ރައީސް ނަޝީދު އަޑީގައި ހުންނަވައިގެން، ރައީސަށް އިޚުލާސްތެރި އެތައް ވަޒީރުންނެއް ކެބިނެޓުން ބޭރުކޮށް، 2023 އަށް ރައީސަށް ކެޕްމޭން ކުރަން އޮތް ޓީމު މިހާރު ރޫޅާލާފައިވާ ކަމަށް، ދިއްދޫ ދާއިރާގެ ކުރީގެ މެމްބަރު މުހައްމަދު ލަތީފު ތުހުމަތު ކޮށްފިއެވެ.
އޭނާ މި ގޮތށް ތުހުމަތު ކޮށްފައިވަނީ، ޗެނަލް13ގެ 'އެންމެ ފުރަތަމަ ގައުމު' ޕްރޮގްރާމުގައި ވާހަކަ ދައްކަވަމުންވެ. މި ޕްރޮގްރާމްގައި ވާހަކަ ދައްކަވަމުން، ލަތީފު ވިދާޅުވި ގޮތުގައި، ރައީސްގެ ކެބިނެޓުގައި މިހާރު އެމަނިކްފާނަށް އިޚްލާސްތެރި ވަޒީރަކު ނެތްކަމަށާއި، އެމަނިކްފާނުގެ މަސައްކަތްތަކުގައި އެހީތެރިވާން ތިއްބެވި ބައިވެރިން މަޑުމަޑުން ދުރައް ޖައްސަމުންދާ ކަމަށެވެ. މިގޮތުން، މަލީހު، އަމީން، އަލީ ވަހީދު، ޝިދާތާ ޝަރީފް ދުރަށް ލާފައިވާ ކަމަށާއި، އަދި މިނޫނަސް އެތައް ބަޔަކު މިހަރު ދުރަށް ލާފައިވާ ކަމަށާއި، މީގެ އަޑީގައި ރައްޔިތުންގެ މަޖިލިހުގެ ރައީސް ހުންނެވި ކަމަށް ތުހުމަތު ކުރައްވަމުން ލަތީފް ވިދާޅުވެފައިވަނީ، ތިބި އިޚްލާސްތެރިން މިގޮތަށް ދުރަށް ދަމުން ދަމުން ގޮސް، މިއަދު ސަރުކާރު ދަނީ ފެއިލްވަމުން ކަމުގައެވެ.
އެނާ ވިދާޅުވި ގޮތުގައި، ޕީޕީއެމް ޕީއެންސީގެ ރަތް ލަޝްކަރު އަންނަ ހުކުރު ދުވަހުވެސް މުޒާހިރާ ކުރަން ނިކުންނާނެއެވެ. އަދި އޭނާ ވަނީ ދިވެހި ޒުވާނުންނާ، މަސްވެރިންނާ، ދަނޑުވެރިންނާ، ހުރިހާ މަސައްކަތްތެރިންނަށްވެސް، މިހާރު ކުރިޔަށް މުޒާހިރާތަކަށް ނުކުމެވަޑައިގަތުމަށް ގޮވާލައްވާފައެވެ. ސަރުކާރުން ވަނީ ދިވެހި ރައްޔިތުން އެމީހުންނަށް ލިބިދޭންޖެހޭ ހައްގުތަކުން މަހުރޫމް ކޮށްފައި ކަމަށާއި އެކަންކަމުގެ އަޑު އިއްވަން ޖެހޭ ކަމަށާއި، ރައްޔިތުންގެ ގޭގައި ތިއްބަވައިގެން މިއަޑުތައް ރައްޔިތުން ނީއްވޭނެކަމުގައި ވެސް އޭނާ ވިދާޅުވިއެވެ.
މިހާރު ހިގަމުންދާ މުޒާހިރާތަށް ރޫޅާލުމަށް ފުލުހުން ކުރަމުންދާ މަސައްކަތްތަކަށް ފާޑު ވިދާޅުވަމުން އޭނާ ވިދާޅުވެފައިވަނީ، ހޯމް މިނިސްޓަރ ޝޭޚް އިމްރާނަކީ މަގާމަށް ގާބިލް ބޭފުޅެއް ނޫންކަން ވަރަށް ރަގަޅަށް ހާމަވެގެން ގޮސްފައިވާ ކަމަށެވެ.
އަދި އޭނާ ވަނީ ހޯމް މިނިސްޓަރު އިސްތިއުފާ ދިނުމަށްވެސް ގޮވާލައްވާފައެވެ. އޭނާ ވިދާޅުވި ގޮތުގައި، ހޯމް މިނިސްޓަރ ޝޭޚް އިމްރާނުގެ މައްޗަށް ހުތުރު އެތައް ކަމަކުން ތުހުމަތު ކުރެވެމުންދާ ކަމަށާއި، މިފަދަ ހާލަތުގައި އެންމެ ރިވެތި ގޮތަކީ މަގާމުން އިސްތިއުފާ ދިނުންކަމަށާއި، މިއީ ދުނިޔޭގެ އެހެން ގައުމުތަކުގައިވެސް ކަން ހިގަމުންދާ އުސޫލު ކަމުގައެވެ. އަދި ޕީޕީއެމްގެ އިސް ލީޑަރުންނަށް ނިސްބަތްކޮށް ހޯމް މިނިސްޓަރ ދައްކަވާ ވާހަކަތަކުން ޕާޓީ ފަހަތަކަށް ނުޖެހޭނެ ކަމަށާއި، މިގައުމު ފަހަތަށް ދުއްވާލަން މަސައްކަތްކުރާ ހުރިހާ އެންމެންގެ ކިބައިން ގައުމު ސަލާމަތް ކުރުމަށް ޕީޕީއެމް ޕީއެންސީ ނިކުންނާނެ ކަމުގައެވެ.
ޕީޕީއެމް ޕިއެންސީން މިހާރު ގެންދަނީ ކޮންމެ ހުކުރުދުވަހު މާލޭގެ މަގުތަކުގައި މުޒާހިރާ ކުރަމުންނެވެ. މި މުޒާހިރާތަކުގައި ޕީޕީއެމް ޕީއެންސީން ގޮވާލަމުންދަނީ، ރައީސް ޔާމިންގެ ދައުރުގައި އިމާރާތްކުރެވި، އަދި ރައީސް ސޯލިހުގެ ވެރިކަމުގައި މިހަރު ލިޔުން ހަވާލު ކޮށްފައިވާ ފްލެޓްތައް އޭގެ ހައްގުވެރިންނަށް ފޯރު ކޮށްދިނުމަށާއި އަދި ރައީސް ޔާމިން މިނިވަން ކުރުމަށެވެ. ކޮންމެ ހަފްތާއަކުވެސް ބައްވަމުން ގެންދާ މި މުޒާހިރާތަކުގައި އެތައް ބަޔަކު ހައްޔަރު ކުރެވި ފަހުން ދޫކޮށްލެވެއެވެ.
މި މުޒާހިރާތަކާއި ގުޅިގެން އަދި މިހާތަނަށް އެއްވެސް މީހެއްގެ މައްޗަށް ދައުވާކޮށްފައެއް ނުވެއެވެ. ސަރުކާރުން ބުނެފައިވަނީ، ކޯވިޑްގެ ނުރައްކާތެރިކަން އިންތިހާއަށް ބޮޑުވަމުންދާ މިދުވަސްވަރު، އެޗްޕީއޭއިން އާންމު ކޮށްފައިވާ ގައިޑްލައިންތަކާ ޚިލާފަށް މާލޭގެ މަގުތަކުގައި މުޒާހިރާ ކުރަމުންދާ ފަރާތްތަކާ ދެކޮޅަށް ފިޔަވަޅު އަޅާނެކަމަށާއި، ގާވާއިދުތަކާ ގާނޫނުތަކާ ޚިލާފަށް އެއްވުން މަނާ ސަރަހައްދުތަކަށް އެއްވާން ފުރުސަތު ނުދޭނެކަމަށެވެ.
ދިއްދޫ ދާއިރާގެ ކުރީގެ މެމްބަރު މުހައްމަދު ލަތީފަކީ، ރައީސް ޔާމިންގެ ސަރުކާރާ ދެކޮޅަށް އޭރު މަޖިލިހުންގެ ތެރެއިން ނުކުންނެވި 12 މެމްބަރުންގެ ތެރޭގައި ހިމެނޭ ބޭފުޅެކެވެ. އެހެންނަމަވެސް، އޭނާ ފަހުންވަނީ، ޕީޕީއެމްއާ އަލުން ގުޅިވަޑައިގަންނަވާފައެވެ.
