ބޭންކް އޮފް މޯލްޑިވްސް، ބީއެމްއެލް މެދުވެރިކޮށް ދޫކުރާ އީއައިބީ ކޯވިޑް ރިލީފް ލޯނަށް އެދި ހުށަހަޅާ ފޯމު ބަލައިގަތުން މިއަދުން ފެށިގެން ހުއްޓާލައިފި އެވެ.
ބީއެމްއެލުން ބުނީ މިލޯނަށް އެދި ހުށަހަޅާ ފޯމު ބަލައިގަތުން ހުއްޓާލީ އީއައިބީ ކޮވިޑް ރިލީފް ލޯނުގެ ފަންޑަށް ކަނޑައެޅިފައިވާ އަދަދު ހަމަވުމާގުޅިގެން ކަމަށެވެ.
އީއައިބީ ލޯނަކީ ޔޫރަޕިއަން އިންވެސްޓްމަންޓް ބެންކް، އީއައިބީގެ ފަންޑުން ސަރުކާރުގެ އެހީތެރިކަމާއެކު ކޮވިޑް ރިލީފް ސަޕޯރޓްގެ ދަށުން ކުދި ވިޔަފާރިއާއި މެދުފަންތީގެ ވިޔަފާރިތަކަށް އަމާޒުކޮށް ތައާރަފްކުރި ލޯނެކެވެ.
އީއައިބީ ކޯވިޑް ރިލީފް ލޯނު ތަޢާރަފްކުރީ މިދިޔަ ނޮވެމްބަރު މަހު އެވެ. އީއައިބީ ކޯވިޑް ރިލީފް ލޯނު ފަންޑަށް ކަނޑައެޅިފައިވާ އަދަދު ހަމަވުމާއެކު، ލިބިފައިވާ އެޕްލިކޭޝަންތައް އިވެލުއޭޓްކުރުމުގެ އެންމެހާ މަސައްކަތްތައް ނިންމުމަށްޓަކައި މިލޯނަށް އެދި ހުށަހެޅުން 29 ޑިސެންބަރު 2020 ވަނަ ދުވަހު ވަނީ ވަގުތީ ގޮތުން މެދުކަނޑާލާފައި އޮތުމަށްފަހު އަލުން މި ލޯނަށް ހުޅުވާލާފައި ވަނީ މިމަހުގެ ކުރީކޮޅުއެވެ.
ވިޔަފާރިތަކަށް 15.42 މިލިއަން ރުފިޔާއާ ހަމައަށް ފައިނޭންސް ދޫކުރާ މި ލޯނަށް ކަނޑައެޅިފައިވަނީ %6 ގެ ކުޑަ އިންޓްރެސްޓް ރޭޓެކެވެ. އަދި ލޯނަށް އަނބުރާ ފައިސާ ދެއްކުމަށް 4 އަހަރާއި 7 އަހަރާ ދެމެދުގެ މުއްދަތެއް ލިބިގެންދާނެއެވެ.
ކޮމެންޓު ފޮނުވާ