އެވިޑް ކޮލެޖްގެ މޭ އިންޓޭކްގައި އެކޮލެޖްގެ ކޯސްތަކާއި ގުޅުމުގެ ފުރުސަތު ހުޅުވާލައިފިއެވެ.
އެވިޑް ކޮލެޖްގައި އިއްޔެ ބޭއްވި ރަސްމިއްޔާތެއްގައި މޭ އިންޓޭކް 2021 ހުޅުވައިދެއްވީ އެ ކޮލެޖްގެ ޗެއަރމަން އަބްދުﷲ މުސްތާޤް ރަޝާދެވެ. މި ރަސްމިއްޔާތުގައި އެވިޑް ކޮލެޖްގެ ހުރިހާ ފެކަލްޓީއަކުން ވަނީ ބައިވެރިވެ، އެ ފެކަލްޓީ އަކާ ގުޅޭގޮތުން މައުލޫމާތު ހިއްސާކޮށްފައެވެ.
މި ހަފްލާގައި ވާހަކަފުޅު ދައްކަވަމުން އެވިޑް ކޮލެޖްގެ ޗެއަރމަން އަބްދުﷲ މުސްތާޤް ވިދާލުވީ އެ ކޮލެޖްގެ އަމާޒަކީ އަބަދުވެސް ތަފާތު ވައްތަރުގެ ކޯސް އަދި ތަފާތު ވައްތަރުގެ ޕްރޮގްރާމްތައް، އިލްމީ އަދި ގާބިލް ބޭފުޅުންނާއެކު ކުރިއަށް ގެންދިއުން ކަމަށެވެ. އަދި އެވިޑް ކޮލެޖުން ކިޔެވުން ފުރިހަމަކޮށް ނުކުންނަ ދަރިވަރުންނަކީ ޤައުމު ބިނާ ކުރާނެ ދަރިންކަމުގައި ވުމަކީ އެއްމެ ބޮޑު ހުވަފެން ކަމަށް މުސްތާޤް ވިދާޅުވިއެވެ. އަދި މި ފުރުސަތުގެ ބޭނުން ހިފާ، މޭ އިންޓޭކަށް އެޕްލައި ކުރުމަށް ހުރިހާ ދަރިވަރުންގެ ކިބައިންވެސް އެދިވަޑައިގަތެވެ.
އެވިޑް ކޮލެޖްގެ މޭ އިންޓޭކް 2021 ގައި، ސެޓްފިކެޓް ލެވެލް 3 އިން ފެށިގެން މާސްޓަރސް އާ ހަމައަށް، ތަފާތު އެކި ދާއިރާތަކުން ކިޔަވައިދޭނެ އެވެ. އެވިޑް ކޮލެޖްގެ ފެކަލްޓީސް ތަކުގެ ތެރޭގައި، ފެކަލްޓީ އޮފް އެޑިއުކޭޝަން، ފެކަލްޓީ އޮފް ބިޒްނަސް މެނޭޖްމަންޓް، އަދި ފެކަލްޓީ އޮފް ހިއުމަން ޑެވެލޮޕްމެންޓް ހިމެނެއެވެ. މީގެ އިތުރުން ފެކަލްޓީ އޮފް ރިސާޗް އެންޑް އިނޮވޭޝަން އަދި ފެކަލްޓީ އޮފް އިސްލާމިކް ސްޑަޑިޒް އަކީވެސް އެވިޑްކޮލެޖުގައި ހިންގާ ފެކަލްޓީތަކެވެ. މި ފެކަލްޓީ ތަކުން މަތީ ތައުލީމުގެ އެކި ގިންތިތަކަށް އަމާޒުކޮށް އެކި ދައިރާތަކުން ތަފާތު ކޯސްތައް ހިންގައެވެ.
އެވިޑް ކޮލެޖްހެ ކޯސްތަކުގައި ބައިވެރިވާ ދަރިވަރުންގެ ފީ ދެއްކުމަށް މިހާރު ލުއިފަސޭހަ ބަދަލުތަކެއް ގެނެސްފައިވާކަމަށް އެކޮލެޖުން މައުލޫމާތުދެއެވެ. އެގޮތުން އޮންލައިންކޮށް އެޕްލިކޭޝަން ހުށަހެޅުމާއި ފީ ދެއްކުމުގެ ނިޒާމް ގާއިމުކޮށްފައި ވާކަމަށް އެވިޑް ކޮލެޖުން ބުނެއެވެ.
މުޅި ދުނިޔެއަށް މި ދުވަސްވަރު ކުރިމަތިވެފައިވާ ނުރައްކާތެރި ދަނޑިވަޅުގައިވެސް އެވިޑް ކޮލެޖުން، އެކޮލެޖުގެ މަސައްކަތް ހުއްޓާނުލައި، އޮންލައިންކޮށް ކުރިއަށް ގެންދާކަން ފާހަގަކޮށްލެވެއެވެ.
2005 ވަނަ އަހަރު އުފެދިގެން އައި އެވިޑް ކޮލެޖުގެ ކެމްޕަސްތައް މާލެ ސިޓީގެ އިތުރުން ގދ. ތިނަދޫގައި މިހާރު ވަނީ ގާއިމްކޮށްފަ އެވެ.
