ރާއްޖޭން ސްރީލަންކާއަށް މަސް އެތެރުމަށް އެއްވެސް ހުރަހެން ނޯންނާނެކަމުގެ ޔަޤީންކަން އެޤައުމުން ދީފައިވާކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެ އެވެ.
ފޮރިން މިނިސްޓަރ ޢަބްދުﷲ ޝާހިދު، ސްރީލަންކާގެ ފޮރިން މިނިސްޓަރާއި، އެޤައުމުގެ ފިޝަރީޒް މިނިސްޓަރާއި ފިނޭންސް މިނިސްޓްރީގެ ސްޓޭޓް މިނިސްޓަރާއެކު ކުރެއްވި މަޝްވަރާތަކަށްފަހު ކުރެއްވި ޓްވީޓެއްގައި ވިދާޅުވެފައިވަނީ ރާއްޖޭން ސްރީލަންކާއަށް މަސް އެކްސްޕޯޓް ކުރުމަށް އެއްވެސް ހުރަހެއް ނޯންނާނެކަމުގެ ޔަޤީންކަން އެޤައުމުން ދީފައި ވާކަމަށެވެ.
Following discussions with my good friend, Hon. FM of Sri Lanka @DCRGunawardena, Min. of Fisheries Hon. Douglas Devananda MP & Hon. State Minister of Finance @an_cabraal assures Maldives that there are no restrictions for #Maldives fish imports to Sri Lanka.
Thank you #SriLanka!— Abdulla Shahid (@abdulla_shahid) October 16, 2020
މިނިސްޓަރ ޝާހިދު މިހެން ވިދާޅުވެފައި މިވަނީ ސްރީލަންކާގެ ވިޔަފާރިތައް ހިމާޔަތްކުރުމަށާއި، އެޤައުމުގެ އިޤްތިޞާދު ހަރުދަނާކުރުމަށް ސަރުކާރުން އަޅާފައިވާ ފިޔަވަޅުތަކުގެ ތެރެއިން އެހެން ޤައުމުތަކުން އެޤައުމަށް މަސް އެތެރެކުރުން ހުއްޓާލާނެކަން ރައީސް ގޮތަބަޔާ ރާޖަޕަކްސަ ވިދާޅުވެފައި ވަނިކޮށެވެ.
ސްރީލަންކާގެ އެ ނިންމުމާއެކު ރާއްޖޭން ސްރީލަންކާއަށް މަސް އެކްސްޕޯޓް ކުރުން ހުއްޓިއެއްޖެނަމަ އެކަމުން ރާއްޖެއަށް ކޮށްފާނެ އަސަރުތަކާއި ގުޅޭގޮތުން ސުވާލުކުރުމަށް ފިޝަރީޒް މިނިސްޓަރ ޒަހާ ވަޙީދު ރައްޔިތުންގެ މަޖިލީހަށް ޙާޒިރުކޮށްފައިވެސް ވެއެވެ.
މިނިސްޓަރ ޒަހާ ވިދާޅުވެފައިވަނީ ސްރީލަންކާއަށް މަސް އެކްސްޕޯޓް ނުކުރެވުމަކީ ކަންބޮޑުވުމެއް ނަމަވެސް، ރާއްޖެއިން މަސައްކަތްކުރަނީ އަބަދުވެސް އަގުބޮޑު މަރކެޓްތަކަށް މަސް އެކްސްޕޯޓް ކުރުމަށް ކަމަށެވެ.
ސްރީލަންކާ އަކީ ރާއްޖޭގެ ވިޔަފާރީގެ މުހިންމު ބައިވެރިއަކަށް ވާއިރު، ދިވެހި ހިކިމަހާއި ކަނޑުމަހަކީ ލަންކާގައި ވަރަށް މަޤުބޫލު އަދި ޑިމާންޑު ބޮޑު ބާވަތްތަކެކެވެ. އެހެންކަމުން ރާއްޖޭން ގިނަ ޢަދަދެއްގެ މަސް ލަންކާއަށް އެކްސްޕޯޓް ކުރެއެވެ.
ކޮމެންޓު ފޮނުވާ