މިހާރު އެއްބަސްވެފައިވާ މުއްދަތުގައި، އަފްގާނިސްތާނުގައި ތިބި ގައުމުން ބޭރުގެ ސިފައިން އެގައުމުން ނުފާބައިފިނަމަ، އަލުން ހަގުރާމަ ފަށާނެކަމުގެ އިންޒާރު ތާލިބާނުން ދީފިއެވެ.
ތާލިބާނުން މި އިންޒާރު ދީފައި މިވަނީ، އަފްގާނިސްތާނުގައި މިހާރުތިބި އެމެރިކާ ސިފައިން، މީގެކުރިން ވޮޝިންޓަނާއެކީ އެއްބްސްވެފައިވާ ގޮތަށް، 1 މޭގެ ކުރިން އެގައުމުން ނުބޭލިދާނެކަމުގެ އިޝާރާތެއް އެމެރިކާގެ ރައީސް ޖޯ ބައިޑްން ދެއްވާފައި ވަނިކޮށެވެ.
މޭ 1 އާހަމައަށް ސިފައިން ނުބޭލިއްޖެ ނަމަ، "ގައުމު މިނިވަން ކުރުމަށްޓަކާ ހަގުރާމަ ކުރުން ނޫންގޮތެއް ނޯނާނެ،" ހުކުރު ދުވަހު ނެރެފައިވާ ބަޔާނެއްގައި ތާލިބާނުން ބުނެފައި ވެއެވެ.
ފާއިތުވެދި ހަފްތާގެ ބުރާސްފަތިދުވަހު، އެމެރިކާގެ ރައީސް ޖޯ ބައިޑްން ވިދާޅުވެފައިވަނީ، ފާއިތުވެދިޔަ، ޓްރަމްޕްގެ ސަރުކާރާއެކީ އެއްބަސްވެފައިވާ ގޮތަށް، އަންނަ މޭމަހު 1 ވަނަ ދުވަހުގެ ކުރިން އަފްގާނިސްތާނުން އެމެރިކާ ސިފައިން ބޭލުމަކީ ފަސޭހަކަމެއް ނޫން ކަމުގައެވެ.
"އެ ގައުމުގައި ދިގު މުއްދަތަކަށް ތިބުމަކީ އަހަރެންގެ މަގުސަދެއް ނޫން،" ބައިޑްން ވިދާޅުވިއެވެ. "އަހަރުމެން އެގައުމުން ފައިބާނަން، އެހެންނަމަވެސް، ސުވާލަކީ އަހަރުމެން ފައިބާނީ ކޮން އިރަކުންތޯ." އަންނަ އަހަރުވެސް އެމެރިކާ ސިފައިން އަފްގާނިސްތާނުގައި ތިބޭނެތޯ ކުރެވުނު ސުވާލުގެ ޖަވާބުގައި ބައިޑްން ވިދާޅުވެފައި ވެއެވެ. "އަހަރެން އަދި ބުނާކަށްނެތި ތިބޭނެ ކަމަކަށް."
ތާލިބާނުން ބުނެފައިވަނީ، ފާއިތުވެދިޔަ އަހަރު ވެފައިވާ މި އެއްބަސްވުމަށް އެޖަމާއަތުން އިހުތިރާމް ކުރާނެ ކަމަށެވެ. އަދި ޒަމާންވީ މިހަމަނުޖެހުން ނިމުމަކަށް ގެނައުމަށް އޮތް އެންމެ ކުރު މަގަކީވެސް މިއީކަމުގައި ތާލިބާނުން ބުނެފައި ވެއެވެ.
ހަމަނުޖެހުން ދިގު ދެމިގެން ގޮސްފިނަމަ، "އޭގެ ޒިންމާ އުފުލަން ޖެހޭނީ މި އެއްބަސްވުމާއި ޚިލާފުވާ ބައެއް،" ތާލިބާނުންގެ ބަޔާނުގައި ބުނެފައި ވެއެވެ.
2020 ވަނަ އަހަރުގެ ފެބްރުއަރީ މަހު، އޭރުގެ ރައީސް ޑޮނަލްޑް ޓްރަމްޕްގެ ސަރުކާރާ އެކީ ކުރެވުނު މަޝްވަރާތަކަށްފަހު، އެމެރިކާއިން އެއްބަސްވެފައިވަނީ، އަފްގާނިސްތާނުގައި މިހާރު ބާކީތިބި 2،500 ސިފައިން މިއަހަރުގެ މޭމަހު 1 ވަނަ ދުވަހުގެ ކުރިން ބޭލުމަށެވެ.
މި އެއްބަސްވުމުގައި ވާގޮތުން، ބަދަލެއްގެ ގޮތުގައި ތާލިބާނުންވަނީ، ހަމަ ނުޖެހުންތަކާ ދުރަށް ގޮސް، އަލްގައިދާފަދަ ޖަމާއަތްތަކަށް، އެމެރިކާއާއި އެމެރިކާގެ ބައިވެރިންނަށް ހަމަލާދިނުމަށް އަފްގާނިސްތާނުގެ ބިން ބޭނުން ކުރުމުގެ ފުރުސަތު ނުދިނުމަށާއި އަދި އަގާނިސްތާނުގެ ސަރުކާރާއެކީ މަޝްވަރާތައް ފެށުމަށް ވަނީ އެއްބަސް ވެފައެވެ.
އެހެންނަމަވެސް، މި އެއްބަސްވުމަށްފަހވެސްު، އަފްގާނިސްތާނުގައި ހިގަމުންދާ ހަމަނުޖެހުންތައް ހުއްޓުމަކަށް އައިސްފައެއް ނުވެއެވެ. އަދި ފަހަކަށް އައިސް، ނޫސްވެރިންނާ، އެހީދޭ ޖަމާއަތްތަކުގެ މުވަޒަފުންނާއި އަދި ސަރުކާރު މުވައްޒަފުން މެރުން ވަނީ އިތުރު ވެގެން ގޮސްފައެވެ.
