އާމިރު ޚާނާއި ޖޫހީ ޗާވްލާ އަކީ ބެލުންތެރިން ބަލައިގަތް އޮންސްކްރީން ކަޕަލް އެކެވެ. އެންމެ ފުރަތަމަ އާމިރު އަދި ޖޫހީ އެކުގައި ފެނިގެން ދިޔައީ ހިންދީ ފިލްމު "ގަޔާމަތްސޭ ގަޔާމަތް" ތަކް އިންނެވެ. އެހެންނަމަވެސް ފަހުން މި ދެމީހުން 7 ވަރަކަށް އަހަރުވަންދެން ވާހަކަ ނުދައްކާ ތިބީ ކީއްވެގެންކަން އިނގޭހެއްޔެވެ؟
ރުބާރު ރޯޝަނީގެ ޑޮކިއުމަންޓަރީގައި ވާހަކަ ދައްކަމުން އާމިރު ބުނެފައިވަނީ މި ދެމީހުން ވާހަކަ ދެއްކުން ހުއްޓާލީ ޖެހުނު ވަރަށް ކުޑަކުޑަ މައްސަލައަކާއި ގުޅިގެންކަމަށެވެ. އެގޮތުން އާމިރު ބުނީ ޖޫހީއާއި ވާހަކަ ދެއްކުން ހުއްޓާލީ ފިލްމް "އިޝްގް"ގެ ޝޫޓިންގެ ތެރޭގައި އުފެދުނު ހިތްހަމަ ނުޖެހުމަކާ ގުޅިގެންނެވެ.
އިތުރަށް ވާހަކަ ދައްކަމުން އާމިރު ބުނެފައި ވަނީ އެ މައްސަލައިގެ ސަބަބުން ސެޓުގައި ދެމީހުން ދިމާވިޔަސް ވާހަކަ ނުދައްކާ ކަމަށެވެ. އަދި ހަމަ އެކަނި ވާހަކަ ދައްކަނީ އެކްޓް ކުރާ ގަނޑީގައި ކަމަށް އާމިރު ވަނީ ބުނެފައެވެ. ބްރޭކު ގަނޑީގައިވެސް ޖޫހީ އައިސް ކައިރީގައި އިށީނދެއްޖެނަމަ އޭނާ ތެދުވެގެން ދާކަމަށާއި އަބަދުވެސް ޖޫހީއާއި ދުރުގައި ހުރެވޭތޯ ބަލާކަމަށްވެސް އާމިރު ވަނީ ބުނެފައެވެ. އެހެންނަމަވެސް މިހާރު އެކަން ހަނދާންވުމުން ހެވޭ ކަމަށްވެސް އާމިރުވަނީި ބުނެފައެވެ.
މި ދެމީހުން އަލުން ވާހަކަ ދައްކަން ފެށީ 2002 ވަނަ އަހަރުގައި އާމިރު ޚާނާއި ރީނާ ދައްތާގެ ވަރިވުމާއި ގުޅިގެންނެވެ. އިންޓަވިއުއެއްގައި ވާހަކަ ދައްކަމުން އާމިރު ބުނެފައިވަނީ ޖޫހީއަށް ރީނާ އަދި އާމިރު ވަރިވި ޚަބަރު ލިބުމުން އޭނާއަށް ގުޅިކަމަށެވެ. އަދި ހާލު ބަލައި ރަހުމަތްތެރިއަކަށް އެންމެ ބޭނުން ވި ދުވަހު އޭނާގެ ކައިރީގައި ހުރި އެކަކީ ޖޫހީކަމަށްވެސް އާމިރު ވަނީ ބުނެފައެވެ.
