަލާފައިވޭ. މިއީ ދިވެހި ރާއްޖޭގެ މިނިވަންކަމަށް އޮތް ވަރަށް ބޮޑު ގޮންޖެހުމެއް. މިއީ އަޅުގަނޑުމެން ހުއްޓުވަންޖެހޭކަމެއް. ﷲ އިރާދަ ކުރެއްވިއްޔާ މިޤައުމުގެ މިނިވަންކަން ދިފާއު ކުރެއްވުމުގައި އަބަދުވެސް މިޤައުމުގެ ރައްޔިތުން ތެދުވާނެ.
– އުމަރު ނަސީރު
އުމަރު ނަސީރަކީ ރާއްޖޭގައި އިންޑިޔާގެ ސިފައިން ތިބުމާއި ދެކޮޅަށް އެންމެ ބޮޑަށް ވަކާލާތު ކުރައްވަމުންދާ އެއްބޭފުޅާއެވެ. ރާއްޖެ ހިފަން އިންޑިޔާބަޔަކު އަންނަނަމަ އެބަކު މަރާލާފައިވެސް މިފަސްގަނޑު ދިވެހިން ހިމާޔަތް ކުރާނެ ކަމުގައި އުމަރު ވަނީ ވިދާޅުވެފައެވެ.
އިންޑިއާއަށް ރާއްޖެ ހިފިދާނެކަމަށް މިނިސްޓަރ ފައްޔާޟާއި މާރިޔާ ވިދާޅުވެފައިވާއިރު މިހާރުގެ ސަރުކާރުން ކުރަމުންދާ ކަންކަމުގެ ތެރެއިން އެންމެ ބޮޑު ފާޑުކިޔުމެއް އަމާޒުވަމުންދާ ކަމަކީވެސް އިންޑިޔާއާއި ރާއްޖެއާ ދެމެދު ބާއްވަމުންދާ ގާތް ގުޅުމެވެ. މިކަމުގައި އަޑިނޭނގޭ ކަންތައްތަކެއް އޮތްކަމަށް ގިނަބަޔަކު ތުހުމަތުކުރަމުން ގެންދެއެވެ. އިންޑިޔާގެ ސިފައިން ރާއްޖޭގައި ތިބިކަމަށް ތުހުމަތުކުރަމުންދާއިރު، ޑިފެންސް މިނިސްޓްރީއިންވެސް މިހާތަނަށް އެވާހަކަ ދޮގުކޮށްފައެއްނުވެއެވެ.
ރާއްޖޭގައި އިންޑިއާ ސިފައިން ތިބުމާ ދެކޮޅަށް "އިންޑިއާ އައުޓް"ގެ ނަމުގައި ސޯޝަލް މީޑިއާގައި ދަނީ ކެމްޕެއިނެއް ހިންގަމުންނެވެ.
އިންޑިއާ ސިފައިން ރާއްޖޭގައި ތިބި އަދަދާއި އެމީހުންނަށް ކުރަމުން އަންނަ ޚަރަދު އޮޅުންފިލުވުމަށް އޮންލައިން ނޫހަކުން އިންފޮމޭޝަން ކޮމިޝަނަށް ހުށަހެޅި މައްސަލަ އާއި ގުޅިގެން ޑިފެންސް މިނިސްޓްރީގެ އިންފޮމޭޝަން އޮފިސަރ ވިދާޅުވީ، އިންޑިއާ ސިފައިންގެ މައުލޫމާތު ހާމަކޮށްފި ނަމަ މި ދެޤައުމުގެ ދެމެދުގައި އޮތް ގުޅުމަށް ބުރޫއަަރާފާނެ ކަމަށެވެ.
