އިނގިރޭސި ފުޓްބޯޅަ ކުލަބް ޗެލްސީގެ ވެރިޔާ ރޯމަން އަބްރަމޮވިޗްގެ އަގުބޮޑު ޔޮޓްގެ ފޮޓޯތައް ފުރަތަމަ ފަހަރަސް "ދަ ސަން" އިން އާންމުކޮށްފި އެވެ.
"ސޮލާރިސް"ގެ ނަމުން ނަންދީފައި ވާ މި ޔޮޓަކީ 430 މިލިއަން ޕައުންޑްގެ އަގުހުރި ޔޮޓެކެވެ. ޔޮޓުގެ މަސައްކަތްތައް އަދި އެއްކޮށް ނިމިފައި ނުވާއިރު " ދަ ސަން" އިން އާންމުކުރި ފޮޓޯތަކުގައިވެސް ޔޮޓް އަދި އޮތީ އޭތީގެ މަސައްކަތް ކުރަމުންގެންދާ ޖަރުމަނުގެ ސިޕްޔާޑްގަ އެވެ. އަދި ޔޮޓް މިހާރު ވަނީ އޭގެ އެންމެ ފަހުގެ ޓެސްޓް ޓްރައިލްތަށް ހެދުމުގެ މަރުހަލާގައި ކަމަށްވެސް ސަން އިން ރިޕޯޓްކޮށްފައި ވެއެވެ.
ހުރިހާ މަސައްކަތެއް ނިންމާ އޭގެ ވެރިޔާ ރޯމަން އަބްރަމޮވިޗަށް މިއަހަރު ހޫނުމޫސުމާ ހަމައަށް ޔޮޓް ހަވާލުކުރެވޭވަރު ވާނެ ކަމަށް މަސްދަރުތަކާ ހަވާލާދީ ދަ ސަން އިން ވަނީ ރިޕޯޓްކޮށްފައެވެ.
140 މީޓަރު ދިގު މި ޔޮޓްގައި އަޅާފައިވާ އެޑްވާންސްޑް އިލެކްޓްރިކް ދެ އިންޖީނާއެކު މި ޔޮޓު ވެގެންދާނީ ދުނިޔޭގެ އެންމެ ބާރުގަދަ ޔޮޓަށް ކަމަށް ޚަބަރު ލިބެއެވެ.
8 ޑެކަށް ހަދާފައިވާ މި ޔޮޓްގައި ހެލިޕެއިޑަކާއި، ސުއިމިންގ ޕޫލްގެ އިތުރުން އައުޓްޑޯ ބީޗް ކްލަބާއި، ޖަކޫޒީ އާއި ސްޕާވެސް ހިމެނެއެވެ.
ރަޝިއާއަށް އުފަން، އިސްރާއީލްގެ ރައްވެހިކަންވެސް އޮންނަ ވިޔަފާރިވެރިއާ އަދި ބިލިއަނަރ ރޯމަން އަބްރަމޮވިޗްގެ މިލްކިއްޔާތުގައި މިހާރުވެސް 475 މިލިއަން ޕައުންޑްގެ ސުޕަރ ޔޮޓެއް އޮވެއެވެ.
ކޮމެންޓު ފޮނުވާ