1998ވަނަ އަހަރު، ކެންޔާ އަދި ޓެންޒޭނިއާގައި ހުންނަ އެމެރިކާގެ އެމްބަސީގައި ބޮން ގޮއްވާލުމާއި އަދި 2000 ވަނަ އަހަރު، ހަގުރާމަ މަތީ މަނަވަރު ޔޫއެސްއެސް ކޯލްއަށް ދިން ޓެރަރިސްޓު ހަމަލާއާއި، އަދި މީގެ އިތުރުން އެމެރިކާގެ ރައްޔިތެއްކަމުގައިވާ ޖޯން ގްރާންވިލޭގެ މަރުހާދިސާއާއި ގުޅިގެން، މި ހާދިސާތަކުގައި މަރުވި އެމެރިކާގެ ރައްޔިތުންގެ އާއިލާތަކަށް ބަދަލުގެ ގޮތުގައި، 335 މިލިއަން އެމެއިކާ ޑޮލަރު، ސޫދާން ސަރުކާރުން އެމެރިކާ ސަރުކާރަށް ދައްކާފައިވާ ކަމަށް، ސެކެޓްރީ އޮފް ސްޓޭޓް ބްލިންކަން ވިދާޅު ވެއްޖެއެވެ.
"އަހަރުމެން ދެކޭ ގޮތުގައި، މި އެހިތެރިކަމުގެ ސަބަބުން، އެއާއިލާތަކަށް ކުރިމަތިވެރިޔަ ހިތާމަތަކަށް ކޮންމެވެއް ވަރެއްގެ ތަސައްލީއެއް ލިބިގެންދަނެ،" ބްލިންކަން ނެރުއްވި ބަޔާނެއްގައި ވިދާޅުވެފައި ވެއެވެ. "އަދި މި ބޮޑެތި ގޮންޖެހުންތަކަށް މާޒީއަށް ދޫކޮށްލުމަށްފަހު، އެމެރިކާއާއި ސޫދާންގެ ގުޅުމުގެ މުޅިން އާ ސަފްހާއެއް އަލުން ފެށިގެންދާނެ،" ބްލިންކަން ވިދާޅުވެފައި ވެއެވެ.
އެމެރިކާއިން ވަނީ، އެގައުމުން ކަޑައަޅާފައިވާ، ޓެރަރިޒަމަށް ހިތްވަރުދޭ ގައުމުތަކުގެ ލިސްޓުން ރަސްމީކޮށް ފާއިތުވެދިޔަ އަހަރުގެ ޑިސެމްބަރު މަހު އުނިކޮށްފިއެވެ.
ސޫދާން މިލިސްޓުން އުނިކޮށްފައި ވަނީ، އެމެރިކާއިން ކަޑައަޅާފައި އޮންނަ ބްލެކްލިސްޓުގައި ސޫދާންގެ ނަން ހިމެނިތާ 27 އަހަރު ފަހުންންނެވެ.
އެމެރިކާގެ ޓެރަރިޒަމަށް ހިތްވަރުދޭ ގައުމުގެ ތަކުގެ ލިސްޓުން ސޫދާންގެ ނަން އުނިކުރުމަކީ، އެގައުމުގެ ކުރީގެ ރައީސް އުމަރު އަލް-ބަޝީރު ވެރިކަމުން ދުރުކުރުމަށްފަހު ވެރިކަމަށް އައި، އަދި މިހާރުގެ އިންތިގާލީ ސަރުކާރުގެ ވަރަށް ބޮޑު އުއްމީދެކެވެ. އުމަރު އަލް-ބަޝީރުގެ ވެރިކަން ނިމުމަކަށް އައީ، އެތަކެއް ދުވަހެއް ވަންދެން އޭނާގެ ވެރިކަމާ ދެކޮޅަށް ސޫދާންގައި ކުރިޔަށް ދިޔަ މުޒާހިރާތަކަށް ފަހުގައެވެ.
އެމެރިކާއިން އެންމެ ފުރަތަމަ ސޫދާން ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި ހިމަނާފައިވަނީ، އެގައުމުގެ ސަރުކާރުން އުސާމާބިން ލާދިންއަށް ހިމާޔަތް ދެމުންދާކަމަށް ތުހުމަތުކޮށް 1993 ވަނަ އަހަރުއެވެ. އެއީ އެގައުމުގެ ވެރިކަމާ ކުރީގެ ރައީސް އަލް ބަޝީރު ހަވާލުވެވަޑައިގަތްތާ 4 އަހަރު ފަހުންނެވެ. އަދި އެމެރިކާއިން ވަނީ ސޫދާންއިން އަލްގައިދާއަށް މާލީ ގޮތުންނާއި އަދި އެނޫން ގޮތްގޮތުންވެސް އެހީތެރިކަން ފޯރުކޮށްދެމުންދާ ކަމަށް ތުހުމަތު ކޮށްފައެވެ. މީގެއިތުރުން އަލްގައިދާއިން، 1998 ވަނަ އަހަރު ޓެންޒޭނިޔާގެ ދާރުއްސަލާމްގައި ހުންނަ އެމެރިކާގެ އެމްބަސީގައި ބޮންގޮއްވާލި ހާދިސާއަށާއި އަދި މީގެ އިތުރުން 2000 ވަނަ އަހަރު ޔަމަނުގެ އަދަނުގައި ބަދަރުކޮށްފައި އޮތް އެމެރިކާގެ ހަގުރާމަމަތީ މަނަވަރު ޔޫއެސްއެސް ކޯލްއަށް ހަމަލާދިނުމަށް ސޫދާނުގެ އޭރުގެ ސަރުކާރުން އެހީތެރިކަން ފޯރުކޮށްދީފައި ވާކަމަށްވެސް އެމެރިކާގެ ސަރުކާރުން ތުހުމަތު ކުރެއެވެ.
ސޫދާނާއި ދެކޮޅަށް އެމެރިކާއިން އަޅާފައިވާ އިގްތިސާދީ ދަތިކުރުމުގެ ފިޔަވަޅުތަކަށް އެމެރިކާގެ ކުރީގެ ރައީސް ބަރަކް އޮބާމާ ވަނިީ އެމަނިކްފާނުގެ ވެރިކަމުގެ އެންމެ ފަހު ހަފްތާގައި 2017 ވަނަ އަހަރު ލުއިތަކެއް ދެއްވާފައެވެ.
މިދިޔަ އަހަރުގެ އޮކްޓޯބަރު މަހު އެމެރިކާގެ އެރުގެ ރައީސް ޓްރަމްޕް ވިދާޅުވެފައިވަނީ، ހަރުދަނާ ފިޔަވަޅުތަކެއް އަޅަމުންދާ ސޫދާންގެ މިހާރުގެ ސަރުކާރުން އެމެރިކާގެ ޓެރަރިޒަމްގެ ޝިކާރައަކަށް ވެފައިވާ ފަރާތްތަކަށާއި އާއިލާތަކަށް 333 މިލިއަން ޑޮލަރު ދެއްކުމަށް އެއްބަސް ވެފައިވާ ކަމަށާއި، މިފައިސާ ޑިޕޮސިޓް ކުރުމާއިއެކު، ބަދަލެއްގެ ގޮތުން ސޫދާންގެ ނަން ޓެރަރިޒަމަށް ހިތްވަރުދޭ ގައުމުތަކުގެ ލިސްޓުން އުނިކުރުމަށް ނިންމާފައި ވާކަމަށެވެ. އަދި މިއީ އިންސާފު ހޯދުމުގައި އެމެރިކާގެ ރައްޔިތުންނަށް ލިބިގެންދިޔަ ވަރަށް ބޮޑު ކާމިޔާބީއެއްގެ ގޮތުގައި ޓްރަމްޕް ސިފަކުރައްވާފައި ވެއެވެ. އަދި ވިދާޅުވެފައިވަނީ މިއީ ސޫދާނުން ކުރިޔަށް އެޅި ފިޔަވަޅެއް ކަމުގައެވެ.
