އިންޑިއާގެ ލޯން އެހީގައި ކުރިއަށް ގެންދިއުމަށް ނިންމާފައިވާ އައްޑޫ ސިޓީ މަގުތަކުގައި ތާރު އެޅުމުގެ މަޝްރޫޢުގެ ދަށުން އެސިޓީގެ ހުރިހާ މަގެއްގައި ތާރު ނާޅާނެކަމަށް އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ.
އައްޑޫ ސިޓީގައި އިތުރު ލިންކު ރޯޑެއް ޤާއިމްކުރުމުގެ މަޝްރޫޢޫއާއި، އިތުރު މަގުތައް ތާރު އަޅައިގެން ތަރައްޤީކޮށް ފެންހިންދާ ނިޒާމް ޤާއިމްކުރުމުގެ އެއްބަސްވުމުގައި އިންޑިއާއާއެކު ސޮއިކޮށްފައިވަނީ އިންޑިއާގެ އެކސްޓްރަނަލް އެފެއަރޒް މިނިސްޓަރ ރާއްޖެއަށް ކުރެއްވި ދަތުރުފުޅުގެ ތެރެއިންނެވެ. އެގޮތުން އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ކުރިއަށްގެންދާ 1.19 ބިލިއަން ރުފިޔާ މި މަޝްރޫޢުއަށް ވަނީ ކަނޑައަޅާފައެވެ.
އައްޑޫ މަގު ހެދުމުގެ މަޝްރޫޢުގެ ދަށުން ބައެއް މަގުތަކުގައި ސިމެންތި އެޅުމަށް ނިންމާފައިވާތީ ބައެއް ފަރާތްތަކުން ވަނީ ފަޑުކިއުން އަމާޒުކޯށްފައެވެ. މިކަމާއި ގުޅިގެން މީހަކު ކުރެއްވި ޓްވީޓަކަށް ޖަވާބުދެއްވަމުން އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވީ، އެ މަޝްރޫޢުއަކީ އައްޑޫސިޓީގެ މަގުތައް ތަރައްޤީކުރުމުގެ މަޝްރޫޢުގެ 40 ކިލޯމީޓަރުގެ މަގުގައި ތާރު އެޅުމަށް ހިންގާ މަޝްރޫޢެއްކަމަށާއި، އެ މަޝްރޫއުއަކީ އައްޑޫގެ ހުރިހާ މަގެއް ހެދުމާ ގުޅިފައިވާ މަޝްރޫޢެއް ނޫންކަމަށް މިނިސްޓަރ ވިދާޅުވިއެވެ.
The Addu road project was to develop 40km of roads with tar. The project was never about all the roads of Addu. Hopefully that will happen over time. Cement layer is about protecting the storm drainage system being installed from the sand. Hope this is really really clear now https://t.co/leiqiiXDvv
— Fayyaz Ismail (@faya_i) February 26, 2021
އައްޑޫ މަގު ހެދުމުގެ މަޝްރޫޢު ހަވާލުކޮށްފައިވަނީ، އެފްކޯންސް އިންފްރާސްޓްރަކްޗަރ ލިމިޑެޓާއި 730 ދުވަހުގެ ތެރޭގައި މަޝްރޫޢު ނިންމާގޮތަށެވެ. މި މަޝްރޫޢުގެ ދަށުން އައްޑޫ ސިޓީގައި ފެންބޮޑުވުމުގެ މައްސަލައަށް ޙައްލެއް ހޯދުމުުގެ ގޮތުން އައްޑޫ ފޭދޫ ފިޔަވާ ހުރިހާ ރަށެއްގައި ފެން ހިންދާ ނިޒާމް ޤާއިމްކުރުމަށް ވަނީ ހަމަޖެހިފައެވެ.
މި މަޝްރޫޢުގެ ދަށުން އައްޑޫގައި ޖުމްލަ 40 ކިލޯ މީޓަރުގެ މަގު ތާރު އަޅާއިގެން ހެދުމަށް ހަމަޖެހިފައިވާއިރު، ތާރު އެޅައިގެން ތަރައްްޤީކުރާ މަގުތަކުގެ އިތުރުން 60 ކިލޯމީޓަރުގެމަގުގައި ސިމެންތި ސްޓެބިލައިޒްޑް ބޭސް (ސީއެސްބީ) ލެޔަރ އެޅުމަށް ވަނީ ހަމަޖެހިފައެވެ.
ކޮމެންޓު ފޮނުވާ