ޖާންވީ ކަޕޫރު ވަނީ މިއަހަރުގެ އޭނާގެ އުފަންދުވަހަށް ރާވައިފާ ރޭވުން ބެލުންތެރިންނާއި ހިއްސާކޮށްފައެވެ. މާރިޗު ހަ ވަނަދުވަހު ޖާން ވީ އަށް 24 އަހަރު ވާނެއެވެ. ނަމަވެސް މިކަމާގުޅޭގޮތުން ވާހަކަ ދައްކަމުން ޖާންވީ ބުނެފައިވަނީ 2020 ވަނަ އަހަރު އޭނާގެ ދިރިއުޅުމުން ކެންސަލް ކޮށްފައި ވާކަމަށެވެ. އެހެންކަމުން އޭނާ ދެކޭ ގޮތުގައި އޭނާއަށް މި އަހަރު 24 އަހަރެއް ނުވާނެއެވެ. އަދި އޭނާ މިއަހަރު ފާހަގަ ކުރާނީ އޭނާގެ 23 ވަނަ އުފަންދުވަސް ކަމަށް ވަނީ ބުނެފައެވެ.
ފިލްމީތަރި ޖާންވީ މިހާރު ދަނީ އޭނާގެ ފަހުގެ ފިލްމު "ރޫހީ" ސިނަމާތަކުގައި އެޅުވުމަށް އެންމެ ފަހުގެ ތައްޔާރީތައް ވަމުންނެވެ. މި ފިލްމު ނެރެން ހަމަޖެހިފައިވަނީ މި މަހުގެ 11 ވަނަ ދުވަހުއެވެ.
މިދިޔަ އަހަރުއްސުރެ ޖާންވީ އަންނަނީ އޭނާގެ ފިލްމު "ރޫހީ" އަދި ކުރިއަށް އޮތް ފިލްމު "ގުޑްލަކް ޖެރީ"ގެ މަސައްކަތައް ކުރަމުންނެވެ. އަދި މިކަމާއި ގުޅިގެން އޭނާ ބުނެފައިވަނީ އޭނާގެ މިއަހަރުގެ އުފަންދުވަސް ފާހަގަ ކުރާނީ މި ފިލްމުގެ ސެޓުގައި ކަމަށެވެ.
ފިލްމުފެއާގައި ވާހަކަ ދައްކަމުން ޖާންވީ ބުނެފައިވަނީ އޭނާގެ އުފަންދުވަހުގައިވެސް އޭނާގެ ޝޫޓިންގް ކުރިއަށް ގެންދާނެކަމަށެވެ. އަދި އޭނާގެ ބައްޕަ ބޯނީ ކަޕޫރު އޭނާގެ ކައިރިއަށް އުފަންދުވަހުގެ އުފަލުގައި ބައިވެރިވުމަށް އަންނާނެކަމަށެވެ. ޖާންވީ ބުނެފައިވަނީ މި ފިލްމުގެ ޝޫޓިންއާމެދު ގަޔާވާކަމަށާއި އަދި އުފަންދުވަހުގައިވެސް ޝޫޓްކުރަން ލިބުމަކީ އުފަލެއް ކަމަށެވެ.
2020 ވަނަ އަހަރުގައި މަސައްކަތުގެ މާހައުލަށް ޖާންވީ ނުކުމެފައިވަނި ސެޕްޓެމްބަރު މަހުގެ ތެރޭގައެވެ. އެހެންކަމުން އޭނާގެ ގަބޫލު ކުރާ ގޮތުގައި 2020 ވަނަ އަހަރުވަނީ އޭނާގެދިރިއުޅުމުން "ވޭސްޓް" ވެފައެވެ. އޭނާއަށް 24 އަހަރުވިޔަސް އަހަރު ފުރުނުކަން ގަބޫލުކުރަން ބޭނުން ނުވަނީ ވެސް އެސަބަބާ ހެދިއެވެ.
