އިންޑިއާގައި އުމުރުން 17 އަހަރުގެ އަންހެން ކުއްޖަކު ކިޑްނެޕް ކުރުމަށްފަހު 22 ދުވަސް ވަންދެން ރޭޕްކޮށްލައިފި އެވެ.
އެ ކުއްޖާ ކިޑްނެޕްކޮށްގެން ގެންގޮސްފައި ވަނީ، އޮޑިޝާގައި ހުންނަ ކުކުޅު ފާމްއަކަށެވެ. އެތަނަށް ގޮސް އެ އަންހެން ކުއްޖާ ރޭޕްކޮށްފައި ވަނީ ދެ މީހަކު ވެގެންނެވެ.
އެކުއްޖާއަކީ ޓިރްޓޮލްއަށް ނިސްބަތްވާ ކުއްޖެކެވެ. އޭނާއަކީ އާއިލާއާއެކު ހިނގާދިޔަ ދެބަސްވުންތަކެއްގައި މިދިޔަ މަސް ތެރޭގައި ގެއިން ނުކުމެގެން ދިޔަ ކުއްޖެއް ކަމަށް ފުލުހުން ބުނެފައި ވެއެވެ.
ޑިސްޓްރިކްޓުގެ ޗައިލްޑް ވެލްފެއާ ކޮމެޓީއަށް މައުލޫމާތުދެމުން އެ ކުއްޖާ ބުނީ، އެނބުރި ގެއަށް ދިއުމަށް ކަޓްޓެކްގެ އޯއެމްޕީ ސްކޮޔާގައި ބަސް އަންނަންދެން ހުއްޓާ މީހަކު ސައިކަލުގައި އައިސް ގެއަށް ގެންގޮސްދޭނެ ކަމަށް ބުނި ކަމަށެވެ. އަދި އޭނާ އެ ސައިކަލަށް އެރުމުން، އެ މީހާ އޭނާ ގެންދިޔައީ ގަޓިރޫޕްޕަޓްނާ ވިލޭޖުގައި ހުންނަ ކުކުޅު އެއްޗެހި އޮޅުކޮށްގެން ގެންގުޅޭ ތަނަކަށް ކަމަށާއި، އެތަނުގައި ހުރި ކޮޓަރިއެއްގައި އޭނާ 22 ދުވަސް ވަންދެން ހައްޔަރުކޮށްފައި ބެހެއްޓި ކަމަށެވެ.
އަދި އެތަނުގައި އޭނާ އެތައް ފަހަރެއްގެ މަތިން ރޭޕްކޮށްފައިވާ ކަމަށް އެ އަންހެން ކުއްޖާ ބުންޏެވެ. އެ ކުއްޖާ ސަލާމަތްކޮށްފައި ވަނީ، އެތަނުގައި ގޯސް ކަންކަން ހިންގަމުންދާ ކަމަށް މީހަކު ގޮސް ފުލުހުންނަށް މައުލުމާތު ދިނުމުންކަމަށް ފުލުހުން ބުންޏެވެ. ފުލުހުން އެތަނަށް ގޮސް އެ ކުއްޖާ ވަނީ ސަލާމަތްކޮށްފައެވެ.
ފުލުހުން ވަނީ އެ މައްސަލާގައި އެކަކު ހައްޔަރުކޮށްފައެވެ. އަދި އަނެއް މީހާ ހޯދުމުގެ މަސައްކަތްތައް ދަނީ ކުރަމުންނެވެ. މިހާރު އެ ކުއްޖާ ވަނީ ކުދިން ބަލަހައްޓާ ތަނަކަށް ގެންގޮސްފައެވެ. ކަމާއި ގުޅުން ހުރި އިދާރާތަކުން މިކަން ހިނގާދިޔަ ގޮތް ދަނީ ބަލަމުންނެވެ. އިންޑިއާއަކީ ރޭޕްގެ މައްސަލަތައް ވަރަށް ބޮޑަށް އިތުރުވެފައިވާ ގައުމެކެވެ.
