ހެލްތު މިނިސްޓްރީގެ ސްޓޭޓް މިނިސްޓަރ ޑރ.ޝާހް މާހިރުގެ ސަސްޕެންޝަން އުވާލައިފި އެވެ. ޝާހުގެ ސަސްޕެންޝަން އުވާލާ އޭނާއަށް އެކަން އަންގާފައިވާކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް ހޫދު ވިދާޅުވި އެވެ.
ޝާހު ސަސްޕެންޑްކޮށްފައި މިހާތަނަށް ހުންނެވީ ހެލްތު މިނިސްޓްރީގެ ވެންޓިލޭޓަރުތަކުގެ ކޮރަޕްޝަންގެ މައްސަލައާއި ގުޅިގެން ނެވެ. ވެންޓިލޭޓަރުތަކުގެ ކޮރަޕްޝަން މައްސަލާގައި 11 މީހެއްގެ މައްޗަަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާއިރު އެ ނަންތަކުގެ ތެރޭގައި ޝާހުގެ ނަން ހިމަނާފައެއް ނުވެ އެވެ. ޝާހުގެ ސަސްޕެންޝަން އުވާލުމާއި ގުޅިގެން އޭސީސީން މައްސަލަ ނިންމިގޮތުގެ ލިޔުން އޭނާއާއި ވަނީ ހަވާލުކޮށްފަ އެވެ.
ރާއްޖެއަށް ބޭނުންވާ ވެންޓިލޭޓަރުތައް ހޯދުމުގައި ކޮރަޕްޝަނަށް މަގުފަހުވާގޮތަށް މުއާމަލާތްކުރި ބިޑު ކޮމިޓިގެ ގިނަ މެންބަރުންގެ މައްޗަށް ދަޢުވާކުރުމަށް ފޮނުވާފައިވާއިރު ޝާހަކީވެސް އެކޮމިޓީގެ މެންބަރެ ކެވެ.
ވެންޓިލޭޓަރުތަކުގެ ކޮރަޕްޝަންގެ މައްސަލާގައި މިނިސްޓްރީ އޮފް ހެލްތުގެ ބިޑް ކޮމިޓީގެ މެމްބަރުންގެ ރަސްމީ ހައިސިއްޔަތުގެ ނުފޫޒު ނަހަމަގޮތުގައި ބޭނުންކޮށްގެން އެ ކުންފުންޏަށް މަންފާއެއް ހޯދައިދިނުމުގެ މަޤްޞަދުގައި ކޮށްފައިވާ ކަމެއް ކަމަށް ކުރާ ތުޙުމަތާގުޅޭ މައްސަލައިގެ ތަޙްޤީޤަށް ފާހަގަކުރެވުނު ކަންތައްތައްވެސް އޭސީސީން ވަނީ ހާމަކޮށްފަ އެވެ. އެގޮތުން މިނިސްޓްރީ އޮފް ހެލްތްއަށް ބޭނުންވާ 75 ވެންޓިލޭޓަރ ސަޕްލައިކުރުމަށް ޑުބާއީގެ ކުންފުންޏެއްކަމަށްވާ އެގްޒެކިއުޓަރސް ޖެނެރަލް ޓްރޭޑިންގ އާ ޙަވާލުކުރުމަށް ބޭއްވި ބިޑްކޮމިޓީގެ 01 އޭޕްރިލް 2020ގައި ބައްދަލުވުމުގެ ނިންމުމުގައި ބައިވެރިވެފައިވާތީ އާއި، އެގްޒެކިއުޓަރސް ޖެނެރަލް ޓްރޭޑިންގއަށް އެ މަސައްކަތް ހަވާލުކުރުމަށް ބިޑު ކޮމިޓީން ނިންމިއިރު، އެ ނިންމުން ނިންމާފައި ވަނީ ދައުލަތުގެ މާލިއްޔަތުގެ ގަވާއިދާއި ޚިލާފަށްކަން ފާހަގަކުރެވުނު ކަމުގައި އޭސީސީން ބުނެ އެވެ.
ކޮމެންޓު ފޮނުވާ