ކްރިކެޓް ބޯޑް އޮފް މޯލްޑިވްސްގެ ސެކްރެޓަރީ ޖެނެރަލްގެ މަގާމަށް އަހުމަދު މުނާޒް ހަމަޖައްސައިފި އެވެ.
ސެކްރެޓަރީ ޖެނެރަލެއް ހޯދުމުގެ މަސައްކަތުގައި ކްރިކެޓް ބޯޑުން ކުރީ އިއުލާނެކެވެ. ޖުމްލަ ހަ މީހުން ކުރިމަތިލިއިރު، އޭގެ ތެރެއިން ހަތަރު މީހަކު ޝޯޓްލިސްޓު ކުރެވުނެވެ. އެ އަށް ފަހު އެ މަގާމަށް މުނާޒް އައްޔަންކުރީ ތިން މަރުހަލާއަކުން ކަންތައްތައް ބެލުމަށް ފަހު އެވެ. އެއީ ލިޔުމުގެ އެސަސްމަންޓަކާއި ޕްރެޒެންޓޭޝަނެއްގެ އިތުރުން އިންޓަވިއު އަށް ބަލައި މާކްސްތަކެއް ދީގެންނެވެ.
ކްރިކެޓް ބޯޑުން ބުނީ މުނާޒަކީ ގިނަ އަހަރުތަކެއް ވަންދެން ކްރިކެޓް ކުޅުމުގެ ތަޖުރިބާގެ އިތުރުން ކްލަބްގެ އެޑްމިނިސްޓްރޭޓިވް މަސައްކަތްތަކުގައި ވެސް މަސައްކަތްކޮށްފައިވާ މީހެއް ކަމަށާއި އޭނާގެ ފަރާތުން ކްރިކެޓް ބޯޑަށް ގިނަ ފައިދާތަކެއް ކުރާނެ ކަމުގެ އުއްމީދު އެބައޮތް ކަމަށެވެ. މިދިޔަ ސެޕްޓެމްބަރު މަހު ކްރިކެޓް ބޯޑުގެ އިންތިހާބު ކާމިޔާބު ކުރެއްވި ފައިސަލް ވަނީ އެ އެސޯސިއޭޝަން ހިންގުމުގައި އާ ޕްލޭންތަކެއް ހަދައި ގިނަ ކަންކަން ބަދަލުކުރުމުގެ މަސައްކަތްތަކެއް ފަށައިފަ އެވެ.
ކޮމެންޓު ފޮނުވާ