ލީގު ހޯދުމުގެ ރޭހުގައި ތިންޓީމު ވާދަވެރިވެއްޖެ

ފްރެންޗް ލީގުގައި ޕީއެސްޖީ މޮޅުވެ ތާވަލުގެ ކުރީގައި ލިލްއާ ފަހަތުން ވިއްދާ ލައިފިއެވެ.

ލީގުގައި ރަށުން ބޭރުގައި ބޯޑެކްސް އަތުން ޕީއެސްޖީ މޮޅުވީ 1-0 ލަނޑުންނެވެ. މެޗުގައި ފެނިގެންދިޔަ ހަމައެކަނި ލަނޑު ޕީއެސްޖީން ކާމިޔާބުކުރީ ފުރަތަމަ ހާފްގެ 20ވަނަ މިނިޓުގައި ޕަބްލޯ ސަރަބިއާއެވެ. ރޭ ލީގުގައި ކުރީގައިވާ ތިން ޓީމުވެސް މޮޅުވި އިތުރު ކޮންމެ ޓީމެއް ވެސް އުޅެނީ އެއްޕޮއިންޓް ތަފާތެކެވެ.

ރޭ ލީގުގެ އެއްވަނަގާ ލިލް ވެސް ވަނީ އެޓީމު ކުޅުނު މެޗު ކާމިޔާބުކޮށްފައެވެ. އަމިއްލަ ދަނޑުގައި ލިލް އިން މާސޭއާ ދެކޮޅަށް ކުޅުނު މެޗު އެއްވަރުވާން ދަނިކޮށް މެޗުގައި ފަހަކޮޅު ލިލްއިން ދެ ލަނޑުޖަހާ މެޗުން ތިންޕޮއިންޓް ހޯދާފައެވެ. އޮލިންޕިކް ލިޔޯން ވެސް ވަނީ އެޓީމު ކުޅުނު މެޗު ކާމިޔާބުކޮށް ލީގު ތަށި ހޯދުމުގެ ރޭހުގައި ހިފަހައްޓައިލާފައެވެ.

ލިޔޯން މޮޅުވީ އަމިއްލަ ދަނޑުގައި ރެންނޭސްއާ ދެކޮޅަށް ކުޅެ 1-0 ލަނޑުންނެވެ. ޕީއެސްޖީން ވަނީ އެންމެފަހުން ލީގުގައި އެޓީމު ކުޅުނު ހަތަރު މެޗުވެސް ކާމިޔާބުކޮއްފައެވެ. މިހާރު ލީގުގެ ޕޮއިންޓް ތާވަލު އޮތްގޮތުން މިފަހަރު ލީގަށް އެންމެ ބޮޑަށް ވާދަކުރާނެކަމަށް ލަފާކުރެވެނީ މި ތިން ޓީމެވެ. މި ތިން ޓީމަށް ވެސް ލީގުގެ ބާކީ އޮތީ 10 މެޗެވެ.

ވޭތުވެދިޔަ ތިން އަހަރު ލީގު ކާމިޔާބުކުރި ޕީއެސްޖީ މިމަހު 21 ވަނަ ދުވަހު ތާވަލުގެ އެއްވަނާގައިވާ ލިލްއާ ދެކޮޅަށް ރަށުން ބޭރުގައި ނުކުންނައިރު އަންނަމަހު ތިންވަނާގައިވާ ލިޔޯންއާ ދެކޮޅަށް ނުކުންނާނެއެވެ. ލިޔޯން އަންނަމަހު 25ގައި ލިލްއާ ދެކޮޅަށް ނުކުންނާނެއެވެ. މިހާތަނަށް ލީގުގައި 28 މެޗު ކުޅުނު އެއްވަނައިގަ ލިލް އޮތީ 62 ޕޮއިންޓާއެކުއެވެ. ދެވަނާގައިވާ ޕީއެސްޖީއަށް ލިބެނީ 60 ޕޮއިންޓެވެ. ތިންވަނާގަ ލިޔޯން އޮތީ 59 ޕޮއިންޓާއެކުއެވެ. ހަތަރުވަނާގައިވާ މޮނާކޯ އަށް ލިބެނީ 55 ޕޮއިންޓެވެ.